خیالسیز، یالانسیز حیات
لاپ بئله یالان اولار:
یوخودان دوروب گؤره بیلمزسن
گونش اوتوروب ائوینین یوخاری باشیندا
قورتوم قورتوم چاخیرلانیر
سئرچه‌لرین های کویونه جواب اولان
یارپاغین یاشیل رقصینده؛
یولونا چیخماز
گولر اوزلو بیر جیغیر
سئوگی بویالی بیر سلام.
آلدانا بیلسن اگر
ماوی داورانان گؤیرچینلی گونلره
یئرین حالی دوزه‌لر
کپنک دولار یوخونا
یاغیش کؤرپو دورار
گؤی له یئر آراسیندا.
بعضاً خیالدان باشلانیر
کوسولرین یاراتدیغی ایستی قوجاق؛
یعنی خیالدان دوغولان خیال
هر شئیی قاریشدیریر بیر بیرینه؛
نه شاعر بیلیر
سؤزجوک‌لرین نه‌دن عصیان ائتدییین
نه مجنون بیلیر
اولدوز‌لار نه‌دن شعیر کیمی‌دیرلر.
۱۴۰۵/۰۸/۲۳
