ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

updike-sized
والتر بريگس
جان آپدايك – چئويرن: فيرور رفاهي

بوستون‌دان ائوه قايـيداندا، جك ماشيني سوروردو. اؤنده كؤرپه اوغلو بير گري- گوت بئشييينده ياتميشدي، آرخادا ايسه كـئلئر ايكي ياشينداكي قـيزلارينا شعر اوخويوردو.

– ياي آچيلاندا قوش‌لار باشلاديلار..؟

– اويـناماغا- كؤرپه دئدي.

– بئله بير دادلي بوشقابي كيمين قاباغـينا قويماق اولماز؟

– سولتانـين!

– دوغرو دئدين.

– بورنو اوزون قوشون شعريني اوخو گؤروم.

– بورنو اوزون قوشون شعريني؟ من بورنو اوزون قوشون شعريني بيلميرم. سن بورنو اوزون قوشون شعريني اوخويوردون. او، نـئجه باشلانـير؟

– نئجه باشلانـير؟

– من سندن سوروشورام. كيم سنه بورنو اوزون قوشون شعريني اوخوياردي؟ ميس دوني بو ايشي گؤرمزمي‌دير؟

جو بو كؤهنه ظارافاتا گولدو ؛ «ميس دوني» سؤزو ائله بئله بير گون آغزيندان چيخميشدي. ايندي سوروشور: «ميس دوني كيم‌دير؟»

– من بيلميرم ميس دوني كيم‌دير. يالنـيز سن بيليرسن ميس دوني كيم‌دير. او، هاچان سنه بورنو اوزون قوشون شعريني اؤيره‌تدي.

قـيزجـيغاز شن بير سسله اوخوماغا باشلادي: «بورنو اوزون، بورنو اوزون تاق، تاق، تاق».

– نه گؤزه‌ل شعردير! كاش ميس دوني منه ده بو شعري اؤيره‌ديدي.

جك دئدي:

– بو قاراقوش شعري‌نين ايكينجي بندي‌دير. قاراقوش آشاغي ائـنيب بورنونو قاپدي.

كـئلئر پيچيلدادي:

– من ايندييه‌جن هئچ واخت بو شعري اونا اوخوماميشام.

– سن اونو بيليرسن. بو سنين قانـيندادير.

گلديكلري يول، بير اون دقيقه‌دن سونرا اللي كيلومتري آشاجاقدي. اوشاق ياتميشدي. كـئلئر اونون آغـيرلـيغي آلتـيندا بير آز اؤزونو يـئر به‌ يـئر ائله‌دي. سونرا، آنا دونوندان قادين دونونا كئچرك، انگيني جكين اوتوردوغو اوتوراجاغـين آرخاسينا، چييـني‌نين يانـينا دايايـيب، اونون ساغ بوينو طرفيندن نفسيني اؤتوردو.

– قوناقلـيق‌دا كيمدن داها چوخ خوشون گلدي؟- او سوروشدو.

– دوغروسو، هئچ بيلميرم. دئمك چتين‌دير. لانكموردان دئـيه بيله‌رم؛ آخي او شئرمان آدامز حاقـقـيندا دئديكلريمي باشا دوشدو.

– هامي سني باشا دوشدو؛ آنجاق اونلارين فيكرينجه سؤزلرين بير آز يونگول ايدي.

– هئچ ده بئله دئـييلدي.

– سنجه كيم داها ياخشي ايدي، لانكمور، يوخسا فاكسي؟ – او سوروشدو. بو، كيم ياخشي‌دي؟

اويونو اوزون واختي بيرگه سوووشدورماق اوچون، اونلارين نـئچه مئـتودلاريـندان بيري سايـيلـيردي. چوخ ضعيف اويون ايدي؛ اوندا، جكي هيجانا گتيرمك اوچون هئچ ابتدايي عنصورلر ده يوخ ايدي.

– منجه لانكمور- كـئلئر بير آز دوشونندن سونرا دئدي.

– يازيـق فاكسي، آرخادان پيچاقلا وورورسان. او نه قده‌ر سني سئوير.

– او چوخ مهربان‌دير آنجاق، منيم اوندان آجـيغـيم گلير. بئله، سنجه فاكسي ياخشي‌دير يا او اينجه چنه‌لي، يالواريش گؤزلو اوغلان؟

– يالواريش گوزلو ‌اوغلان- او همن جاواب وئردي.

