۴۷نومرهلی تکیؤنلو خیابانین سونوندا گؤروشدوک
هر تین باشیندا
نئچه کیرلی، اوگئی باخیش؛
هر الکتریک آغاجی آردیندا نئچه عیبهجر کؤلگه!
یاییلیردی هاوادا
گئجهنین قورشون قوخوسو،
یاغیردی اوستوموزه
عصیرلرین یوخوسوندان اویانان هئیورهلرین نفهسی.
اللرین اللریمده دوگونلو
دیللهشیردی سئون اورهکلریمیز؛
آددیملاریمیزدا سسلهنیردی
سئوگی یوروشونون نغمهسی.
اووجوموزدا اریییردی کؤلگه- کؤلگه
هئیورهلرین کؤلگهسی.
اورهک- اورهک دؤیونوردو گؤروش
چیچک- چیچک آچیلیردی قورتولوش.
قوللارین قوللاریمدا
پاسپورتسوز کئچدیک هئیورهلرین سرحدینی
آددیملاریمیز آیاغیمیزا تیکیلی قالدی،
سینهمیزدن بیر قیزیل گول چلنگی
آسفالتین سینهسینه تؤکولدو؛
اویودون قوینومدا سن
اویودوم قوینوندا من
اویودو قلبیمیز؛
47نومرهلی تکیؤنلو خیابانین سونوندا
قوتلاندی ابدی گؤروشوموز…
یئنه ده گؤروشهجهییک سئوگیلیم!
یادیندا ساخلا عنوانی،
اونوتما اونو!:
«۴۷نومرهلی تکیؤنلو خیابانین سونو»
دی ۱۴۰۴- تهران
