مینسک شهرینین کاخووسکی خیابانیندا کیچیک بیر ائو.‏
‏”بیزیم ائوده ایکی کز موُحاریببه یاشاندی”،- قاپینی آچاندا، منه ‏دئییر. اولگا واسیلییئونا پادویشئنسکایا بالتیک دنیز قوه‌لرینین ‏ترکیبینده ساواشدا ایشتیراک ائتدی. پیاده قروپوندا ایسه أری ‏گروهبان سائول گئرنیخویچ موحاریبه ائتدی. ‏
سائول گئرنیخویچ ایله ایکیمیز عائله‌نین عکس آلبومونا باخیریق. ‏اولگا واسیلیئونا تلئفوندا قیزی ایله دانیشیر.‏
‏- گون اورتادان سونراکی دستورلاری وئریر،- سائول گئرنیخویچ ‏گولومسه‌ییر.‏
شوشه قاپیسیندان سسلری آیدین قولاغا چاتیر:‏
– اوسکورور؟ منیم یانیمدا اولاندا بوتون گونو بیر کز ده اولسا ‏اوسکورمدی. ایستی چای ایله بیر بالاجا موروق موربه‌سی وئر ‏ایچسین، بوغازینی دا منیم شالیم ایله ساری … ‏
ألبته، ننه‌نین شالی أن گوُونیلن درماندیر. ‏
‏- دوغرودان دا، بو منم؟- اولگا واسیلیئونا تئلئفون دانیشیغی باشا ‏چاتاندا، بیزه ساری گلیب، دنیز قووه‌لری پالتاریندا اولان عکسی ‏کی، اوستونده مدالار واریدی ألینه آلیب، دئییر.- نقدر بو عکسه ‏باخیرامسا ، بیر او قدر ده تعجوبلنیرم. سائول اونا نوه‌سینی ‏گؤستریر. اوندا بئش یاشدا ایدی. او، مندن سوروشاردی: ” دده، ‏سن ده اول اوشاق ایدین، هن؟ تصوور ائدیرسن می؟… – ‏آرخاسندان اونو غم بورویور. – گؤره‌سن، اوندا هیچ دوشونه ‏بیلردیک کی، یاشاییب نوه‌میزی ده گؤره‌جییک؟ هله گئچن ایل دده ‏و ننه‌میزلرین گؤروشونه ده گئده بیلدیک. بیر گورهان، دده – ننه ‏گؤروشونه… تصوور ائدیرسن می؟..‏
همیشه بو “تصوور ائدیرسن” آغزیندا ایدی. گؤرونور بو سؤزو ‏چوخ خوشلاییر. اونا باخاندا، سؤرعتلی بیر دوداق گولومسه‌سی ‏گؤستردی. دوغرودان دا ایسته‌ییرسن تصوور ائده‌سن، اوندا ‏نئجه گؤرونوردو؛ قیرخ بیرینجی ایلده… ‏
‏- اولگا واسیلییئونا ، سیز بیرباشا جبهه‌یه گئتدینیزمی؟ ‏
‏- یوخ، بیز اول شهری بوشالدیق. بوتون یول بویو بیزه قورشون ‏یاغدیردیلار، بومبالادیرلار، طیاره لر چوخ آشاغیدان اوچودولار. ‏یاخشی یادیمدادیر، نئجه واگونلاردان گنج جاوانلار دیشاری ‏سیچرادیلار، نرده لردن هوپاندیرلار؛ نئجه هامیسینین أینینده قارا ‏شینئللر واریدی. اونلارین نیشانلاری بئله ایدی! – هامیسینی گولـله ‌لدیلر، طیاره‌لر لاپ یئردن اوچوردولار… حیس اولونوردو گولــله ‌له‌ییب، سونرا دا ساییردیلار… تصوور ائدیرسن می؟ …‏
