تورکیه‌نین گؤرکملی شاعر و ترجومه‌چیسی «ایلهان برک»ین (دوغوم ۱۸ نوامبر ۱۹۱۸ مانیسا، – اؤلوم ۲۸ اوت ۲۰۰۸) «لوگوس» آدلی اثری «شهرام گلکار»ین تشبثی ایله حاضیرلانیب، «پارلاق قلم» طرفیندن چاپ ائدیلدی. بو اثر شعر، شعر نظریه‌سی(پوئتیکا)، فلسفی و دیلچیلیک قیدلری کیمی ساحه‌لری احاطه ائدیر.
شهرام گلکارین حاضیرلادیغی بو کیتاب حاقیندا، «همت شهبازی»نین قیدینی تقدیم ائدیریک:
***
بو گون هامی نوبئل اؤدولو قازانمیش «آن کارسون»‌دان یازسالار دا من آنا دیلیمیزده چاپ اولان بیر کیتابدان یازاجاغام.
سئویملی دوستوم «شهرام گلکار» طرفیندن «ایلهان برک»‌ین «لوگوس» آدلی کیتابینی ایکی ساعات اؤنجه آلدیم. ایلک دئنه‌مه‌سینی اوخودوم. ائله اورداجا دایاندیم. حیس ائتدیم بیر شئیلر بو دئنه‌مه حاققیندا یازمالییام. تندیری ایستی-ایستی یاپماق گرک. هله‌لیک ایلک دئنه‌مه حاققیندا دویوملاریمی پایلاشیرام:
«ایلهان برک» ایلک دئنه‌مه‌سینده شعرله دوغرو (حقیقت) آراسینداکی ایلیشکینی اَن قدیم دؤورلردن باشلایاراق ارسطونون پوئتیکاسینداکی نظریه‌دن آرتور ریمبو و اوکتاویو پازا قدر قیسا شکیلده آراشدیریر. ارسطویا گؤره «شاعر دوغرودان اولان شئیی دئییل، اولا بیلَجَک اولانی آنلادیر». ارسطو، اولموش اولانی، یعنی باش وئرمیش حادیثه‌لری تاریخ آدلاندیریر. شعر ایسه مومکون اولان، باش وئره بیله‌جک اولان ساحه‌دیر.
ایلهان برک شعرله دوغرو آراسینداکی ایلیشکینی یوزارکن اونلارین نظری فیکیرلری آراسینا اؤز پوئتیک دویوملارینی و دوشونجه‌لرینی ده قاتیر. بو فیکیرلریندن بیرینده دئییر:
شعر، دووارچی‌نین الیندن دوشوردویو کَرپیجین یئره دوشمه‌سینده دئییل‌دیر/ هاوادا آسیلی قالماسیندادیر. معجزه‌ده‌یر دوغرودان دا، شعرله دوغرو آراسینداکی ایلیشکی نه‌ده‌دیر؟
بورادا ارسطونون «اولا بیله‌جک [مومکون اولان]» آنلاییشی اساس آچاردیر:
تاریخ «نه باش وئردی؟» دئییرسه، شعر «نه باش وئره بیلردی، نه باش وئره بیلر و انسان تجروبه‌سی باشقا نئجه گؤرونه بیلر؟» سوالینی وئریر. ایلهان برکین کَرپیچ استعاره‌سی ده بونو داها پوئتیک شکیلده ایفاده ائدیر: چونکی کرپیچین یئره دوشمه‌سی عادی حادیثه‌دیر، اونون هاوادا آسیلی قالماسی ایسه گئرچَکلیین عادی سبب-نتیجه (علت-معلول) قایداسینی بیر آنلیغا پوزاراق بیزه باشقا بیر حقیقَتی، یعنی معجزه، ایمکان و تصوّور حقیقتینی گؤستَریر. دئمه‌لی، شعرین دوغروسو فاکتین دوغروسو دئییل؛ شعرین دوغروسو مومکون اولانین، حیس ائدیلن و هله گئرچکلشمه‌ین آنلامین دوغروسودور.