کؤینهیینین سول جیبینده
قیزیل گولون وطنداشلیغی،
بئینینده بولودسوز قرارلارین
امکان عالمیندن موشتولوق اولماسی
حیاتی زنگینلشدیریر.
یاشاماق هوسی
باشقا شئیلرین یئرین دار ائدیر.
چیخیبسان گؤزه للییین تختینه
وزیرلرین قرنفیل، کپنک
بونو نه بولبول اتینه یئریکلهینلر بیلر
نه گون چیخمامیشدان اول
اولدوزلارین خور اوخوماسین گوللهلهینلر.
یاغیشی معنالاندیران حئکایه
تکرار- تکرار سسلهنیر
دئولرین قولاغیندا
اؤلوم دیکسینیر بو خبردن
مئشهلر آمما چاغلاییر
شعیر سئوینیر.
سنین
بونجا وار دؤولتین وار!
منی چئویک دویغولارینا قوناق ائله
چیینینده داشیدیغین یئنیلیک بلاغتینه.
اورهیین مئیخانهدیر
سسین امنیت؛
سنی سئومهین کیمسه
یا کیتاب یاندیران اولار
یا کؤرپو سیندیران.
۱۴۰۴/۱۰/۲۰