بیز کارخانادا ایشله‌ییردیک، اوراداجا ناهار-شام ائدیردیک، ‏دوُروُموموز پیس دئییلدی.. آمما اوره‌کدن غملی ایدیک… قیرخ ‏ایکینجی ایلین تیر آییندا ائحضارییه کاغاذینی آلدیم. بیز اوتوز قیز ‏ایدیق، اوستو آچیق تاختا بارژدا ‏ لادوگا چاییندان گوللـه آلتیندا ‏موُحاصیره‌لنمیش لنینگرادا گوندریلدیک. بیرینجی گون لنینگراددا- ‏یاخشی یادیمدادیر- (آغ گئجه‌لر)اوزون گئجه‌لر، دنیز قووه‌لری ‏سربازلاری، قارا پالتارلاردا گئدیردیلر. شراییط چوخ آغیر ایدی، ‏شهرده أهالیدن هئچ کیم گؤزه گؤرونموردو، آنجاق پروژکتورلار، ‏دنیز قوه‌لری قوشونلاری؛ داخیلی موحاریبه دؤورو کیمی، بئللرینده ‏کمرلر باغلانمیشدی، لاپ سینما کیمی ایدی. تصوور ائدیرسن می؟ ‏
شهرین أطرافینی هیس بوروموشدو، چوخ یاخین ایدی. اوچ نومره ‌لی تراموادا کیروف کارخاناسیناجان گئتمک اولوردو، اورادان ‏آرتیق جبهه باشلاییردی. هاوا صافلاشاندا توپ-گولـله یاغینتیسی ‏باشلاییردی. هم ده کی دقیق توشلامالارلا آتیلیردیلار، آتیلیردیلار، ‏آتیلیردیلار… کؤرپولرین یانیندا بؤیوک گمیلر دایانیردی، ‏اونلارینکی، هن ، ایستیتار اولونموشدولار، هرحالدا مغلوب ‏اولماغی نظرده توتوردولار. بیز توستو یارادان ایدیق – بیزیم دسته ‏خصوصی یارادیلمیشدی و بیزیم فرمانده‌یمیز گئچمیش توپاتان ‏أژدرلی گمیلرین فرماندهی کاپیتان آلکساندر نیکلایوویچ باگدانوف ‏ایدی. قیزلار أساسن اورتا سوییله‌لی تئکنیکی آموزش ‏گؤرموشدولر، یا دا کی، چوخو دانشگاهین بیرینجی کیلاسیندان ‏گلمیشدیلر. بیزیم وظیفه میز ایسه– گمیلری قوروماق، اونلاری ‏توستو ایله بورومک ایدی. گوللـه‌له‌مه باشلاییر، دنیزچیلر دئییرلر: ‏‏-“قیزلار بیزآزدان توستو یاراتماق واختی اولاجاق. چوخ ساکیتجه ‏ایشله‌یین”. خصوصی جیهازلارلا ماشیندا گئدیریک کی، ائله بو ‏آندا بومبا یاغدیران هوجوملو  طیاره‌لر‌لره راستلاشدیق. بیز، نئجه ‏دئییرلر، آتشی اؤزوموزه چاغیریریق. آلمانلار بو توستو پرده‌نین ‏آرخاسیندا ایدیلر. ‏
بیزیم یئمک-ایچمه‌ییمیز، بیلیرسیز دا، موحاصیره شرایطینده ایدی، ‏آنجاق کئچینیردیک… بیرینجیسی، بیز جاوان ایدیک، بو چوخ ‏اؤنملی ایدی، ایکینجیسی ده لنینگراد أهالیسیندن چوخ ‏تعجوبلنیردیک. بیزیم هرحالدا یئمییه بیر شئییمیز واریدی، آز دا ‏اولسا، آنجاق آداملار یول گئده-گئده آجلیغدان ییخیلیردیلار. بیزه بیر ‏نئچه اوشاق یاناشیب، بیز ده اونلارا کونسئرولریمیزدن یئدیرتدیک. ‏بونلار اوشاق دئییلدیلر، اونلار بالاجالانمیش یاشلی آداملار ایدیلر. ‏بیز اوزوموزو ساخلادیق. کیشیلرله چین-چیینه ایشله ییردیک. ‏قیشدا، لنینگراد شهری ایستیسیز