یاغیشدا پیشیک
ارنست همینگوی
چئویرن: فیروز رفاهی
ترجمه: فیروز رفاهی
فیروز رفاهی
00:00
00:00

هتل‌ده یالنیز ایکی آمریکالی وار ایدی. اونلار اوتاقلارینا گل- گئت ائده‌نده یولدا گؤر‌نلرین هئچ بیریسینی تانیماییردیلار. اوتاقلاری ایکینجی مرتبه‌ده دنیزه باخیردی. پنجره‌دن محاربه خاطیره‌سینه اوجالان سوتون و عمومی پارک گؤرونوردو. اورادان باغداکی اوجا پالم آغاجلاری و یاشیل نیمکت‌لر سانکی گؤز قاباغیندا ایدی. هاوانین یاخشی چاغیندا بیر رسّام دزگاهیله باغا گلردی. رسّام پالم آغاجلارین بوی آتماسینی و دنیزین اؤنونده‌کی باغچالارین الوان رنگلرینی چوخ سئویردی. ایتالیالی توریست‌لر بو سوتونو سئیر ائتمک اوچون چوخ اوزاقلاردان بورایا تؤکولوردولر. سوتون بورونزدان تیکیلمیشدی. او، یاغیش آلتـیندا پاریلداییردی. یاغیش برک یاغیردی. یاغیشین دامجی‌لاری پالم آغاجلاریندان یـئره دامجی‌لاییردی. سو گؤل کیمی قوملو یوللاردا ییغیشمیشدی. دنیز اوزون بیر خط کیمی ساحیلده کسیلیب آرخایا ساری آخیردی کی، یئنی‌دن هجوما کئچسین. مئیداندا سوتونون یانیندا دایانان بوتون داشیییـجی موتورلار گؤزدن ایتمیشدی. مئیدانین باشینداکی کافه‌نین آستاناسیندا بیر قوللوقچو دایانیب، بوش مئیدانا باخیردی.
آمریکالی قیز پنجره‌نین اؤنونده دورموشدو. او، ائشیگه باخیردی. بیر پیشیک پنجره‌نین دوز آلتـیندا بوزوشوب دایانمیشدی. یاغیش میزین یانلاریندان دامجی- دامجی یـئره آخیردی. پیشیک اؤزونو ائله بوزوردو کی، سو دامجی‌لاری اوستونه یاغماسین. آمریکالی قیز دئدی:
– گئدیم او پیشیگی گؤتوروم.
اری یاتاقدان دئدی:
– من گئده‌رم.
– یوخ، اؤزوم گؤتوره‌رم. یازیق پیشیک چوخ چالیشیر کی، میزین آلتـیندا ایسلانماسین. اری یئنه اوخوماغا قوشولدو. او، یاتاغین آشاغی باشیندا ایکی بالیشی آرخاسینا قویوب اوزانمیشدی. او، دئدی:
– ایسلانمایاسان.
قادین آشاغی مرتبه‌یه گئتدی. هتلین یییه‌سی اونو گؤر‌ن کیمی، دیک آیاغا قالخیب، اونا باش ایدی. پاترونون میزی ایش اوتاغین یوخاری باشیندا ایدی. او، اوجا بویلو و یاشلی بیر کیشی ایدی.
قادین، قاپیچی‌نی خوشلاییردی، بونا گؤره دئدی:
– ایل پییو.
– سی، سی سینیـورا بروتو تمپو. هاوا چوخ پیس‌دی.
او، هله ده قارانلیق اوتاغین او باشیندا میزین دالیندا آیاق اوسته دایانمیشدی. قادین اوندان خوشلانیـردی. اونون شیکایت قبول ائده‌نده کی، جیددی گؤرونوشونو چوخ سئویردی. کیشینین اؤزونو بیر هتل قاپیچی‌سی کیمی آپارماسی قادینا خوش گلیردی. قادین قاپیچینـین آغیر و یاشلی اوزونو ائله‌جه ده بؤیوک اللرینی بیه‌نیردی.
