هرنقدر کی، اونو سئویرم، بیر او قدر ده آستیریدی دانلاییرام. آستیرید آروادیمین – کورینین بئینینه یئریتدی کی، شادلیغی ألده ائتمه‌یین یئگانه یولو منی ترک ائتمکدیر. چوخ ساده گؤرونوردو. “او آدامی بوراخ، او قاپیدان چیخ گئت، شادلیغی ألده ائدرسن، اوندا سربست اولارسان.” شادلیغی ألده ائت. ایندی، بو بیر سؤز بیرلشمه‌سیدیر. فورد ماشینی ایچینده آمئریکا یوللاریندا، آزادلیغا دوغرو، او زامانلاردا- بیر نسخه کیمی سؤنولوردو.
من ماشین یولوندا دایاندیم. او گون کی، او گئتدی قارلا یاقیش قاریشیق یاغیردی. من قبول ائتدیم کی، اونون دالینجا گئتمییم. گئتمیه او قدر هوسکار ایدی کی، بلوکون یاریسینا چاتاناجان اونوتموشدو اون جامین یاغیش سیلگیسینی خودلاسین. یولون تینیندن کئچدی، ماشینین قاباق حیصه سی بیردن سیلکه لندی، تکرلر سولاری أطرافا سپدی، سونرا گؤزدن ایتدی.
اوغلومو مؤحکم قوجاغیمدا توتموشدوم، قاراژا گیردیم کی، بیر سیاهه حاضیرلاییم. جئرمی قوجاغیمدادیر. پاسلانمیش، کوهنه لمیش یوک ماشینیم. سینیخ دیرمیق، بوکولموش میشار، پرده لی آرخا پنجره نین آشاغی حره سینده پاسلانمیش تایمر چیراغی. مندن سوروشمایین نه اوچون بونلاری اورادا یازیرام. علاوه سیاهه: ائو اوچون سیاهه. یاشامیم اوچون. صحتیم اوچون. ایشیم اوچون. بیر صاندیق ماءالشعیرایچگیسی. آنام- دولورئس یوخاری قاتدا، اؤز اوتاغیندا. قوی بورا گلسینلر، هر نه اولورلار اولسونلار، بو منیم بیرینجی شوعاریمدیر، ایکینجیسی ده قوی قالسینلار.
آستیرید دوشونوردو کی، شادلیق زواللی کورینین اووجونون ایچینده دیر، و هرگون بئله ده دئییردی. او، دئییردی، سنین اوچون شادلیق؛گونو وئسسیز گئچیرمک. سن دوغرو دئییرسن کی، وئس سنین باشینی شلوغا سالیر و سنی دولاشدیریر. او گون کی، سن او، آغزی پیس قوخویان آدامین نفسی اوزرینده اولمادان یوخودان اویاندین، او گون سنه خالیص قازانج اولار. آستیرید منیم باره مده چوخ رحمسیز ایدی. او کورینله بیر یئرده، ۳-ف آدلی طبی یاردیم مرکزینده چالیشیردی. خسته خانانین ساکیت گئجه لرینده بو توخوم سپیلمیشدی. “پرستارلار همیشه و هارادا ایستسلر ایش تاپارلار”. هئچ شؤبهه م یوخیدی کی، بونلار آستیریدین سؤزلریدیر.
کورین مندن منه دئیینیردی ؛ او همیشه دئییردی کی، من عادی شئیلری بیلمیرم. هفته سونوندا چوخ ایچگی ایچیرم. ایتیم، ائسکوتر یاتاق اوتاغینی پوخا چئویریبدیر. ماغازادان گلنده أللریم همیشه باتیقدیر- و بونون کیمی جانا گتیرن دانلاقلار: گویا کی، من اونون ایستکلرینه، هرنه اولورسا، اولسون دیققتسیزم، سایمازام. کورین داها چوخ اؤزوندن، اؤزونون لاخلانمیش، بولانمیش حیاتیندان، قارماقاریشمیش دورومو، گؤرپه میزین حاققیندا قورخوسوندان، کیفایت قدر بیر موناسیب آنا اولاماماسیندان، کدرلریندن و بونا اوخشار شئیلردن شیکایت ائدیردی.
آنجاق من اونو سئویردیم. او منی ترک ائتدی، گئتدی. سونرا من آستیریده عاشیق اولدوم و اونونلا ائولندیم. ایندی من اونونلا ائولییم، و هله ده اونو سئویرم. اونون – بو سؤزو ایشلتمه یه مجبورام، مکری وار. کورین- بیرینجی آروادیمین مکری یوخ ایدی. دوشونه بیلرسیز کی، هامییا پرستار کیمی اولان بیر آدام نئجه اولار. اؤز کؤرپه سینه یاخشی باخا بیلمه یب، گیجه لنه. آمما او، بئله ایدی. قهوه ای سیچان رنگلی ساچلاری، بوتون دئدی- قودولارین مووضوعسو ایدی. قوناقلارین اؤنونه قویولاسی بیر دوز مه لی خؤره ک حاضیر ائده بیلمه یین، أن چوخ سئویلن و هئچ واخت تایی اولمایا بیریسی ایدی. من کونلومو اونون باجاریقسیزلیق واختینا دؤنه –دؤنه وئردیم. دئمیرم کی، بو تقدیره لایق بیر ایشدیر.
ائله اوندا کی، کورین چیخدی-گئتدی، آستیرید تاپیلدی. اوندان قاباق گؤزلریمیزده یاندیریجی، آجی باخیش آل-وئریندن آرتیق بیر شئی خاطیرلامیرام. او، منی اؤز ماهیر قوللارینا آلدی. اؤنجه سی بو تسکین ائدیجی و دردداشلیق ایدی، بلکه ده من بئله دوشونورم. من هیج واخت بیرزاد سوروشمادیم. فوتو ایستودیوسوندا بیر عکسین آرخاسیندا اولان مئشه نی بیر کرپیج دیوار ایله دییشمه سی واختی کیمی ، او، اوغلان دوستداشینی آتیب منه أتلی خوره کلر وئریب، سرین آرپاسویو بوطریلرینه قوناق ائدیردی. من، اونو و بونلاری غنیمت ساییردیم، آنجاق او منیم بئله دوشونمییمه اؤنم وئرمیردی. او، دئییردی،” وئس، سن من ایستییه سن. دوغروسو چاشیب، قالمیشام.” او، منیم بوتون چاتمامازلیقلاریمی گؤزدن ایراغا آتدی. بیرینجی آروادیم بیر جانلی شاهید کیمی ائعتیبارینی ایتیردی، اوزه ریمده سحر- ائدیجی بیر وارلیغی حیس ائتدیم. سونرادان یوموشالدیم. آستیریده اولان سئوگی بیر اوزوم مئینه سی کیمی اوره ییمدن اوجالدی. بیلمیرم بونو داها نئجه دیله گتیریم.
او چوخ أردملی ایدی، اوشاق تربیه سی اوچون گوونیلین و اوشاقلارین آجیغلاندیریجی دوروملاریندا چوخ ساکیت ایدی. تعطیل گونلرینده منیم یانیمدا اوتوروب، غزئتین سیاحت بؤلمه سینی اوخویوب، قلم ایله اوزاخ یئرلرین آدلارینی جیزیقلاییردی کی، بلکه گلجکده اورایا گئده سی اولدوق . قارما-قاریشیقلیق بو ائودن گؤچموشدو. ایندی بو ائوده بیر نئچه دایاق وار ایدی. اونلارین باشیندا آیدینلیق، پلان، سئوگی و لذت دوروردو. اؤز-اؤزومه دوشونوردوم، گؤر نئجه خوشبختلیک سنه اوز توتوب. گون گلیب گئدیردی، بیز بئله خوش یاشاییردیق. آستیرید هر شئییه پارلاقلیق گتیرمشیدی. آرتیق جرمی بوتون گونو زیریلدامیردی، گئت-گئده بویویوردو. دیش چیخمارق، آددیملاماق، دیل آچماق، دانیشماقدان باش-بئیین آپارماق.
ائوده یئنی اویونجاقلار تاپیلدی. بوشانما بوتون قایداسیندا گئتدی، کورین هیچ بیر شئی، حتی خرجلیک، طلب ائتمه دی. آستیرید ایله ائولندیم، چوخ چکمه دی کی، بیزیم باشقا ائولادیمیز اولدو، گوزل-گویچک بیز قیزاوشاغی. لوسی، حیاتیمیزدا یئنی بیر جیزگی اولدو.