قالاندا، بیزی شهر کناریندا اولان ‏بیر یئره آپاردیلار کی، اورادا اولان تاختا ائولرین قالاقلارینی بالتا ‏ایله سؤکک. أن چتین زامان ائوه یاخینلاشاندا اولدو … ائو یاخشی ‏حالدا ایدی، اورادا آداملاری ساییب، گئری دؤندوک، گرک اونو ‏سؤکردیک. یاریم ساعات هیچ کیمین ألی بالتایا گئتمیردی. هامی ‏دایانمیشدی. یالنیز فرمانده‌یمیز یاخینلاشیب، بالتاسینی قالدیراندا ، ‏بیز ده ییخماغا باشلادیق.‏
مئشه مشقی حاضیرلیغیندا، ایچینده حربی لوازیم اولان تاختا ‏صاندیقلاری سوروتله‌ییردیک. یادیمدادیر بیر صاندیغی تک باشیما ‏داشیییردیم کی، گوپولتو ایله ییخیلدیم… بیریسی بو، ایکینجیسی ده- ‏بیزه قادین اولاراق چوخ آغیر و چتین ایدی. مثلن، بئله دا. سونرا ‏من بؤلوک فرماندهی اولدوم. هامیسی دا گنج اوغلان ایدی. بیز ‏بوتون گونو گمی ده اولوردوق. گمی بالاجا ایدی، تووالئت ده یوخ ‏ایدی. اوشاقلارا لازیم اولاندا گمینین بؤرونه گئدیردیلر، بئله. ‏یاخشی، پس من نه ائدیم؟ بیر دفعه آخیراجان اؤزومو ساخلادیم، ‏سونرا گمی یانینا هوپپاندیم و سودا اوزدوم. اونلار قیشغیردیلار: ‏‏”رئیس، گمی آرخاسینا!” چکیب چیخاتدیلار. بئله ایبتیدایی خیردا ‏شئیلر واریدی. هله، سن اؤزون سیلاح دا داشیمالیسان؟ بو قادینلار ‏اوچون چوخ چتین ایدی. أووللر بیزه توفنگ وئردیلر، اونلار بیزدن ‏اؤزون ایدی. قیزلار گئدیردی، فشنگلر ده کی، یاریم مئترلیکده ‏باشیمیزین اوستوندن. تصوور ائدیرسن می؟ ‏
کیشیلره چوخ راحات ایدی، هر شئییه اؤیرشیردیلر. آنجاق بیز ‏داریخیردیق؛ ائو اوچون داریخیردیق، آنامیز اوچون، راحاتلیق ‏اوچون. بیزده بیر مسکووالی قیز واریدی، ناتاشا ژیلینا، اونا ‏‏”ایگیدلیک” مئدالی وئردیلر و هوسلندیرمک اوچون نئچه گون ائوه ‏گئتمکه ایجازه وئردیلر. او، دؤننده بیز اونو هر طرفدن اییله ‌ییردیک. دوغرودان دا، صفه دوروب، بیر-بیر اونو اییله ییردیک، ‏دئییردیک اوندان ائو اییسی گلیر. ائوه بئله هوسیمیز واریدی.‏
ایستیراحت واختی اولاندا اوتورودوق، شکلیل چکیردیک- بیر باش ‏یایلیغی. بیزه آیاق ساریغی ‏ وئریردیلر، بیز ده اوندان خیردا باش ‏یایلیغی دوزلدیب، باشا ساریردیق. باشیمیزی بیر قادین ایشی ایله ‏قاریشدیرماق ایسته‌ییردیک. یالنیز قادین اولماق بیزه بس دئییلدی. ‏داها صبریمیز توکنمیشدی. بیر باهانا آختاریردیق؛ ألیمیزه ایینه ‏توتاق، بیر شئی تیکک، بلکه بیر آن دا اولسا اؤزوموزون دوغرو ‏اوزونو گؤسترمک اوچون.  ‏