– اه، هئچ ده جانا ياتان دئـييلدي. آدي نه ايدي؟

– كـئراولي؟ كـئر- كـئراكـئرز؟

– اونا اوخشار ايدي. گـئراهام كـئراكـئرز. يانـيندا اولان قـيزين آدي نه ايدي، او يـئكه قولاق‌لارلا نـئجه ده ايسته‌ملي ايدي؟

– يازيق قـيز، بيلميرم نييه دوشونوردو كي، او يـئكه قاراچي قـيزيل اوزوكلر اونا چوخ ياراشيرلار؟

– آنجاق قولاق‌لاريندان اوتانميردي، فخر ائديردي. دئـيير بس اونلار ياراشيـقلي‌دير. بئله‌دير- ايسته‌ملي قـيز ايدي. گؤره‌سن اونو بير داها گؤرمه‌يه‌جم.

– آديندا «و» واريدي.

– اورلاندو، اووووو- اورلاندو، كؤپوكه اوخشار ملكه.

– سن ده يوخ.

اوتوبان يولون قـيراغـيندا اوزاق‌دان گؤرونن ايشيق‌لار بير آغ هيرم ياراتميشدي؛ موتورون خورولتو سسي منظم دئـييلدي و هردن گازوئيل قوخوسو بيردن ماشينـين ايچينه هجوم ائديردي. ياناجاق پومپو، دوشوندو و گؤز قارشي‌سينا آتاسي‌نـين بؤيوك (مودئل‌لي) ماشينـيني خاطـيرلاتدي كي، ياناجاق اونون لوله‌سيندن توز كيمي ائشييه پوسكوروردو. اونون كؤهنه بؤيوكونون ياناجاغـينا هميشه زير- زيبيل قاريشيردي و ماشين يولدا هيقانـيردي. – بو ماشين ياواش- ياواش بيزه خرج آچاجاق- دئـييردي، آنجاق بير جاواب آلمازدي. آناسي ماشيني‌ساتماقدان خوشلانمـيردي. دوغرودور دؤرد ايل اولاردي كي، اونا صاحيب ايديلر، يـئنه ده اونون آچـيق گؤي رنگينه آلـيشماميشدي. او سرعت گؤستريجي‌سينه باخدي و دئدي: – ايييرمي اوچ مين كيلومـتر بيزه يول گئديب- سونرا علاوه ائـتدي:

– بورنو اوزون، بورنو اوزون تاق، تاق، تاق.

كـئلـئر فيكيرلشدييي شئـيه بيردن- بيره گولدو. – بيلديم. آروآيلنده اولان او كؤك كيشي كي، بوتون يايي آدادا قالـيب بيريج اويـنايـيردي و بالـيقچي‌لارين پاپاغـيني باشينا قوياردي، آدي نه ايدي؟

اري ده كيشي‌ني خاطـيرلاياراق گولدو. دوز بئش ايل بوندان قاباق، ائولنديكلري ايلك اوچ آيي نيوهمشايـير گؤلونون بير عاييله‌وي دوشرگه‌سينده واي.ام.سي.ا- دا كئچيرديلر. جك اوندا ثبت كارمندي ايدي و اونون گليني دوشرگه‌نين دوكانـيني ايداره ائديردي. «والتر» او چوخ اينام‌لا دئدي. سونرا ايكي هئجالي ايدي. او بوتون واختـيني كيشي چاديرلاري سيراسيندا بالـيق توتماق ايله مشغول ايدي. بيز اورايا گـئديب، اورادان دؤننده او، هله اورادا ايدي. يارديم اوچون دميرلرين باشيندان توتاردي. – كيشي حاقـقـيندا هر شئيي ياخشي خاطـيرلايـيردي: پيشييه اوخشار گولوشو، باشي‌نـين پئـيسرينده ساچ‌لاري‌نـين شيشمه‌سي، سسلي قارين آغري‌سي، اونون شوكولات بز‌كلي تي‌شئرتي و پارچادان تيكيلميش باشماق‌لاري.

– ميس يانگـين كيچيك آديني منه ديء- كـئلـئر دئدي.