جرمی بؤیویوب دیل آچاندا، کورین هردن تلفون ائدردی، آنجاق اوغلونو گؤرمه یه ایمکان تاپمیردی. بونو اؤزو، باشی شولوغ اولدوغونا گؤره بیلدیریردی. او، چوخ حساس ایدی و دییردی کی، عادی معیشت و ایجتیماعی باقلارینا چوخ مؤحکم باغلانمیشدیر. گؤروشمک اونون وجودونون مدافعه سیستئمینه زیان گتیرر. هرحالدا، بو ایشی گؤره بیلمیردی، بونو اؤزو بئله دیله گتیریردی. جرمی، اونون یوخلوغوندان عذاب چکیردی، آنجاق آییریلیق اؤزون سورنده، او دا، آرتیق ساکیتلشمیشدی، چونکی آستیرید آناسینین یئرینی قایغی و سئوگی ایله دولدورموشدو. ائله بونا گؤره کورین گؤروشمک یئرینه تئلئفون ائدیردی، چوخ واختلاری دا مکتوب یازیردی.
آللاه، او مکتوبلاری نه ایدی! آنالار هئچ واخت بئله مکتوبلار یازمامالیدیرلار. مکتوبدا قهوه دامجیلاری، پیس أل-جیزمالاری، معناسیز پاراگرافلار، فعلسیز و بوش جومله لر. کوریننین مکتوبلاریندان فرقلی اولاراق جرمینین مکتوبلاری اوشاقلیق خبرلری ایله دولو ایدی. بیر مدتدن سونرا، بو مکتوبلار ماراقسیز اولدولار، اونلار بئیسبال اویونلارینین نتیجه لری ایله دولوردو. جئرمینین مکتوبلاری گئت-گئده آزالدی.
بیرواخت اولدو کی، کورین دئی-تام تئلئویزیون شووندا گؤروندو. بو وئریلیش قاچان آنالار حاققیندا ایدی. صحنه ده اوچ آیری قادین ایله اوتورموشدو. هئچ واخت آنلایامادیم کی، نه اوچون او، بو وئریلیشده ایشتیراک ائتدی. وئریلیشین ایلک اون دقیقه سینده، وئریلیشین باشی سویوق آپاریجیسی ایله سورو سوروشان تاماشاچیلار چوخ منطیقی گؤرونوردولر. آنجاق واختین آخیرلاریندا هامی سینیرلنمیشدی. سون سیرادا اوتورانلار بارماقلا قاچان آنالاری گؤستریب،های-گوی سالیب، باغیریردیلار. باشقالاری دا تؤهمتلر یاغیلاندان سونرا اونلاری دوغرولاییب، أل چالیردیلار. من بونلارین هامیسینی قونشو قادیندان ائشیتدیم. بوتون گونو تئلئویزیون سئیر ائدن قونشوموز دئییردی کی، کورینین ساچلاری توم قهوه ای گؤرونوردو و سئیرک آلا-بولا آغ تئلر ده گؤزه چارپیردی.
کورینه، اونون میللی تئلئویزیوندا گؤرونمک اوچون بئله أردمسیز هوسی اوچون اوریم سیخیلدی. اونون ایستودیادا اوتوراراق آوارالار طرفیندن توپ آتشه توتولموش زهرلی صیفتینی گؤزومون قارشیسیندا تصوور ائدیرم.
کورین گئدندن سونرا آنام – دولورئس، بیزمله یاشاماق اوچون یانیمیزا گلدی و اوست مرتبه ده اولان آرتیق اوتاقدا یئرلشدی. او،دئییردی کی، جئرمییه یاردیم ائتمک ایسته ییر، بیر آرا یاردیم ائدیردی. چوخ واخت یوخاریدا اوتوروب، بیر شئی توخویور، پنجردن ائشییه باخیب، قونشولاری، گلیب – گئدن غریبه لری، یا آرا ساتیجیلاری یوخلاییردی. جوماآخشاملاری بیریج اویونلارینا قاتیلیردی، جومانین آخشامیندا دا اینجیل اوخونوشونا گئدیردی. آنام آدینا باخمیاراق ( لاتین دیلینده دولورئس غملی دئمکدیر) چوخ شأن بیریسیدیر. حیاتدان لذت آپارین اونون همیشه سؤیله دییی سؤز ایدی. آستیرید ایله او تئز قوووشدولار. آستیرید، بونو بیر سیرر کیمی مندن گیزلتمک ایسته ییردی، آنجاق من آناما یاخشی بلد ایدیم و بیلیردیم کی، او سمادان کنار بیر آدامدیر ( باخمیاراق کی، آند ایچمیش بیر جومهوریچی ایدی) و برک اینانیردی کی، بیرگون عیسی پیغمبر گئری دؤنه جک. او، دئییردی کی، بیز آخیرزاماندا یاشاییریق، و گرک حیات چتیلیگلری اوچون عیسایا اؤز توتاق.
آستیرید اونونا شوخلوق ائدیردی، دوغروسو منیم یانیمدا بئله سؤیلشمه لردن قاچینیردیلار.
لوسی دونیایا گلندن سونرا آنامین یاردیمی داها لازیم گؤرونموردو. آخی، لوسی هئچ واخت بیزه باش آغریسی وئرمدی. آستیرید اونو تکباشینا بویوده بیلردی. لوسی اوشاقلیق یولوندان بیر مذمت ائدیجی باخیشلا بو دونیایا آیاق باسدی.
جئرمینین اون یئدی یاشی دولوب، بیر ژاپون سؤزو اولان، تاتو علامتی سول بالدیریندا واریدی. هله ده بیلمیریم او سؤزون معناسی ندیر، او دا کی، بونو آچیقلاماق ایسته میر. اومباسیندا دا بیر نارین تاتو وار؛ گوله رک دیشلری گؤرونن خیالی بیر حئیوانین أللری اومباسیندادیر. اوشاقلار و یئنی یئتمه لر اوچون تاتو یازدیرماق قاداغاندیر، آنجاق گؤرونور بونو یالنیز اؤز تای-توشلاری بیلن گیزلی بیر یئرده سالدیریبدیر. اوگون ژاپون تاتوسو بالدیریندا ائوه گلنده من جئرمییه قایداسیزلیق قانونونو اوخودوم، آنجاق او منی ماراقلا دینلدی، و بیر اینجه لیکله ائله أله سالدی گویا کی، من تاریخین صونعی یارانمیش بیر محصولویام. بیرده باخین قیشین شاختا واختیندا او، بیر جین شالواری، سیویتر و بیر ده بارماغی دمپایی گئییردی. یای پالتاری قیش چاتداماسیندا- قایداسیزلیغین بیر علامتی کیمی. او ایسته ییر بیر گنج آللاه کیمی فصیللری موباریزیه چاغیرسین. مینئسوتا شهرینده بو بیر شوجاعت سیمبولو ساییلیر و گنجلرین چوخو بونو یانسیلاییرلار. ائله بونا گؤره اونو سئویب، بیننلرین سایی چوخ چوخدور. اونون نئچه یوز دوستو وار، و اونلارلا تئکستلشمیه مشغولدور. اؤزونده آناسینا، کورینه، مخصوص اولان بیر قشنگلیک وار. ائوده اولان اوچ قادین خایلاغی اونو برک سئویرلر. اونلار ساچلارینی داراییر، أیر ائعتیراض ائتمسه، بئله باشماقلارینین قایتانلارینی دا باغلاماغا حاضیردیرلر. اوندان بالاجا اولان باجیسی، قارداشی اوتورماق همین شکلینی چکیر. تصوور ائدیرسیز نتیجه نه اولور: سیرتیق بیر اوشاق. او، هئچ ده سیرتیق دئییل، بلکه آرتیق خوشلوقدان کئف ایچینده دیر. او، طبیعی اولاراق گولر اوزلودور، آخی هئچ زحمت چکمدن بوقدر سئوگینی ألده ائدیر. مندن یان گئچنده منه بیر أتک یازیسی کیمی باخیر.
****
تزه خبر بودور کی، کورین شهریمیزه قایدیبدیر و بیز بئله بیر دوروم ایله اؤزبه اؤز اولموشوق. او، منه بیر پوست کارتی گؤندریب، دئییر کی، اوتوبوس ایله شهره گلیر، بونا گؤره من نئچه ساعات ایشیمدن قارژدا أل چکیب، شهر مرکزینه اونو گؤتورمک اوچون گئتدیم. گلمه یینین ندنی؟ هئچ. بلکه بعضی گؤندلیک موضوعلار اوچون؟ هئچ ایپ اوجوم یوخدور. گلمه سینین، بوقدر واخت گئتمه سیندن سونرا، هئچ بیر معناسی یوخدور.