منه ائله گلیر کی، بیز موحاریبه ده داشلاشمیشدیق، هیچ کیمین اوزو ‏دوغرودان گولموردو، اورکدن سئوینمیردی. یوخ، بیز ألبته هردن ‏گولوردوک، آمما بو سئوینچ حیسی موحاریبه دن قاباق اولانلار ‏کیمی دئییلدی. و مادام کی، موحاریبه واریدی، نقدر آدام بئله بیر ‏دوروما دوشوردو، حالبوکی بئله اولمامالی ایدی. تصوور ائدیرسن ‏می؟ ‏
بو «تصوور ائدیرسن می» چوخ گؤزله‌نیلمز اولور. آمما ائله بو ‏منه خاطیرلادیر کی، من نه اوچون ایندی بورادا- بو ائوده‌یم. ضبط ‏صوت دستگاهیم سؤزلری یازدیریر، حیسی ده ضبط ائدیر، آنجاق ‏گؤزلری، اوزو، أللری ده «یازمالیدیر»؛ اونلارین حرکت و ‏قایغیلارینی و نئجه ده عکسده اولگا واسیلیئونایا، بو حساس قیزا ‏بولوزی و نوخودی رنگلی کراواتی یاراشیر. دویغولو سائول ‏گئنریخویچ، یاواش-یاواش سیغیشمایان ائنسیز صندلی سینده ‏ناراحات اولدوغو اوچون بالاجا مینیاتور صندلی یانیندا اولان ‏راحت موبلا کئچیر. صندلی هله ده بالاجا-اینجه ائوین آرواینا ‏بؤیوک گؤرونوردو. ایکیسینه باخاراق، اونا چوخ چتین و اینانیلماز ‏گلیر کی، بونلارین ایکیسی ده موحاریبه ده اولوبلار. ‏
آمما، اونلار دوغرودان دا موحاریبه ده اولموشدولار. ‏
– موحاریبه‌نی بئله باشا ووردوق، سائول گئنریخویچ دئییر، – ‏سیزین حقیقتن ایکی موحاریبه‌نیز اولوبدور… بیز تئزه تئزه بونو ‏باشا دوشوروک، او اؤز موحاریبه‌سینی ، من ده اؤزومکونو یادا ‏سالیریق. منه ده، او ، دئیین ائو أحوالات کیمی بیر شئی ‏اولموشدو، یا نئجه اونلار صفده دوزولمک و ائودن قاییدان قیزی ‏اییله‌مک. آمما ، من بئله‌سینی خاطیرلامیرام… هله او سیزه او ‏پاپاقسیز قیزلارین أحوالاتینی تعریف ائتمه ییب. اولگا ، نئجه اولدو ‏کی، سن بونو اونوتدون؟ ‏
‏- اونوتمادیم، – اولگا واسیلیئونا بیردن-بیره گوجلندی. – تعریفلمه‌سی چتیندیر… گئجه واختا قدر هجوم داوام ائتدی. سحر من ائشیگه ‏چیخدیم، مارسکوی کانالیندا پاپاقلار اوزوردو…گرگ بیزیمکیلر بیر ‏یئرلرده، نئوا چایینا آتیلمیش اولسونلار. من اورادا دورانا قدر، ائله ‏هئی پاپاق سودا اوزوردو.‏
‏- من اونون بیر چوخ حئکایتینی یادا سالدیم ، ایندی نئجه ‏دانیشیرامسا، اونلاری نوه‌لریمه “موختصر” ائدیرم. چوخ واختلار ‏اؤز أحوالاتیمی یوخ ، اونون موحاریبه‌سینی دانیشیرام. اونلار، من ‏بونو دیقت ائدیردیم، اونون ماجرالارینی داها ماراقلی گؤرورلر. ‏سائول گئرنیخویچ بوینونا آلیر. – منیمکیلر موحاریبه ده باش وئرن ‏همیشه‌گی أحوالات ایدی، اونونکولار ایسه حیس ایله دولو ایدی. ‏حیس همیشه