سيغاري بير- بيري‌نين آرخاسيندان توستوله‌ين اردم‌سيز يانگ دوشرگه‌نين مسئولو ايدي. آروادي اينجه، قـيسا بويونلو، اوزون دؤرد بوجاغا اوخشايان، ياشيل قورخودوجو گؤزلري ايله بير چوخ «ياخشي» كيشي‌لرين قادين‌لاري كيمي آجـيديجي ديلي وار ايدي. بير دفه او، اوشاق‌لاري ايله اوردودا اولاندا مئـيلن‌دن جكه تـئلفون ائـتدي و جكين ايشي چوخ اولدوغو اوچون اونوتدو كي، دارتمونداكي اوغلانا بونو دئسين. آرواد بير ساعات‌دان سونرا تـئلفون ائديب، دئيـه‌ن‌ده كي، اونلار هله ده بو اونودولموش اوشاق‌لارلا مئيلن‌ده گؤزله‌ييرلر جك اونا تـئلفوندا جاواب وئردي – نه قورخولو!- (سوآلتي تـئلفون خطّي ايش‌دن چيخميشدي). اوندان سونرا بوتون يايي آروادي اونو – نه قورخولو- چاغـيريردي. ايش يـئرينه گيره‌ن كيمي دئـييردي: – هن، بيزيم ياخشي، نه قورخولو قوجا نـئجه‌دير؟ و جك قـيزاراردي.

– گـئورگـئن- او دئدي.

– ياخشي، بس اونلارين ايكي قـيزي- كـئلئر دئدي.

– بيري مافي ايدي، او، سؤز دينله‌ين ايدي و او بيري…

– بيليرم.

– گؤزله گؤروم. مافي- بونا هم قافيه ايدي. مافي و تافي.

– اودري. اونون قاباق ديش‌لري يـئكه و ايتيجي ايدي.

– چوخ ياخشي. ايندي گل او كؤك كيشي حاقـقـيندا دوشونك. او، «ب» ايله باشلانـيردي. بئينس، بادس، بايرون. اونلار بيرگه دئـييليردي، بونا گؤره اونو بير آد كيمي خاطـيرلاميرسان. والتر بوه. بوه! آدامي حيرصلنديرمير؟

– بايرون اونا ياخـين‌دير. ياديندادير نه قده‌ر او، شافلبورد اويونوندا اوستا ايدي و ‌هر آخشام بو اويونا ياريش تشكيل ائديردي؟

– گئجه‌لر سالوندا پاسور اويـنايـيردي. قهوه‌يي رنگيلي، بوكولن، دمير صندلي اوستونده اوتورماسي ائله بيل لاپ گؤزومون قاباغـيندادير.

– او، ايلين قالان چاغ‌لاريني فلوريدادا ياشايـير؟ كـئلـئر، فيكيرلشنده كي، بوتون ايل بويو واخـتـيني استراحت يـئرلرينده كـئچيردير، گولومسه‌دي، نييه كي، اگر ايسته سن بئله بير تنبل آدامي تصوّور ائده‌سن، او آدام والتردن باشقا كيم اولا بيلردي؟

جك قلبه چالميش بير آدام كيمي دئدي:

– او، قارماق وزنه‌سي‌نين جيهازلاريـني ساتـيردي. بازنشسته ايدي. – آنجاق بو خياوان‌ دا باشقالاري كيمي اونون آدي گيزلنميش مقدس يـئرينه چاتميردي. – من ايش‌لريني خاطـيرلاييرام، آنجاق آدلاريني يوخ- او دئدي. يالنـيز ايسته‌ييردي بير شئي دئسين، چونكي حيس ائديردي آروادي اونو قاباقلايـير و بو اويوندا اوندان ايره‌لي گئدير. – گر‌ك كي، هامي‌سيني ياخشي خاطـيرلايـيم- او دئدي، – هامي‌سي‌نـين آديني پاسورلارين آرخاسيندا يازميشام.

– سؤزسوز يازميسان. او قـيز كي، آدادا هامي‌يا داش آتـيردي، ائله بونا گؤره ده آداني ترك ائـتمه‌لي اولدو، كيم ايدي؟

– واي آللاه! باشي ايشله‌ميردي و ‌نـئجه ده گؤزه‌ل ايدي. چوخ آز دانـيشيردي.

– آغاج‌لارين آلتـيندا گيزلنيب دايانـيردي.

– آتونن، نه قده‌ر يانگ اونا اوره‌يي يانـيردي! او، آيريجا موضوع كي، هميشه قاطار ايله آدايا گليب و دئـييردي كي، قارداشي ائسپيرينك‌فيلدده پولونو وئره‌جك و يانگ دا بو مخصوص كـئره‌ديتي قبول ائديب و سانـيردي كي، هر شئي اونون‌چوندور.

– او شاهماتي چوخ سئويردي. چئكر اويونچولاري. ظنّيمجه سن چالـيشيردين اونا شاهماتي اؤيره‌ده‌سن.

– هر نه‌يي كي، سن تاختا اوزه‌رينده گؤستريردين دئـيير، نه ياخشي، يا دا، سن چوخ هوشلو- باشلي‌سان.