باخمیاراق کی، طبیعتیمده سیر ساخلاماق بیر هویوم یوخدور، کورینین دؤنمه سینی ائوده هئچ کیمه بیلدیرمه دیم. هاتورن خیابانیندا اولان گئریهانت دایاناجاغینا گیرنده، دایاناجاقلارا مخصوص اولان، نملی تورپاق ایله نیترات قارشیغی، اییی بورنومو قاشیندیردی. دایاناجاغا گیرنده ائله بیر ایسته ییرسن اینسانییتی یئنیدن رئداکته ائدسن. آنجاق بو آلینمیر، چونکی کورین آرتیق اورادا اوتوروبدور، بیر اوتوراجاق اوستونده گؤزله ییر. یانیندا قهوه ای رنگده ایکی کارتوندان تیکیلمیش چانتاسی وار. توزتورپاغلی پالتارلار، ایستی کؤینکلر و باشقا شئیلر چانتادان ائشیگه چیخیر، دیواردا اولان ساعات یانیندا دایانیبدیر.
بورادا گرگ گئچمیش آروادیمین حالینی سیزه ایضاح ائدیم.
اورتا یاشلی گؤزل بیر قادینی تصوور ائدین کی، دئیه سن تزه کارواشدان چیخیبدیر. دوغروسو قورلانیبدیر، آنجاق کارواش اونون اوست باشینا قیریشلار سالیب، ساچلارینین هره سی بیر یانا سیچراییب، اؤزونده مات قالمیش بیر گؤرونوش وار، آلنیندا نئچه پارالئل زولاق گؤرونور و گؤزلرینین أطرافی قیریشیلارلا دولودور. حیات اونو دیدیب، داغدیبدیر. آنجاق أساس مسأله بو دئییلدیر. أساس بودور کی، او هله ده منه گؤزل گؤرونور، بو دا چوخ غریبه دیر. بو ساغلام فیکیره ضید گؤرونور.
أینینده چؤهره یی رنگلده بیر سیویتر وار کی، اوستونده تئلئویزیون شوونون آدی یازیلیبدیر. بو همان وئریلیشین آدیدیر کی، اورادا اونو أله سالدیلار. وئریلیشین آدی آلچاق، دار دوشونجه لی، اینجه بوقلو میلیونئرین آدی ایله عینی دیر. ألینی توتاندا باش قالدیریب منه باخدی. دویان کیمی قالخدی. منیم یاناقلاریمدان اؤپدو. او آندا ایستی دوداقلاری منه تانیش گلدی. أسکی بیر قاشینما آغریسینی حیس ائدیرم.
“وئس” او، دئییر، ” بیلیردیم سن منی قورتاراسان.”
” هله کی قورتارمامیشام، کورین.” دئیب، چالیشیرام شوخلوغا سالیم. اوندان هامبئرگئر، قیزارمیش یئرآلما ایله کئچاپ سوسون قوخوسو گلیر. فست فود قوخوسو. یازیغین بیریسی. گؤره سن باشینا نه گلیبدیر؟ “نئجه سن؟”
” نئجه یم؟ نئجه گؤرورسن، ائله.”
اؤنون یازیق گؤرونوشو گؤروب ده بیر شئی دئمیرم.
“یاخشی” او، دئییر، ” یوخلاماغین قورتاردیمی؟ بو چانتالاردان بیرینی آلا بیلرسنمی؟ من ده او بیرینی گؤتوررم.” چانتالاردان بیرینی گؤتوردو. آشاغییا باخاندا گؤدوم کی، باشماقلاریندان بیرینین اوجو دلیکدیر. سول باشماقیندان بارماقلاری گؤرونور.
یانیمدا اولان بیرینجی آروادیم ائوسیز بیر قادینا دؤنموشدو.
****
ائوه گئدنده یوک ماشینینم ایچینده منه دئییر. ” مالی شرایط اوچون ایدی. چوخ أذیتی واردیی. وئس، سن همیشه یاغلانمیش مئیمونا اوخشاییردین، و همیشه ده ماشینلاری قاییرماق ایله اؤزووه بیر ایش تاپا بیلیردین. بونا گؤره ده بیر شئی بیلمیردین. آما اونلار منه چوخ شخصی یاناشیرلار و دئییرلر کی، من چوخ شئیلری اونودورام. بلکه ده من بئله ایدیم، آنجاق یالنیز آشام چاغلاری، اوندا کی ایشدن سونرا اؤز اؤزونله باش باشا اولوردوم بئله اولوردو، و موتخصیصلر ده بونو اینکار ائتمیر، اونلار ألبته بونا چالیشدیلار. دئمک اولار کی، بین الخالق بانکلار بو بلانی باشیما گتیردیلر، چونکی من اؤز گلیریمله یاشایا بیلمیردیم، و یاواش-یاواش منی خسته خانادان آزاد ائتدیلر، باخمیاراق کی، غوصه هئچ ده یولخوچو بیر مرض ساییلمیر، آنجاق خسته لرین بیریندن منیم جانیما دوشدو. او بیر کیش ایدی و بوتون گونو زاریلداییردی. اونون اینیلتی سسی منیم بئینیمه دوشدو و ائله اوراداجا قالدی. من، ایندی ده، او سسی ائشیدیرم. سن ده اونو ائشیده بیلیرسن می؟ یوخ؟ نقدر خوشبختسن. وئس، منیم قاباغیما چیخدیغین اوچون آللـه سندن راضی اولسون. بیلیرم کی، سنه خبردارلیقدان علاوه بیر ایش گؤرمه لی ایدیم، آنجاق باجارا بیلمه دیم. آللـه، نقدر هاوا سویوخدور.” بوینونا بیر بویون دسمالی سریرییر. آما، هاوا سویوخ دئییل. سویوخ اونون بئینینده یئرلشیبدیر. اوکتبر آیینین ایلک نملی و ایستی گونلریندن بیر گوندور؛ هاوا ۷۰ درجه دیر. هیندو یایی. جانینی ایسیندیرمک و ایستی قالماق اوچون بیر ننه کیمی اؤزونو سارمیشدی.
” یاخشیدیر، کورین،” اونا دئییرم. ” دوغرودان، هارادا ققالاجاقسان؟”
منه باخیر.
“دئمک ایسته ییرم، نقدر بورادا قالاجاقسان؟ بورادا ؟ بیزیمله ؟”
گوزونو ائیشییه تیکیبدیر.” آمئریکانین شهرلری نقدر کیرلیدیر.” او، قاپیسی تاختالانمیش بیر دراگ ائستورا ایشاره ائدیر. “بویانلاردا بیر درمانخانانی خاطیرلاییرام.” چوخ معناسیز دانیشیر، ائله بیل بیر یئردن اوخویور. دریندن کوکسونو بوراخیر و ایکی کره اوسکورور. ” قوی بیر حئکایه نی سنه دانیشیم. بیر قادین واریدی. اونون أحوالاتی أوولر یاخشی ایدی، أری ده چوخ یاخشی ایدی، هیچ کیمی قیناماق اولماز. بو، أحوالات کئچمیشده باش وئردی. اونلار بیربیری ایله راحانت و مئریبانجا یاشاییردیلار. آنجاق سونرا، نه ایسه باش وئردی. قوی بئله دئییم، بیر وولکان داغی پارتلادی. و قادین هئچ آنلامادی نه باش وئردی. دئمک ایسته ییرم، بیلمدی کیم وولکانی پارتلاتدی، آنجاق بیلیردی کی، بیر شئی باش وئریبدیر، چونکی یاواش یاواش حیس ائدیردی کی، آرتیق هئچ شئی قاباغکی کیمی یاخشی گئتمیر. توز-تورپاق اونو اوسکورمیه سالدی، سو دا زهرلی اولموشدو، هاوا دا پیس قوخویوردو، وولکاندان پوسکورن پالچیقلاردان، و سس کوی واریدی، و او بئله آنلاییردی کی، بیر اوشاق دوغدوغو اوچون بویوک بیر سهوه یول وئریبدیر. بو دونیایا، آی آللـه، نقدر دهشتلیدیر، و هئچ کیمین ده بیر شئی دئمیردی.”
” دئمک بئله، کورین،” آنجاق بونو دئییه بیلدیم. باش آغریسی ائوده منی صبریسیزلیکله گؤزله ییر. چونکی من آروادیم آستیریده، یا آنام دولورئسه، اوغلوم جئرمییه، قیزیم لوسییه دئمه میشدیم کی، کورین شهریمیزه گلیر، باشیمیزا درد-بلا اولاجاق. نییه، هئچ کیمه دئیه بیلمدیم کی، اوتوبوس تئرمینالینا گئدیرم، اونو گوتورم؟ اؤزوم بیلیرم نیه. منه حاق وئرین. بوقدر ایلدن سونرا، اونو گؤرمک ایسته ییردیم، بونا گؤره ده اونو گؤرمه یه گئتدیم. من اونو باغیشلامیشدیم. ایندی ده اونو باغیشلاییرام. آنجاق، اونلار نئجه؟ مرج باقلاماغا دیمز. هله کی، من ائوین باشچیسییام.