داها تاثیرلی اولور. دئمک ایسته‌ییرم کی، من ده ‏موحاریبه ده بونلاری حیس ائتدیم. بیزیم ده پیاده دسته‌لریمیزده ‏قیزلار اولوردو. بیری ده بیزیم آرامیزدا تاپیلدی، بو چوخ أهمییتلی ‏ایدی ، بیز هئی بیر یئره توپلانیردیق. سیز بونو هیچ تصوور ائده ‏بیلمزسیز… – و بیر ده کی، – بیرسؤزده من ده اونا یاخینلاشدیم. آما ‏سیز تصوور ائده بیلمزسیز کی، موحاریبه ده قادینین اییسی، قادین ‏باخیشی نقدر خوشدور! ‏
مورحاریبه ده عشق ده واریدی؟ واریدی! او قادینلار کی، بیز ‏اورادا گؤروردوک، گؤزل قادینلار، صمیمی دوستلار ایدیلر. کیم ‏موحاریبه ده ائولنسه ایدی، اونلار دونیانین أن خوشبخت اینسانی ‏اولوردو، أن خوشبخت جوتو. بیز ده جبهه ده بیر-بیریمیزه عاشیق ‏اولوردوق. اینکار ائتمیرم کی، باشقالاری دا واریدی ، آخی ‏موحاریبه چوخ اوزون سوروردو و بیزیم ده ساییمیز چوخ ایدی. ‏آمما من داها چوخ آیدینلیق، تمیزلیک کؤروردوم… بونو ، نئجه ‏دئییلر، مطبوعات اوچون دئمیرم. گرگ اعتراف ائدک کی، أیر بئله ‏اولسا اوندا بیز اؤز-اؤزوموزله موحاریبه ائدیریک… بیزیم ‏قیزلارین هامیسینا بئله أحوالات قیسمت اولمادی. چوخلاری ‏اوغورسوز ائولنمیه اوغرادیلار. چونکی، اونلارین آنالاری، ‏موحاریبه ایشتیراکچیلاری کیمی اؤزلری جبهه‌لرده تربیت ‏اولموشدولار، او أحوال روحیه ایله. جبهه ده آدامی تئز تانیماق ‏اولار؛ آداملار نئجه اولا بیلرلر و اونلارین قیزلاری هیچ تصور ‏ائتمیرلر کی، حیات اونلارین ائولرینده اولدوغو کیمی دئییل. ‏اونلارا حیاتدا اولان آلچاقلیقدان دئمیرلر و اوندا بو قیزلار، أره ‏گئدنده فیریلداقچیلارین ألینه دوشورلر، اونلاری راحاتجا آلدادیرلار، ‏چونکی اونلاری آلداتماق اوجوز باشا گلیر. بیزیم جبهه ‏یولداشلاریمیزین چوخونون باشینا بئله أحوالات گلیبدیر. بیزیم ‏قیزیمیزا دا ، بئله…‏
‏- نییه بیز اوشاقلاریمیزا موحاریبه دن دانیشمیریق، – اولگا ‏واسیلیئونا فیکره دالیر. – من هیچ واخت تاختا آیاق قابی گئیمه‌دیم. ‏ائله واختلار اولدو کی، گئیدیم آمما سونرا دیواردان آسدیم. من ‏چؤرک کارخاناسینین مودیری وظیفه سینده ایشله دیم. بیر دفعه ‏جلسه یه گئدنده رئیس کی، او دا قادین ایدی ، منی او باشماقلاردا ‏گؤردو و هامینین یانیندا منه دئدی سن بو باشماقلاری منه ‏توشلاییرسان، باشیندا نه فیکیرلشیرسن. اونون سینه‌سینده أمک ‏مدالی واریدی، منیم سینه‌مده اولان موحاریبه مدالیندان دا هیچ ‏خوشو گلمیردی. بونا گؤره تک اولاندا من اونا دنیز قووه‌لریندن ‏دانیشدیم، اونا چوخ آغیر گلدی، بونا گؤره ده ایسته‌ییردیم مدالی ‏اؤزوومله داشییام. آنجاق ایندی داشیمیرام. دوزدور فخر ائدیرم کی، ‏موحاریبه ده ایشتیراک ائتمیشم و بو دا منیم ایشیمین نتیجه‌سیدیر. ‏آما موحاریبه‌دن سونرا جبهه‌دن دانیشیب، آدامی یوروردولار. ‏بیزیم نوه هر شئیی بیلیر، آخی او بونو ماراقلانیر، بیز ده اونا ‏دانیشیریق، اونون مکتبده اینشاسینین موضوسو بو ایدی. آمما ‏اوشاقلاریمیزا دانیشمادیق، اونلار دا بیزدن سوروشمادیلار…‏
بیز جبهه‌چیلر ژورنالیست وئرا تکاچئنکودان چوخ راضییق کی، ‏بیرینجی دفعه «پراودا » غزئتینده موحاریبه ده اولان قادینلار ‏مووضوعسونو قالدیردی؛ هانسیلار کی، تک-تنها قالیبلار و اؤز ‏حیاتلارینی قورا بیلمه‌دیلر و اونلارین هله ده قالماق اوچون بیر ‏ائولری یوخدور، بیز اونلارین قارشیسیندا گوناه حیسی ‏کئچیریریک. اوندان سونرا جبهه ده اولان قادینلارا بیر آز دیقت ‏چوخالدی. بئله قادینلارین قیرخ بئش یاشی اولاردی، اونلار عمومی ‏یاتاقخانالاردا یاشاییردیلار. اونلارا اؤزل آپارتمان وئردیلر. من قیز ‏دوستوم… آدینی چکمک ایسته‌میرم، بلکه اونا توخونا… اوچ دفعه ‏موحاریبه ده یارالاندی. موحاریبه باشا چاتدی، او طیب أنستیتوتونا ‏گئتدی. اونون هیچ بیر قوهومو قالمامیشدی، فلاکته دوشدو، یئر ‏تمیزله‌ییردی کی، قارنینی توخلادسین. اونون موحاریبه علیلی ‏اولماغی اوچون بوتون سندلری واریدی، آمما هیچ کیمه بونو ‏دئمزدی. من سوروشورام:”بس، سن نییه اونلاری جیردین؟” او ‏جاوابیمدا دئدی:” اوندا کیم منه أره گلردی؟” “نئجه یانی،” دئییرم،- ‏یاخشی ایش گؤردوم.” و او آغلادی:” ایندی او کاغاذلار چوخ ‏ایشیمه یاراردی. آجیم آغیردی…”‏
موحاریبه‌نین اوتوز بئشینجی ایل دؤنومونده سئواستوپول شهرینده ‏یوز نفر دنیز قوه‌لریندن دعوت ائتدیلر- بؤیوک وطن مورحاریبه ‏سینین قهرمانلارینی، اونلاردان اوچو قادین ایدی. اونلاردان بیری ‏من و ایکیسی بیزیم قیزدوستلاریمیزدان ایدی. بیزیم قوه ‏آدمیرالاریمیزین هامیسی اؤلموشدولر، بوتون خالق اؤز تشکورونو ‏گؤستردی و حؤرمت اوچون أللرینی قالدیردیلار. ‏
‏- نییه اوشاقلارینیزا موحاریبه دن دانیشمادینیز؟
اولگا واسیلیئونا دینمز قالیر. سائول گئرنیخویچ دانیشیر:‏
‏- بلکه بیز اوندا باشا دوشموردوک نه بؤیوک ایش گؤرموشوک. ‏ایللردن سونرا حیات بیزه کئچمیش آجیلارینی یئنیدن یادا سالدی. ‏بلکه اوندا موحاریبه چوخ یاخین و چوخ قورخولو گؤرونوردو. ‏اوشاقلاری بو قورخودان قوروماق ایسته‌ییردیک.‏