– سن هر نه دئـييردين همين سني باشا دوشوب و هيستـريك گولوردو. اؤزو ده اوجادان. او، بيزي سئويردي چونكي بيز اونا قارشي چوخ مهربان ايديك.

– روبئرت.

– روي، جانـيم؛ نـئجه اولار سن رويو اونوداسان؟ بير ده پئك گـئريئس واريدي.

– پئك، گـئريئس. او يـئكه گؤزلريله.

– و او اوزون بورون كي، بورون دئشيك‌لري ايت بالـيغـينا اوخشايـيردي. – كـئلـئر دئدي. ايندي، اونون شيرين اوزلو اوغلان دوستونون آديني ديء.

– ساريشـين، پاريلدايان ساچ ايله. لورد، بلكه آديني ياخشي يادا سالا بيلمه‌ييم. او، آنجاق بير هفته اورادا قالدي.

– من اونون يالنـيز گول‌دن چيممكدن گلمه‌سيني خاطيرلايـيرام. اورون آغ بدني‌ني و خـيردا قارا اوزمك گـئـييميني. چوخ سئكسي ايدي. اوف.

– چوخ آغ ايدي. آنجاق جاناياتان ايدي. ياخشي‌ ياددا قالان‌دير. جك اعـتناسيز دئدي: من هامي‌سيني بينديم، بير او قـيوريم ساچلي آلماندان باشقا. آپبازخانا گده‌سي. دئـييردي بس چوخ آغـيل‌لي‌دير. چنه‌سي جوجه‌يه اوخشايـيردي.

– او منه چوخ گؤز يـئتيردييينه گؤره سن اونو خوشلاميردين.

– ائله‌مي‌دير؟ ياخشي فيكيرلشنده گؤرورم ائله ايدي. مني اويوندا يامان اوددوغونا گؤره اوندان زهلم گئدير. سونراكي، او پرولي اونو اوددو، اوره‌ييم ياخشي ساكيت‌لشدي، سئوينديم.

– ائسكوبار.

– آديني بيليرم. او ائله هميشه چالـيشيردي باشي ايله بسكـئـت‌بول اويناسين.

– بير ده باربارا؛ او‌شوشكه، بوشانميش كيشي.

– والتر باربارا. والتر، با، به، بو، بي، بؤ. يايـين سونوندا خرج‌لري اوچون اوزون بير حاق- حـساب اونا وئرديلر.

كـئلـئر آرتـيق او گؤي كيشي‌ني گؤزله‌ميردي. او، تـئز- تـئز ايره‌لي‌يه قاچـيردي و او اوزون تورانلي خاطيره‌لرين تجروبه‌سينده، بويالاردا ايزلر آختاريردي؛ ايتاليالي عاييله‌ني و اونلارين بوش پيوه قوتولاريني، اوزون بويلو قولاغي آغـير كيشي‌ني كي، آياق‌يالـين آياق‌لاري بير گؤتك آغاج‌دان يارالانميشدي. اود قالاق‌لاريني كي، آوگوست ياغـيشي سؤندوردو، آدادا بو گونه قده‌ر گؤرمه‌ميش مارالي. ماراللار قـيش‌دا شاختادا بورايا گليب و باهار اونلاري اورادا اسلاتدي. بونلار كيشي‌ني پاخـيللاديردي- آروادين جور به جور آنـيت‌لاري و خاطيره‌لري. آرواد قوملاقدا «بئريل- بئريل» چاغـيريشي و ‌دادلي دوندورمالارلا اوشاق‌لار كي، موراي گميسي‌نين قوللوقچولاري اونلارا بخش ائديرديلر. آنجاق قادين ائله سرعتله بو آنـيت‌لاردا سئـير ائديردي كي، او ائپيزود باشي تـئز- تـئز گولوب، هردن ده قاه- قاه چكيردي. آخي اونلار بو آنلاري بيرگه ياشاميشديلار و او فرح‌لنيردي كي، ياخشي بئله بير اويونا باشلايـيب‌لار و بيلميردي كي، بوندان باشقا آيري بير اويون نئجه اولا بيلردي. اونلار تانـيش بير يولا چـيخديلار و آنلاري قـيسالتماق اوچون ياخشي سوروجولوك ائـتميشدي.

ائوده اوشاق‌لاري ياتاق‌لارينا داشيديلار – كـئلـئر اينجه كاغـيذ كيمي خـيردا كؤرپه‌ني و جك آغـير، اتلي قـيزي. قـيزي ياتاغا اوزادان كيمي او، قارانلـيقدا بير آن گؤزلريني آچدي.