او گونش قورویانی آشاغی ائندیریب، بیر آز سولا طرف ایت لییب، اونون گوزگوسوندن اؤزونه باخیر، ساچلارینی سهمانا سالیر. ” گؤر باشیما نه گتیریبلر. منی اؤزومه بوراخمیرلار.”
“بیلیرم.”
“وئس، ” اوُزونو منه دؤندریب، دئییر،” ألیمدن بیر ایش گلمیر. چوخ ائحتیاجیم وار بیر موُدت بیری منه باخسین.”
اوُزوُنده اولان سویوقلوق محو اولموشدو. ایندی اورادا باشقا بیر ایفاده گؤرونوردو. کوچه بوجاغیندا قالان ائوسیز قهرمانلارین اوُزونده اولان یارلواریش گؤرونن ایفاده کیمی. یالواریش . گؤره سن عادی حیاتدا کیمسه بو سؤزو ایشله دیرمی؟ من کی بئله بئله دوشونمورم.
” سندن خواهیش ائدیرم منه بیر ایش گؤره سن،” دئییر، آنجاق آرخاسینجا دئمیر مندن نه ایسته ییر. ” بورا سیزین محله دیر؟” سوروشور.
“ایندی اورایا گیریریک،” من دئییرم.
ائولر بیربیر یان کئچیرلر، اؤنلرینده اوُزون ائیوان اولان، أسکی ائولر، و بو آندا اف-۱۵۰ –نین موتوروندان قیشغیریغا اوخشار بیر سس ائشیدیرم، گرگ قاییشی بوشالمیش اولسون.
“وئس، ده گؤروم، من هئچ یادینا دوشوردوم می؟”
بو سئوال چوخ گؤزلنیلمز ایدی. اونلار همیشه سئوگی و حیسلریندن چوخ آچیق سئوالار سورشورلار. آنجاق من ائحتیاط ائتمه لی ایدیم. منیم جاوابیم اؤزومه قاییدا بیلر. بیر آندا خیالا دالدیم.
” هن، هردن بیر سنی خاطیرلادیردیم.”
” حتا، آستیرید ایله ائولنندن سونرا؟”
“هن.” بیرسورو بلوکلارا سورورم، سونرا دئییرم،” سنین اوچون چوخ نیگاران ایدیم.”
بو، اونون ایسته دییی جاواب دئییلدی. آنجاق بیرآز راحاتلادی و آرخایا سؤیکندی. یوک ماشینین، یولجو طرفینده یئرده بیر بوش ماءالشعیر قوتوسو دوشموشدو، اونو آتماغی اونوتموشدوم. او ووقاری بیر حالدا ساغ آیاغینی اونون اوستونه دیرییب، قویمادی أطرافا اویناسین.
” یقین ائدیردیم کی، سن منی خاطیرلایارسان. هردن سنی یوخودا گؤروردوم. یوخودا سن گنج بیر اوغلان ایدین، منه قارشی دا چوخ مئهریبان ایدین. بیر کره منی آلوولار ایچینده اولان بیر آپارتماندان قورتاردین.یوخودا بونو پولسوز ائله دین.”
****
بورادا ماشین یولوموزا داخیل اولوروق. گاراژدا پارک اولونان ماوی سیویک هوندا ماشیندان بیلیرم کی، آستیرید آرتیق ائوده دیر. آنام اؤز اوتاقیندا- بوگون چرشنبه دیر- یوخاریدا یا بیر شال توخویور، یا اینترنئتده جینایت داستنلارینی آختاریر یا دا یوحنا موکاشیفه لری کیتابینا باخیر. جئرمی اؤز دلی دوستالاری ایله آخشام یئمیینه قدر شهرده پیشیکلر کیمی آوارالانیر، آنجاق لوسی ائوده اؤز اوتاغیندا آت حاققیندا اولان کیتابلاریندان بیرینی اوخویور.
أصلینده من گرگ کورینی بیر مئهمانخانایا آپاراردیم، تا کی باخاردیم نه ائتمک اولار. عوضینده اونون ایکی موقاوادان اولان چانتاسینی گؤتورودوم. یان قاپیدان ایچرییه گیریریک، بیر دقیقه باشماقلیغدا دایانیریق، سونرا اوچ پیله کنی قالخیب، آشپازخایا گیریریک، بیر نئچه جوت باشماقلارین یانیدان اؤتوروک. من آرخاسینجا گئدیرم، بوزارمیش ساچلارینا آرخادان باخیرام، بیر ده اوندان یاییلان فست فوت قوخوسونا دیقت ائدیرم.
میطباخدا، آستیرید سالومون بالیغی اوستونه أدویه سپیر. او باشینی قالدریب، یوخاری باخاندا کورینی گؤرور. کورین میطباخدا اولان لامپین ایشیغینا گؤره، بیر نئچه دقیقه دن قاباق داها پیس گؤرونور. آستیرید اؤنجه کورینه باخیر. سونرا دؤنوب منه باخیر، سونرا تکرار کورینه باخیر. اؤزونده گؤرونن باخیشلار ائله سرعتله دئییشیر کی، بیرینی گؤرمه دن او بیری یئرینی آلیر. اولی، چوخ گیجلنیر: قاشلاری چاتلاییر. او کیمدیر؟ سونرا گویا اونو یاخشی تانییر: آغزی آچیق قالیر، آنجاق،اوردادان هئچ بیر سؤز چیخمیر. دیلی ایله اوست دوداغینی یاشاردیر. سونرا اوندا مرحمت و یازی گلمه حیسی دوغولور، گؤزلریندن یاش آخیر. آردیندان شوک اولان کیمی اولور و ألینده لیمو ایله أللرینی گؤزلرینه ساری یاخیر. بیردن “اوخ” دئییر، آنجاق باشقا بیر شئی اؤز وئرمیر. یاناغیندا بیر آز أدوییه یاپیشمیش قالیر. سونرا حیرصدن منه ائله باخیر کی، گویا من بوتون بونلارین گوناهکارییام. آنجاق حیرص اؤزونده اوزون دایانمیر. اونون یئرینی ائله بیر باخیش آلیر کی، اونا بیر سؤز تاپا بیلمیرم. بو حالتی او آداملاردا گؤرورسن کی، بیردن بیره گؤزلنیلمز بیر شئیله قارشیلاشیرلار، چالیشیرلار هر شئیی اؤز آخارینا سالسینلار، آنجاق بونو باجارمیرلار. اویونجو آرتیسلر بئله باخیشی یامسییا بیلمزلر. او، یالنیز حقیقی یاشاییشدا یارانیلیر.
آروادیم، قاباقکی آروادیما ساری ائله داورانیر کی، اونو قوحاقلاماق ایسته ییر. من، اورادا دایانیب، باخیرام کی، گؤرسن اونلار قوجاقلاشاجاق. آنجاق، آستیرید یولون اورتاسیندا آیاق ساخلاییر.
ائله بو آندا لوسی قاجا-قاچا آشپازخانایا گلیر، بیر باشا بوز دولابینا ساری گئدیر کی، ایچمک اوچون بیر شئی گوتورسون. او دؤنوب، کورینه باخیر. ” سن داها کیمسن؟” تربیه سیزجه سینه سوروشور.
هئچ کیمین یادینا دوشمور، اونا جاواب وئرسین. بیردن بیره خیاباندا بیر ماشینین آلارمی سسلنیر، غریبه بیر ای ای ای ای ای سسی گلیر.
لوسی منه باخیر، سونرا آناسینا دؤنور، آخیردا کورینه باخیر. “بورادا نه باش وئریر؟”
“بو،” من دیله گلیب دئییرم، ” جئرمینین آناسیدیر، کوریندیر. او بیزی گؤرمک اوچون گلیبدیر.”
“سنی گورمکدن چوخ شادام.” کورین دئییر.”سن لوسی اولمالیسان. نقدر تمیز گؤرونورسن. هم ده کؤزلسن. آستیرید سن ده بئله سن.” گولومسه ییرک آروادیما دئییر.”ألبته، سن همیشه بئله اولموسان. خسته خانایا گؤره دیر. اورانی همیشه یاخشی تمیزله ییرلر.”
“آللاهیم، کورین، سنین باشینا نه گلیبدیر؟” آستیرید گؤزونو یوماراق سوروشور.
” من اؤلدوم،” کورین دئییر، ” سونرا بیر اوتوبوسا مینیب، برایا گلدیم.”