‏- اونودماق‌می ایسته‌دینیز؟
‏- ایسته سک ده، بو مومکون دئییلدی. منیم بیر باجیم وار. اونون ‏یئتمیش‌بئش یاشی وار، او دول قالدی. ایکی اوغلو دا موحاریبه دن ‏دؤنمه‌دیلر. بیری خومپاره ایله پارچالاندی، بیریندن ده آخیرینجی ‏مکتوب گلدی:”بیز، اوخویا-اوخویا جبهه‌یه گئدیریک. هر شئی ‏یاخشیدیر.” موحاریبه دن سونرا باجیم بیر گزارش آلدی کی، ‏اونون ایزی اتیب-باتیب، تاپا بیلمیریک. باجیم هیچ بیلمیر اوغلو ‏هارادا، هانسی سمتده ایتیب باتیبدیر. آرزو ائدیر کی، قبرینی ‏تاپسین؛ هله کی، نامعلوم سرباز قبرینین زیارتینه گئدیر. من اؤزوم ‏سرباز اولموشام، آمما اونو خاطیرلایاندا گؤزوم یاشاریر و سیز، ‏سیز دئییرسیز- اونودماق ایسته‌ییریک…‏
غلبه گونونده، اولگا، یادیندادیر قوجا-قوجا بیر آنانی گؤردوک کی، ‏چیینینلرینده بئله بیر پلاکات داشییردیلار:”توماس ولادیمیرویچ ‏گولنئوانی آختاریرام، ۱۹۴۲-نجی ایلدن خبرسیزم، لنینگراد ‏موحاصیرسینده ایتیب باتیبدیر. گؤر نئچه ایلدیر اونو آختاریر؟ من ‏اونون عکسینی هامییا گؤستریرم، بوگون بعضیلری دئییرلر مگر ‏نقدر موحاریبه دن دانیشماق اولار… سیز ده دئییرسیز- اونودماق ‏ایسته‌ییریک …‏
‏- من اونودماق ایسته‌ییردیم… من اونودماق ایسته‌ییرم…- یاواش- ‏یاواش، اؤز-اؤزومه میریلداییرام؛ اولگا واسیلیئونا دئییر.‏
‏- نقدر یوخوسوزلوق ، بیلیرسن –موحاریبه‌نی خاطیرلادیر… من ‏اونونلا موقایسه ده غلبه اوچون بیر ایش گوره بیلمه دیم، آخی من ‏کیشی ایدیم؛ بو منیم بورجوم ایدی. اونلار ایسه، قیز اوشاقلاری ‏ایدیلر کی، مجبور اولاراق ، موحاریبه‌نی دؤزمه‌لی ایدیلر. گرک ‏اونلاری أللریمیز اوستونده داشییاق. بونو هر بیر جبهه‌چی سیزه ‏دئییر. بیز مجبور ایدیک‌می قیزلاری موحاریبه‌یه گوندرک؟ ‏بیلمیرم… اونلار جبهه‌لره گئدیب، بؤیوک ایشلر گؤردولر. اونلار، ‏بیزیم کیمی، پوتون گئییب، اوستلرینه شینلر سالدیلار و قارلارین ‏اوستونده یاتدیلار. فیشنگ و خومپارا قلپه‌لریندن اؤلدولر. لنینگراد ‏خیابانیندا مایین دوققوزوندا، تکجه پالتاری اوستونده مئدال ساللانان ‏قادینی خاطیرلاییرام. اوستونده یازمیشدی –”شجاعتلیق اوچون”! و ‏نقدر او اوتانجاق یول گئدیردی. منده بئله بیر حیس واریدی کی، اونا ‏یاخینلاشیب، دئییم :” عزیزیم، سنه بو مئدالا گؤره بوتون یئر عالم ‏پرستیش ائتمه‌لیدیر…” بیز اونلارین قارشیسیندا بورجلویوق…‏
اونلار ایکیسی ده جبهه ده چکیلن شکیلر باره‌سینده منه خاطیره‌‏لریندن دانیشیرلار.