قادین بو حیسّلرله قاپینی آچیب ائشیگه باخدی. یاغیش چوخالمیشدی. باشینا رئزین پاپاق کئچیردن بیر نفر بوش مئیداندان کافه‌یه ساری کئچیردی. پیشیک ساغ یاندا بیر یـئرده اولمالی‌دی. هئره‌لرین آلتـیندان کئچه بیلردی. او، هله قاپینـین آستاناسیندا دایانمیشدی کی، بیردن بیر چتیر آرخاسیندا باشینـین اوستونده آچیلدی. چتیری آچان اوتاقلارینی سیل‌- سوپور ائد‌ن قادین ایدی.
او، ایتالیانجا دانیشیب، گولومسه‌دی:
– سیز ایسلانمامالیسینیز.
اونو بورایا هتلین قاپیچی‌سی گؤندرمیشدی. او، قوللوقچونون باشی اوسته توتان چتیرله قوملو یولدا پنجره‌لرین آلتـیناجان گئتدی. میز اورادا ایدی. رنگی یاغیش آلتـیندا یام- یاشیل اولموشدو. آمما پیشیک اورادا دئییل ایدی. قادین بیردن- بیره اومودونو الدن وئردی. قوللوقچو اونون اوزونه باخدی.
– ها، پئردوتو گئلکو کوزا، سینیـورا؟
آمریکالی قیز دئدی:
– اورادا بیر پیشیک واریدی.
– بیر پیشیک؟
– سی، ایل کاتو.
قوللوقچو گولومسه‌دی.
– بیر پیشیک؟ یاغیشدا بیر پیشیک؟
آمریکالی دئدی:
– ائله‌دیر. میزین آلتـیندا ایدی. آه، من اونو چوخ سئودیم. من بیر پیشی‌بالا ایسته‌ییردیم (کؤنلومدن بیر پیشیک بالاسی کئچیردی).
آمریکالی اینگیلیسجه دانیشاندا قوللوقچونون اوزو بوزوشدو. او، دئدی:
– گلین گئده‌ک سینیـورا، بیز همن ایچری گئتمه‌لی‌ییک. سیز جیمجیلاق اولاجاق‌سیز.
آمریکالی قیز دئدی:
– منه ده ائله گلیر.
اونلار قوملو یولدان قایـیداراق قاپیدان ایچه‌ری کئچدیلر. قوللوقچو بیرآن چتیری باغلاماق اوچون ائشیک‌ده دایاندی. آمریکالی قیـز پاترونون اوتاغینـین قاباغیندان کئچه‌نده، او، یئنه قیزا باش ایدی. قیز ایچینده سرت بیر شئی حیسّ ائتدی. پاترونون بو ایشی اوندا موهوم و عئینی حالدا بالاجا بیر آدام اولماق حیسّینی یاراتدی. بیرآندا فیکرلشدی کی، چوخ مهم بیر آدام‌دیر. قیز پیلله‌کاندان یوخاری قالخدی. اوتاغینـین قاپیسینی آچدی. جورج هله ده یاتاغینـین اوستونده اوزانیب اوخویوردو. جورج کیتابی آشاغی ائندیریب سوروشدو:
– پیشیگی توتدونمو؟
– گئتمیشدی.
اوغلان گؤزلرینه بیر آن دینجه‌لمه امکانی وئره‌رک دئدی:
– بیلمه‌دین هارایا گئدیب‌دیر؟
قیز یاتاغین اوستونده اوتوردو. او، دئدی:
– اونا برک وورولموشدوم. بیلمیرم نه اوچون بو قده‌ر اونو سئودیم. او یازیق پیشیگی ایسته‌دیم. یاغیش آلتـیندا بیر یازیق پیشیک اولماق هئچ ده گولمه‌لی بیر شئی دئییل.