****
آستیرید منه دئییر کی، سنینله سؤزوم وار. بیز باشماغلیغا ائنیریک کی، مصلحتلشک. من پوست کارتیندان دانیشیرام، آستیرید ده آرادا باشینی ترپدیر. او، سینیرلیدیر کی، نییه من دئمیشم، او جئرمینین آناسیدیر. اونون بورادا اولماسیندا، هم ده اونا بو بارده خبرسیز اولدوغونا داها دا چوخ حیرصلیدیر، آمما حادثه لرین گئدیشینه گؤره منی موقتی ده اولسا باغیشلاییر. بئله قرارلاشیریق کی، کورین آشاغی مرتبه ده، زئرزمیده اولان بوگولن یاتاقدا یاتسین. اولا بیلسین کی، زئرزمینی نملی گؤروب، اوندا آلئرژی یارادا، آنجاق حیات بئله دیر. نمی آلان دستگاه نمی یاخشیلادار. سونرا آستیرید منه دئییر،” بیر ده بئله ایش گؤرمویه سن،” گویا کی، کورینین گلمه سی منیم ایدئیام ایدی.
“بو دفعه ده من بیر ایش گورمه میشم،” من دئییرم.
آشپازخانایا دؤننده، آنام اوتاغیندان آشاغی ائنیب، کورین ایله ائله دانیشیردی کی، دئیه سن کورین بیر نئچه گوندور کی، بیزدن آییریلیبدیر. آنام ایشلری هئچ ده تعجب یاراتمیر. ایکی نفرلیک باش-باشا وئریب، چوخ آیدین صوحبتلشیردیلر: هاوادان، پایلاشدیقلاری حکیم نسخه سیندن، و عادی سویوخلامانین (zinc lozenges) درمان یوللاریندان. آستیرید سالمون بالیغینا باش قویور. گؤره سن هامی اوچون کیفایت ائده جک؟ هن، اگر تیکه لری داها دا کیچیک ائله سه. لوسییه تاپیشیریرام کی، سوفره نی حاضیر ائتسین، چوخ سئوینیر کی، اونون دا باشی بیر ایش ایله قاتیشیر. اونا تاپیشیریرام کی، کورین اوچون ده بیر یئر آییرسین. کورینین ایکی کاغاز چانتاسینی گؤتوروب، پیلله لردن آشاغییا داشییرام. بوگولن یاتاغی آچیب، اورادا نم آلان دستگاهین یانیندا، کؤهنه ائشکافدا ساخلانیلان ملحفه ایله پتو گؤتوروب، اونا سریرم.
فیکریم جئرمینین یانیندادیر، پیله لردن یوخاری قالخیرام، میطباقدان گئچیب، قوناق اوتاغینا گیریب، اوردان اؤن حیطه گئدیرم. موبایلیمی آچیب، اونا تئلئفون ائدیرم. جواب وئرن کیمی، دئییرم،” تئز ائوه گل.”
” ائوین یاخینلیغیندایام. نه اولوبدور؟” او سوروشور.
” بیر ایش وار، سنه مربوطدور.ائوه گلنده دئیرم.” آنجاق بونو دئییرم.
****
چوخلاری باشا دوشمور کی، ماشین تعمیرگاهیندا بد خبرین قارشیسیندا، آدامین داورانیشیندا جوربجور علامتلری گؤرمک اولار. بعضی آداملار رواقی فلسفه سینی مشق ائدیرلر. آنجاق چوخ واختلار، بیرینه دئینده کی، اونون ماشینین برق ناقیللری قاپانیبدیر، و مین دولارا یاخین پول لازیمدیر، او حیرصلنیب، اؤز ماشینینا هجوم ائدیر. یا قیسمته قارشی. یا آللاها قارشی کی، نیه اونون ناقیلینی خاراب ائدیبدیر. یا دا منه قارشی کی، اونا پیس خبری چاتدیرمیشام. غضبلنمک آخماقلیقدیر. حیاتدا خیرخواهلیق یوخدور. بیزیم نه واریمیزدیر اونونلا ایداره ائتمه لیییک. من شیکایت ائتمیرم. منیم یوگونه قدر یاخشی حیاتیم اولوبدور. دبیرستانین فوتبال دسته سینده هجوچو ایدیم، و قیزلارین آردینجا دوشوب، و همیشه ماشینی سئویردیم. کورین ایله ائولنمکدن قاباق بیر آز شیلتاقلیغیم واریدی؛ بیر آز أخلاقسیرلیق، بیز آز سرخوشلوق. اؤز حددیمده قورص دا مصرف ائله دیم، نه اولسون؟ باشقا جوانلار کیمی، من ده دلی سوو ایدیم. بونو باش اوجالیغلا ئییه بیلرم کی، باشیم قیزیشاندادا، هئچ واخت دوستاق اولمادیم. دستلاریم منی قورویوردولار، بونا گؤره ده یاخشی جوانلیق ائتدیم. بونون اوچون سلامتلیقیم و عائله م اوچون شوکر ائدیرم. فوق دیپلومومو دا آلا بیلدیم. دئمک ایسته ییرم کی، هئچ ندن شیکایتیم یوخدور.
آمما، کورین منی آتیب گئدنده، اؤریمی سیندیردی، بونا گؤره ده حاضیر ایدیم کی، ایلر بویو اوندان کوسکون اولوم. گونو گوندن حیرص مندن دامجی دامجی آخیب گئتدی. ایندی أیر او بورادا قالماق ایسته سه، گرگ راضیلیق وئریم. او هرشئیی اودوزوبدور. بو قدر ساده دیر. بیز اینسانین چوکمه سینین قارشیسیندا بورجلویوق. اونون باشینا گلنلر منیم، یا هر کیمینین ده باشینا گله بیلر.
جئرمی ده، آمما، نه بیزیم حکمتیمیز، نه ده کاهلیلیغیمیز وار، و اونون ائوه گلمه یینی گؤزله یرک، اوره یم قفسده اولان دلی دووشانین اوره یی کیمی چیرپینیر. نهایت اونو گؤرورم کی، ائسکئیت بوردو ایله بلوکون تینیندن گلیر و موبایل تئلئفونو ایله دانیشیر.
مطبخه چاتاندا او فئرین یانیندا دایانمیشدی، قادینلارین هامیسی اونا باخیردی، آنجاق هئچ کیم دانیشمیردی. گینه، سکوت. اونلارا نه اولوبدور؟ اوندا دا کی، بیر شئی یوخدور قادینلار باش بئیین توکورلرآ آما جیدی بیر ایش باش وئرنده هامیسی دینمزسؤیلمز اولور.
” نه اولوبدور؟” او سوروشور. او کورینه باخیب، اونا ساری باشینی سالایاراق، دئییر “بو دا، کیمدیر؟” کورین بوزدولابینا یانینی وئریب، اورادا دایانمیشدی.
گینه سکوت هر یئری بورویور. هئچ کیم بوشقاب اوچون یئریندن ترپنمیر. بونا گؤره من دئییرم، ” بو کوریندیر. کورین بو دا جئرمیدیر.”
اونلا او قدر بیربیرینه اوخشاییرلار کی، اونو آنا بالادان باشقا بیر شئییه بنزتمک اولماز. جئرمی، اونا باخاراق بیردن بیره اؤز اوخشاریقلارینی باشا دوشور و توکلری اورپنیر.
اوتانجاق باخیشلا دئییر ” سالام.” اوآنلینین قیریشلارینی، صافالدیر و اونون اوزونه گولومسه ییر. کورین اونو قوجاقلایا بیلمیر. اونو اوپه بیلمیر. هله کی، یوخ. آنجاق یئرینده ساکیت دایانیر.
جئرمی اونا باخیر، سونرا آستیریده، سونرا دولورئسه و نهایت لوسییه گؤز کزدیریر. بونا گؤره ده لوسی دیل آچیر. “او سنین آناندیر.” او بونو ائله دئییر کی، ریپلینین بودور کی وار! موزه سیدیر.
جئرمی آستیریدی گؤستریر، ” او، منین آنامدیر.”
“دوغردور، هره میز بیر تهر،” کورین دئییر. “سن بئله دوشونمورسن؟” او، مکتب ایللرینین دانس قوناقلیقلاریندا اوتانجاق دایانان بیر قیزا اوخشاییردی کی، گؤزله ییردی بیر یاراشیقلی آدام گلیب اونو اؤزنه قایتارسین.
جئرمی دئییر، “جیدی دئمیرسن،”
“کوریننین حالی یاخشی اولانا قدر بیر مودت بیزیمله یاشایاجاق.” من دئییرم.
بو آندا جئرمی رنگی قیزارمیش کیمی، حیرصلی منه ساری دونوب دیله گلیر. “حالی یاخشی اولاناجان؟” او، ایسته ییر اوتاقدان چیخیب، گئتسین، بو آندا کورین اونون قولاغینا ایشاره ائدیر.
