باشین ساغ اولسون آذربایجان!
آلدیغیمیز خبره گؤره، چوخ تاسفله گؤرکملی آذربایجان شاعری و چاغداش شعریمیزین اؤنجوللریندن اولان حمیدهخانیم رئیسزاده (سحر) سوئدین مالمو شهرینده ۷۴ یاشیدایکن وفات ائتمیشدیر.
«سحر» تخلصی ایله تانینان حمیده خانیم رئیسزاده ۱۳۳۱-جی ایل اردبیل شهرینده دونیایا گؤز آچیب، بو شهرده تحصیلینی اقتصاد رشتهسینده باشا ووراراق، دیپلم آلیب و چوخ گنج یاشلاریندا بو شهرده ده عائله قوروبدور.
انقلابین غلبهسی سحرخانیمین ایللرله باغلی قالمیش عصیانکار شعر دیلینین آچیلماسینا سبب اولور. چوخ آز بیر مدتده اؤز عصیانکار شعرلریله آذربایجان ادبی محیطینده مبارز بیر قادین شاعر کیمی تانینیر. شعرلرینده آزادلیق و صلحسئورلیگینی انقلابی بیر روحلا اوخوجولارینا چاتدیرماغا چالیشیر. او، چوخ آز مدتده مبارز شعریمیزین آتاسی کیمی تانینان اوستاد حبیب ساهرین شعر مکتبینین بایراقدارلاریندان بیرینه چئوریلیر.
سحرخانیمین ایلک شعرلری نئوکلاسیک مکتبی تمثیل ائتسه ده، چوخ کئچمهدن هم فورم، هم ده مضمون اعتباریله آذربایجان چاغداش شعرینه یؤنهلیر. جسارتله دئمک اولار کی، سحر خانیم اؤز شعرلریله ۶۰-نجی ایللر ایران آذربایجانی شعرینده اؤنجول و تاثیر باغیشلایان شاعرلر سیراسیندا یئر آلمیشدیر.
سحرخانیم ۸۰-جی ایللر آذربایجان کلاسیک شاعرلری اثرلرینین تدقیقی ایله مشغول اولور و یارادیجیلیق عؤمرونون بیر نئچه ایلینی «قوسی تبریزی»نین شعر دونیاسیندا کئچیریر. همن ایللرده اونون چوخ شعرلری عرفان و تصوف مئیللی اثرلره چئوریلیر.
نهایت سحر خانیم اؤلکهدن اوزاقلاردا یاشاماغا قرار وئریر و اؤزونو اوزون مدت آذربایجان شعری اجتماعیاتیندان کناردا ساخلاییر. اونون بو ایللرده یازیب یاراتدیغی اثرلریندن ادبی اجتماعیاتیمیز خبرسیز قالیر.
اتئشیتدیگیمیزه گوره، عؤمرونون سون ایللرینی خرچنگ خستهلیگی ایله مبارزهده کئچیرن شاعر، نهایت بو ایلین اردیبهشت آیینین سون گونلری غربت دیاریندا حیاتا گؤز یومور و اورادا دا تورپاغا تاپشیریلیر.
حمیده خانیم رئیسزادهدن ایندییه کیمی «ماویلر»، «یاشیل ماهنی»، «آیلی باخیش» و «بیر دسته تزه گونش» شعر مجموعهلری و «حکایت در» و «دیوان قوسی تبریزلی»نین تصحیحی کیتابلاری ایشیق اوزو گؤرموشدور.
آذربایجان ادبیات و اینجهصنعت سایتی- «ایشیق»- امکداشلاری آدیندان سئویلن شاعریمیز حمیدهخانیم رئیسزاده (سحر)ین ایتگیسینی آذربایجان خالقینا، شاعرین حؤرمتلی عائلهسینه، ادبی جمعیتیمیزه و اونون سئونلرینه باش ساغلیغی وئریب، خاطیرهسینی عزیزلهییریک. باشین ساغ اولسون آذربایجان!
ایشیق – آذربایجان ادبیات و اینجه صنعت سایتی
۰۴/۰۳/۱۴۰۵