جورج یئنه ده اوخوماغا داوام ائتدی. قیز پالتار سویونان میزین اؤنونده اوتوردو. بیر ال‌ گوزگوسونده اؤزونو سئیر ائتمه‌یه باشلادی. او، اؤنجه اوزونون بیر طرفینه سونرا ایسه او بیری یانینا باخدی. سونرا باشینا و بوینونون آرخاسینا گؤز گزدیردی. او، گوزگوده اؤزونه باخا- باخا سوروشدو:
– ساچلاریمین اوزالتماسینا نئجه باخیرسان، یاخشی اولار؟
جورج یوخاری‌یا باخاندا بوینونون دالیسینی گؤره بیلدی. قیز ساچلارینی اوغلانلار کیمی قیسالتمیشدی. جورج دئدی:
– من اونو نئجه کی وار سئویرم.
قیز دئدی:
– آرتـیق اوندان بئزمیشم. اوغلانلارا اوخشاماقدان داها یورولموشام.
جورج یـئرینی یاتاقدا دییشدی. قیز دانیشاندا، گؤزلرینی قیزا تیکمیشدی. او، دئدی:
– سن چوخ گؤزل گؤرونورسن.
قیز گوزگونو میزین اوستونه قویدو، پنجره‌یه ساری گئدیب ائشیگه گؤز گزدیردی. هاوا یاواش- یاواش قارالیردی. او، دئدی:
– چوخ ایسته‌ییرم، ساچلاریمی محکم چکیب ائله بیر دویون دوزه‌لدم کی، اونو هرآن دالیدا حیسّ ائدیم. بیر دنه ده پیشیگیم اولسون. او، دیزیمین اوستونده اوتورسون و من اونو اوخشایاندا خورولداسین.
جورج یاتاقدان دئدی:
– ائله‌می؟
– چوخ ایسته‌ییرم میز باشیندا اوتوروب، شام یئیه‌نده اؤنومده شاملار یانسین و قاشیقلار هامیسی گوموشدن اولسون. کؤنلوم ایسته‌ییر یاز اولسون. من ده گوزگونون قاباغیندا ساچلاریمی داراییم. ایسته‌ییرم بیر پیشیگیم اولسون. تزه- تزه پالتارلاریم اولسون.
– آز دانیش، گؤتور بیر شئی اوخو.
جورج بونو دئییب، یئنه اوخوماغا داوام ائتدی.
آروادی پنجره‌دن ائشیگه باخیردی. هاوا قارالمیشدی و یاغیش هله ده پالم آغاجلارینا یاغیردی. او، دئدی:
– هر حالدا من بیر پیشیک ایسته‌ییرم. من بیر پیشیک ایسته‌ییرم. ایندی بیر پیشیک ایسته‌ییرم.اگر اوزون ساچیم یوخدورسا، یا باش آلدادیجی بیر ایشیم اولماسا ، بیر پیشیگیم کی، اولا بیلر. جورج اونا قولاق آسماییردی. او، کیتابینی اوخویوردو. آروادی پنجره‌دن ایشیقلاری سؤنموش مئیدانا باخیردی. کیمسه قاپینی چالدی.
جورج کیتابین اوستوندن قاپی‌یا باخیب، دئدی:
– آوانتی.
قاپینی چالان قوللوقچو قادین ایدی. او، توسباغایا اوخشار بیر پیشیگی محکم توتموشدو. پیشیگین ال-آیاغی هاوادا ساللانیـردی. قادین دئدی:
-باغیشلایین، پاترون بویوردو بو پیشیگی سینیـورایا گتیریم.

ارنست همینگوی
چارلز باکستئر | ترجمه: 
چارلز باکستئر | چئویرن: 
فیروز رفاهی
جان آپدایک | ترجمه: 
جان آپدایک | چئویرن: 
فیروز رفاهی
اشتراک گذاری در print
چاپ
اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

یاغیشدا پیشیک

فیروز رفاهی
www.ishiq.net

آذربایجان ادبیات و اینجه‌صنعت سایتی