” سنین سیرقان وار،” او سوروشور. جئرمی باش ترپدیر، گؤرونور أل آیاغینی ایتیریر. سونرا او علاوه ائدیر، “من کیشیلرین بو داورانیشینا عادت ائده بیلمیرم. حتی یاشلی کیشیلرده. بیلیرم کی، بئله اولمالییام، هرکس کیمی، آمما ندنسه آلینمیر. عادت ائده بیلمیرم.” او، بو سؤزلرله چالیشیر، سوکوتا سون وئرسین. “هئچ کیم منه دئمهدی کی، سن بئله بیر گؤزل اوغلان اولموسان. من بیر آز گئری قالمیش آدامام. سن او سیرغالارلا غریبه گؤرونورسن.”
” کورین!” آنام، مطبخده دیوارا سویکنمیش حالدا اوجادان دئییر، “سن بو سؤزو دئمه، هئچ کیم بئله دئمیر.”
او، اوتاناجاق دئییر، “بئله دیر. ” هئچ کیم من دئیینلری دئمز. بو منیم سوقوطومو گؤستریر.”
“بیر شئی دئییل.” جئرمی دئییر. “آخی من عجیب غریب بیر آدامام. من باشدان آیاغا بیر قوللوقچویام. ایندی ده بو غریبه آدام یوخارییا گئدیر. خداحافیظ.”
او، های کوی یولا سالاراق بیزدن اوزاقلاشدی. بیر آز واخت وئریرم اوتاغیندا اوتوروب اؤزونه گلسین، سونرا دانیشماق اونون یانینا قالخیرام.
“هر حالدا،” لوسی دئییر، ” بئله لرینه گئی دئییرلر. عجیبه-غریبه بیریسی اولاندا ئوییه بیلرسن کی، عجیبسن.”
” اونلارین هامیسینین معناسی بیردیر، بئله دئییل می؟ او سؤزلرین هامیسی؟” کورین سوروشو، و چالیشیر اؤزو کولومسه لی گؤرونسون. آرزو ائدیرم، او، آرتیق دانیشماقدان أل چکسین.
” دئمک، ماراقلیسی بودور کی،” آستیرید بیردن بیره اؤزونو بیزه دؤندریب، دئییر،” نییه جئرمی گئی اولماغی بیلدیرمک ایسته ییر، حالبوکی هر شئی بونون ترسینی گؤستریر، کورین، بیلیرم کی، سن بونو بیلمزسن.”
” یوخ، بیلمیرم،” کورین جاوابیندا دئییر.
” آلیسا حاققیندا اونا دئه،” لوسی آناسینا دئییر. “بالا پرنسئس خانیمدان؟ جهرایی رنگلی جورابلاردان؟ مئدالیون؟ مرحمت کارخانه سی؟”
” یوخ، ائله صؤحبتلره گیریشمک لازیم دئییل،” آستیرید دئییر.
” یاخشی کی، قیزی بویلو ائله مهدی،” من علاوه ائدیرم، “یاردیم اوچون دئییرم. اونلار قوروجودان ایستیفاده ائتدیرلر.”
“ بو ایشی گؤره بیلردی،” لوسی غرورلا دئییر، “چالیشسایدی، اولاردی.”
” دخلی اولمایان صوحیتی باشلامیشیق،” آستیرید دئییر،”کورین، سن چوخ یورغون اولمالیسان. هامیمیز سنی گؤرمکدن تعجوبلنمیشیک، شک ائتمیرم کی، سن بونو بیلیرسن. بلکه سنه بیر ایستکان سو گتیریم. اومایا آج اولاسان؟ سوسوز، نئجه؟ سالمون بالیغیمیز، ایندی حاضیر اولار، اوندا هامیمیز أیلشیب اونو یئیه ریک. کاشکی بیزه بیر بالاجا سؤز گؤندرردین. بیز سنین خبرلرینه قولاق آساریق!” آستیرید چالیشیر گولومسه سین.
“منده هئچ بیر خبر یوخدور،” کورین دئییر، ” یانی، دئمک ایسته ییرم کی، هر شئی خبردیر، منیم اوچون هرشئی خبردیر. نه خبر دئییل کی،؟ بو تمیز، پاریلدایان مطبخ خبردیر! و لوسی: سن منه أن تازه خبرسن.” او، هامیمیزا گؤز گزدیریر، بیر بیر. ” آه، منه اؤره ییز یانمالیدیر،” او، دئییر، و سونرا آغلاماغا باشلاییر، و اوندا قادینلارین هامیسی اونا یاخینلاشیرلار.
****
یوخاریا گئدیب، جئرمینین قاپیسینی دویورم. او، دئمیر “گیرین،” من هرحالدا ایچری گیریرم. اوتاغیندان سیزه دانیشماغی بوراخیرام. او، یاتاغیندا اوزانیب، گؤزلری ده باغلیدیر. باشماقلارینی چیخاردیب، و یئکه آیاقلارینی یاتاغینین آخیرینه دایاییب، آغ جورابلار گئییب، أللرینی اؤزونه قویوب، گؤزلرینی گیزله دیبدیر. من تعجبلی درجه ده اوغلوما فخر ائدیرم. اونو چوخ سئویرم، آمما بونو گیزلتمه لییم.
“جئرمی،” دئییرم، “مومکونسه، آشاغییا ائنمه لیسن.”
“باجارمیرام.”
” نیه باجارمیسان؟”
“آخی، بو دوز دئییل. او، دوز دئمیر. یانی، او دلیلره اخشاییر. و من … گرگ اونو سئویم، یا بونون کیمی بیر شوی؟ چونکی، واختی ایله او منیم آنام ایدی؟ لعنته گلسین.”
“سنه بیر شئی دئمک ایسته ییرم،” من دئییرم، ” آما بیلمیرم، نه دئییم.”
“آتا، خواهیش ائدیرم. او عاقیللی شئیلردن أل چک، اولار؟ من عاقیلدان ایرنیرم. من او لعنته گلمیشدن ایرنیرم.”
“یاخشی،” دئییرم، ” سن خوشبختین بیریسن. منیم بئله بختیم اولماییبدیر.”
” یاخشی کی، بئله دیر. اولار می آییری شئیدن دانیشاق؟ یوخ، بیلیرم: بلکه هئچ دانیشمایاق.”
سونرا بیر-ایکی دقیقه دانیشمیریق. اوندا جئرمی دئییر، “بو چوخ دا پیس دئییل.”
“نه؟”
” آنانینگلمه سی و دلیلر کیمی داورانماسی. چوخ دا پیس اولمادی. دئمک ایسته ییرم کی، بیلیرسن نئجه من ایندی دونیا جغرافیاسی ایله ماراقلانیرام؟”
” هـه – هــن .”
” و، دونیا جغرافیاسیندا، مسئله بئله دئییل کی، اولگه لر هاردا یئرلشیرلر، بلکه آداملار اورالاردا نه ائدیرلر، سن کی بیلیرسن؟ دئمک، بیر اولگه نی، میثال اوچون پاراگوئه نی فرض ائدک. سن بیلیرسن پاراگوئه هارادا یئرلشیر، دوزنو سؤیله.”
باشیمی ترپدیرم. أصلینده بیلمیرم او، هاردا یئرلشیر. بولیوینین یاخینلیغیندا؟
“پس” – بورادا او آیاغا قالخیر، ” پس یاخشی. پاراگوئه، بو اولگه جنوبی آمئریکانین مرکزینده دیر، و اونلارین هامیسی دا ایسپان دیلینده دانیشمیر، بلکه سیوکس کیمی غریبه بیر هیندو دیلینده دانیشیرلار، جنوبی آمئریکادا بو ایستیثنادیر، آنجاق شرایطه گؤره اورانین وضعیتی ده همیشه خوش دئییل. بلکه، ایندی بیرآز خوش اولا. آمما بیزیم کیتابیمیز نه دئییر؟ دئییر کی، اورادا اونلار حئزبلری ایشکنجه آلتینا توتورلار. بیر دفعه. اورادا، ایشکنجه وئرنلر سرخوش اولاندا سایماغی اون بیره قدر آرتیریرلار. شیلیده ده بو ایشی گؤردولر. و آرژانتینده. آداملارین دیرناخلارینی چکیر، برقی شوک و بئله شئیلر. من بونلاری اوخوموشام. من بونلار حاققیندا بیلیرم . ایشکنجه. کوبا دا اولدوغو کیمی، اوروپانین اورتا چاغلاریندا؟ روسیه ده. اونلاری سنی مفتیلدن آسیب، سنی جیزلاییرلار. سنین ده بدنین الکتریک ماساسیندا رقص ائدیر. آجینین نهایتی. هن، بو ایشکنجه لر قارشیسیندا، بو کی، بیر شئی دئییل.” او، دوشیه سؤیگنیر. گؤزلرینی باغلاییر. ” منیم آنام بیردن تاپیلیر، او دا دلیسی؟ بو کی، بیر شئی دئییل. ایکشنجه تاختاسی دئییل .
منیم گؤزلریمه دیک باخیب، منه بئله کونفرانس وئریر.
من آشاغی ائنیب، بئش نفرلیک ناهاریمیزی یئییریک. جئرمی بیزه قاتیلمیر. آخشام یاتاقد اوزانیب، قارنلیغدا تاواندان ساللانان پنکه یه باخیرام کی، آستیرید ایله من راضیلاشیریق من کورینه بیر بابت ائو تاپیب، حالی اؤز یئرینه گلینجه اورادا توپلادیم.
****
جئرمی صاباح سحر ده قلیانالتی اوچون بیزه قاتیلمادی، پنجردن ائشییه باخاندا گؤردوم دوچرخه سی یئرینده دئییل. بو واخت منیم تعجب ائتدییم بیر حالدا کورین سحر ایشیغیندا تاپیلدی، و شکایت ائتمدن بیلدیردی کی، گئجه نی یاخشی یاتیبدیر. منیم أولکی آروادیم بوتون گونی نه ایش ایله مشغول اولاجاق؟ آنام دئییر کی؛ هله لیک او کورین گؤزموغایت اولاجاق. بلکه، یورومک اوچون گئتدیلر، و آنام مسیح حاققیندا دانیشاجاق کی، نئجه او گینه گلیب بیزی یولا گتیرجک. جئرمی ده کی، همیشه لیک بئله قالمایاجاق. لوسی منیم اوزومدن اؤپوب، مدرسه ماشینینا مینیر. گؤرونور او، باش وئرن أحوالاتدان تأثیر گؤتورمه ییبدیر، آنجاق اونون اوچون کی، کورین اونون آناسی دئییل، و او گؤزله ییر کی، هر شئی اؤز أوولکی یئرینه دؤنسون.
ناهاردان سونرا، ساعات دؤرده یاخین گاراژدا بیر موتور ناسوسونا سیفاریش حاضیرلایاندا جئرمی دوچرخه سی ایله ایچری گیریر. او یان-یؤریه باخیر و راضی بیر حالدا بورنونو چکیر. پارچالار بؤلومونده تورموز یاغ قوطوسونو آختاریز. ایشچیلرین یانیندا ایسته میرم منه بیر سؤز دئسین، بونون اوچون اؤزونه باخیب، گولمورم، آنجاق اونو گؤرمکدن سئوینیرم.
” سالام” دئییرم.
“سالام،” او جاواب قایتاریر. باشیندان کاسکئتینی گؤتورور و ساچلارینی تومارلاییر. آدامی هیجانا گتیرندیر: بونا گؤره ده قیزلار اونا عاشیق اولورلار.
ألیمده کی قلمی کنارا قویورام. ایکیمیز موشتریلر بؤلمه سینه گئچیریک، کونجده اولان ایکی پلاستیک صندلیده أیله شیریک، یانیمیزدا بیز میزین اوستونده کاسموپولیتن و فیلد اند استیریم ژورنالاری نؤمره لری سپلنیبدیر. جئرمی بیر آن منه گؤز تیکیر، ائله بیل اون سکیز ایل بوندان قاباق کورینی گؤروب، اونونلا سئویشیب ده اونو دونیایا گتیردییمیز اوچون من خاطا ائتمیشم.
“آتا، من گیج اولموشام،” او؛ دئییر،” اونون بورایا گلمه سی منی دوغرودان گیج ائدیبدیر.آنجاق بونو دئییه بیلیرم.”
“بیلیرم،” من دئییرم. “بو، هامیمیز اوچون چتیندیر.”
“او قدر کی، منه چتیندیر، سیزه بئله دئییل. من بوگون ائوه دؤنه بیلمییه جیم.”
“هارایا گده بیلرسن.”
“بیر یئر تاپارام،” او؛ دئییر. “دوستلاریمین یانینا.” دوغردور: اونون چوخ دوستلاری وار کی، اونلارین یانینا گئده بیلر. “دوغروسو، چوخ ایستردیم بورادان داشینام.” بیر آز گؤزله ییر. “آنجاق بو ایشی گؤرمه رم.”
“نه ائتمک ایسته ییرسن؟” سوروشورام. اونا نه عاقیل وئره بیلیرم، نه اوکؤت. یالنیز ماراغیم آرتیبدیر.
“بونون اوچون بوگون مدرسیه گئتدیم؟ آلیسانی تاپدیم. دئمک ایسته ییرم بیزیم کی، قورتاریبدیر، آنجاق هله ده، بیر تهر، دوستوق ائدیریک. بیلیرسن، آنام بیردن بیره تاپیلیر، او لعنته گلمیش، منه ده باخیب، دئییر من گئی ام، و آلیس ده دئییر، “واو،ائی آمما او سنین آناندیر و فیکیر ائدیر کی، سن چوخ یاراشیقلیسان و گئی دئییرسن”، و من گئدیرم، ” کیم آرانی پوخلاییر؟” و اودور، “سن گرگ،” من ده دئییرم،” آخی او، دلیدیر،” و بو واخت آلیسا لامپا گؤرونوشونو توتور و دئییر، “باخ، قوی هر شئیی سنین اوستونه ییخسنلار. بو، بئله سینه یاخشی اولار. “چونکی أیر سنین دوغما آنان بوقدر ماراق دوغان و عجیبدیر، هامی ایستر کی، اونو اوخوسون. مثلن: ” بئله فرض ائله، هامی دیققت، منیم آنام تاپیلیبدیر.”
منده بئله بیر حیس دوغولور کی، بو مسأله او و دوستلاری آراسینده بو نئچه ساعاتدا بویوک ایش اولوبدور و هامی اونون نه ائتمه یینه فیکیر اورتایا قویوبدور.
” داها؟” من سوروشورام.
” عجیبه اولماسی، بودور،” او، دئییر، ” منیم دوستلاریمین یاریسی سوروشولار کی، آنانین شخصی بلاگی وار یا یوخ. چونکی ایسته ییرلر اونا باش چکسینلر، لاپ ایندی.”
“بلکه، بلاگ مسأله سینده سن اونا یاردیم ائده سن،” من دئییرم، چالیشیرام توختاقلیق تاپیم. “بلکه، اونا یاردیم ائده سن بیر بلاگ یولا سالا.”
“هن، بو ایشی گؤره بیلرم. آمما،هله بیر نچه گون ده اونا قارشی نیفرت اتمه لییم.” او ساکیت اوتورور. “دوغرودان، هله بیر نچه گون ده اونا قارشی نیفرت اتمه لییم. باشا دوشورم کی، اونون باشینا هاوا گلیبدیر. بونو قاپدیم. آما اونا نیفرت ائتمه لییم کی، بیزه وفادار اولمادی.” او، بیزه سؤزونو ایشلتدی. نقدر ده من آستیریدی سئویرم، او دونن گئجه بو سؤزو ایشلتمه دی. هامیسی سن ایدی: سن بو ایشی گورمه لیسن، سن او ایشی گؤرمه لیسن.
****
نیفرت حیسی بیزیم گوُمانیمیزدان داها دا اوزون سوردو. بو مودتده بیز کورینی روحی خسته لیکلری حکیمینین یانینا آپاردیق کی، اونا لیتییوم تجویز ائله دی. اوللری بیر قدر گؤزه گؤرونن تأثیر گؤسترمدی.
کورین چالیشیر او آشاغیدا و ناهار واختلاریندا گؤزدن ایتسین. من بو ایشینه گؤره اونا کئرئدیت وئریرم. بیلیرم اونا چتیندیر، آخی، بیردن گؤرورسن ناهار واختیندا باشلاییر وحشی حئیوانلاردان دانیشماغا، اونلارین بیر بعضیسی ده خیالیدیر، هئچ کیم بوگونه قدر اوندان بیر سؤز دئمه ییبدیر. اونون بئنینده دایم قوردلار و لئمور میمونلاری جانلانیر، بوتون بو مودتده ده جئرمی میزینین باشیندا اؤز یئرینده تلاطومده دیر. او مئیلسیز کورینه گؤز تیکیر و یوخاری مرتبیه قاچماقدان و قاپینی مؤحکم باقلاماقدان قاباق خورکلرینی خوپلاییر.
اوچ هفته گئچیر، آرتیق ائوده آب-هاوا یاواش-یاواش دئییشیر، دئیه سن اوزون بیر قوراقلیغدان سونرا آز تضییقلی بیر هاوا سیستئمی گلیب چیخیبدیر. بیرگون آخشام اوستو پیله لردن یوخاری قالخاندا جئرمی و کورینی کؤرورم کی، طتیاره لرین ائنمه ییندن دانیشیرلار. ایکی گوندن سونرا اونو جئرمینین اوتاغیندا گؤرورم، اورادا کامپیوتئرین قاباغیندا اوتورموشدو و جئرمی ده آرخاسیندا دایانمیشدی، و ساکیتجه سینه اونا مصلحت وئریردی. سوروشمادان بیلیرم کی، نه باش وئریر، بونا گؤره ده لوسینین قاپیسینی تاقیلدادیب، اورایا گیریرم. لوسی ائوده نه باش وئرسه، هامیدان قاباق بیلیر. دوزدور کی، او دوعا ائتمه یی خوشلاییر، آنجاق اوندا سوییئت جاسوسلارینین أحوال روحیه سی وار.
” سالام، پرنسیس،” دئییرم. او یاتاقیندا اوزانیب، هری پاتئری اوخویور.
“سالام.” او، دئییر.
“هر شئی اؤز یئرینده دیر؟” سوروشورام.
“هن بئله.” او بیر قولونو چنه سینه دایاییب و باشینی یوخاری ساخلایبدیر. اوتاغینین دیوارلاریندا بیر نئچه اولدوزلارین شکیلی آسلانیبدیر و أطرافا دا چهرایی رنگده قیسا أتک گئیمیش خانیملار سپه لنیبدیر. اوتاغینین تاوانینا اولدوزلار یاپیشدیریلیبدیر، و اونون عومور بویو سئودییی اویونجاق- ائلنور، رفده پارلاق پلاستیک گؤزلری ایله اونا باخیر. لوسی منله دانیشا دانیشا اوخوماغینا داوام ائدیر.
“کورین و جئرمی آراسیندا نه باش وئریر؟ سن بیلیرسن می؟”
“گرگ اونلارین اؤزلریندن سوروشاسان.”
” بو ایش گؤره بیلمه رم.” من دئییرم.
“اوندا،” او، کیتابی کنارا آتیر و منه باخاراق دئییر، ” او کورینه قاچان آنالار ایله یاردیم ائدیر.” او، منیم داورانیشیمی گؤزلرییر، سونرا گؤرنده کی، مندن بیر حرکت یوخدور، او دئییر، “جئرمی، داها اوندان نیفرت ائتمیر. او بئله دوشونور کی، آناسی داها گئتمییه جک.”
” قاچان آنالار أحوالاتی ندیر؟”
” بو اونون بلاگیدیر،” لوسی دئییر، دیک اوتوروب آیاقلارینی اوزادیر. “جئرمی اونا یاردیم ائدیر. بو چوخ پاپولار اولاجاق. مدرسه لرینده هامی اونو اوخوماق ایسته ییرلر.”
” نه ؟ نیه؟”
” آتا، سن هئچ قاچماق فیکرینه دوشوبسن می؟”
“یوخ،” دئییرم، “هئچ واخت بئله فیکیر باشیمدا اولماییبدیر.”
” بو چوخ عجیبدیر.،” او، دئییر، “هامی بئله فیکره دوشوبدور.”
****
ایندی کورین شهرده یاشاییر، بیر تک اوتاقلی آپارتماندا. آنام جومه گونلری اورایا گئدیر و اونو ائنجیل کیلاسلارینا آپاریر. دؤولت کورینه علیل لیک آیلیغی وئریر، بیزیم قورخوموز بودور کی، بوگون صاباح بو آیلیغی کسرلر. او، هفته ده بیر ایکی دفعه بیزه گلیر، بیزده ناهار ائدیر. هامی اونا و هاواسینا هوی سالیبدیر، آنجاق آستیرید آرتیق سیگارا آلیشقان اولوبدور(دوزدور من چگندن دئییل) ناهاردان سونرا اؤن چمنلرین اوستونده چکیر، اورتا یاشدا اولان بیر قادین اوجون چوخ جسارتلیدیر.
بیر دؤنه من کورینین بلاگینا باش چکدیم. بیر ایکی گون بوندان قاباق قاچان آنالار صحیفه سینی آچیب، کورین یازانلارین هامیسینی اوخودوم.
حیاتین نئچه فصیللری وار؟ اونون بیر چوخ فصیللری وار، و بونا سیز اوندا دیقت ائدرسیز کی، یولجو قاتاری یالنیش سمتده حرکت ائتسین، اوندا اوقدر سرعتله ایره لی گئدیرسیز کی، صدمه گورمه دن اوندان ائنمک مومکون دئییل. من اؤزومو بو خصوصی ترندن دیشاری آتدیم، و ایللر بویو چوخ جیدی خسارت گؤردوم. کاش بیلردیم، آللاه بیزدن نه ایسته ییر. منجه، او آرتیق مندن بیر شئی گؤزله میر، آمما واختی ایله گؤزله ییردی، بونو اؤزو منه چاتدیریبدیر. بعضی واختلار قاچیرسیز کی، بیر شئیی آرخادا بوراخاسینیز، بعضن ده قاچیرسیز کی، بیر یئره چاتاسینیز. من ایکیسینی ده گؤردوم. یاخشی کی، سونوندا اؤزومو اؤلدورمه دیم. نهایت هیچ کیمی اؤلدورمه دیم.
بونلاری همان شئیلر ایدی کی، من اونون بلاگیندا اوخوماق ایسته ییردیم. ساکیتجه گاراژ یولا دوشدوم، بیر ماءالشعیر آچیب، بیر نئچه سیگار توستوله دیم. فیکیر منی بوروموشدو.
سکیز یاشیم اولاندا سورتمه م ایله شهرین بیر پارکینا گئتدیم. بو همان گون ایدی کی، برک قار یاغمیشدی، بیر نئچه اینچ، آنجاق اورایا چاتاناجان سوروشمه تپه سی بوشالمیشدی، یالنیز بیر نئچه اوشاق سورتمه و سوروشمه تاختالاری ایله اورادا قالمیشدیلار، هامیسی دا سئویندن قیشغیریق سالمیشدیلار. من تپه دن یوخاری قالخیب، اورادان آشاغی سوروشدوم، اوتوز دقیقه دن سونرا، من ده سئوینجدن قیشغیریردیم. او قدر اورادا قالدیم کی، آیاق بارماقلاریم دوندوُ، ائوه دوننده آنام منی وانین ایچینه تپدی. من او قدر سئوینیردیم کی، بارماقلاریمین دونماسی هئچ وئجیمه دئییلدی، آغریسی دا یوخ ایدی. یالنیز آجیشیردی. من اوگونلری هئچ یادیمدا ساخلامامیشام- سیز ده حتمن بئله شاد گونلرینیز خاطیرلامیرسیز- آمما من خاطیرلادیرام. بو چوخ گولوندور، شادلیقیق یاشانان حیسی. من سیگارئتمی قورتاریب و سیگار کؤتویونو، بوش آبجوقوطولاری ایله زیبیل قابینا آتیرام.
آستیریدین سسی قولاغیما چاتیر،. “وئس؟” او،دئییر. “وئس؟ هاراداسان؟”
” بورادایام،” گاراژدان باغیریرام.
“شکریم، بورا گلسن آ،” او، منه دئییر، “شان واختیدیر.”
آیاغا قالخیب ائوه گئچیرم، اورادا هامی منی گؤزله ییر.
سون
ایضاح:
آلتمیش بئش یاشیندا، حاضیردا مینئسوتا دانیشگاهیندا تدریس ائدن، چارلز باکستر آمئریکانین أن تانینمیش یازیچیلاریندا بیریدیر. او، بیرینجی ایشیق (۱۹۸۷)، کؤلگه اویونو (۱۹۹۳)، سئوگینین بایرامی (۲۰۰۰)، سائول و پاتسی (۲۰۰۳)، روح اوغروسو (۲۰۰۸) رومانلاری و دونیانین هارمونیاسی (۱۹۸۴)، ساغلام شبکه یولو یاله (۱۹۸۵)، گریفون (۱۹۸۵)، غریبه بیر قوهوم (۱۹۹۰)، اینانانلار (۱۹۹۷)، سنه بیر شئی دئمک ایسته‌ییرم (۲۰۱۵) کیچیک حئکایه توپولو و اوچ شعیر کیتابی – خیالی رسم أثرلری (۱۹۸۹)، جنوبی داکوتانین بلدچی کیتابی (۱۹۷۴)، بالاجا سوسمار (۱۹۷۰) مولیفیدیر. او، هم ده آمئریکانین National Book Awards أن یاخشی “کیچیک حئکایه” یازاری، میشیگان موللیفلر جایزه‌سی و بیر نئچه جایزه‌یه لایق گؤرونوبدور. اونون اوسلوبو گوندلیک حیات و اینسان پرابلئملریدیر. اونو اوخویارکن، أدبیاتین اصیل معناسی و ده‌ییرینی باشا دوشمک اولار. سیزه ترجومه اولان یازی اونون سون کیتابیندان سئچیلیبدیر.
There`s something I want you to do (short stories)
www.charlesbaxter.com