– ائوده‌ييك- او قـيز دئدي.

– ويزادرت پالچـيق‌لاري؟ ائولري‌نين ياخـين‌لـيغـيندا يـئـني بير يول سالـينـيزدي و قـيز چوخ خوشلانـيردي كي، تورپاغـين يـئر به يـئر اولماسيني گؤرسون.

– پالچـيغا سحرده- جك دئدي و جو بونا راضي قالدي.

آشاغي‌دا ايكي ياشلي آدام بوزدولابدان جينجر چيخارديب و يـئرلي تـئلـئويزيوندا گـئجه ياريسي خبرلريني سئـير ائـتمه‌يه باشلاديلار. فرماندار بوركولو و كـئشيش كوشين خروشچوو و ناصير قاريشميشدي. بونا گؤره اونلار دا اوشاق‌لار اونلاري سحر تـئزدن اويانديراجاغي اوچون ياتماغا گـئـتديلر. كـئلـئر ياتاغا گيرمه‌ميش ياتدي. آخي بوتون گونو اونلاري ايـلنديرميشدي.

جكه ائله گليردي كي، او اؤزونو ياخشي گؤستره بيلمه‌ميشدي. كـئچميش گونلر قادينا داها پارلاق گؤرونوردو و گؤرونوردو كي، اونون اوچون اونلار داها ديرلي ايدي. قادينـين خاطـيرلاديغي بير شئي اونو يامان اينجيديردي. آلمانلي اوغلانـين اونا گؤز يـئـتيرمه‌سي. بو دا سبب اولدو كي، او ياواش- ياواش آرواديني يادا سالسين؛ اونون ياشـيل پالتار و قهوه رنگينده باجاق‌لاري و ال- اله اوتاق‌لاريـندان چـيخـيب اوزون توز- تورپاقلي دار يولدا سحر يـئمه‌يينه گـئـتمك‌لري. جيب ماشينـين تكرلري‌نين ايزلري هله يـئرده قالميشدي. كـئلـئر ده قولاغي آغـير كيشي كيمي آياق يالـين ماشين ايزلري‌نين اوستوندن آدديم‌لايـيردي. ال‌لري، بويو آلچاق گؤرونوردو و يوروشو اونا چوخ قريبه گليردي. قادين هميشه يـئمك اوچون اوزاق‌دان چالـينان زنگ سسيني ائشيديردي. اونلارين قالديغي اوتاق هر شئي‌دن اوزاق ايدي و يـئگانه ايشيق‌لاري شمع ايشيغي ايدي. هر گون‌اورتادان سونرا (بازار ائرته‌سيندن باشقا كي، كيشي اؤز توپ يولداش‌لاري ايله اويـنايـيردي) ناهار و آخشام يـئمك‌لري آراسيندا، ايچري‌ده آرواد يـئرلريني حاضيرلاياندا، او تاختا صندلي‌سينده اوتوروب و آلا توراندا دون‌كيشوتي اوخوياردي و سئپتامبر آيـيندا، اوندا كي، سانچو اؤز سروري ايله اؤلوم يوخوسوندان قالخـيب دولسييانـين بو گؤزه‌ل، نجابت‌لي خانـيمين آرخاسيندا گـئـتمه‌لي ايديلر، او يامان آغلادي. اونلارين قالديقلاري اوتاق‌لارين اطرافـيني دهشتلي رقابت موباريزه‌سي بوروموشدو. اونا ائله گليردي كي، اوتاق‌لارين پنجره‌سي يوخدور. تاخچانـين اؤنونده، كول جوسون ايچينده دايانميشدي و بيردن- بيره گؤزله‌نيلمه‌دن ايسته‌دييي شئـيي تاپدي. او، يـئرينده ديك اوتوردو و دئدي: – كـئلـئر- و اونو اوياتماق ايسته‌مه‌دييي اوچون آستاجا دئدي: – بريگس، والتر بريگس.

(سون)

………………………..

 ایضاح: جان آپدايك 1931-نجي ايل‌ده پئنسيلوانيا شهرينده آنادان اولموشدور. اونون آتاسي رياضيات معليمي و آناسي حئكايه و ‌رومان يازيچي‌سي ايدي. آپدايك 1954-نجي ايل‌ده هاروارد دانيشگاهـيني قورتاريب‌دير. او، آمئريكانـين ايييرمينجي عصير ادبياتي‌نـين ان مشهور يازيچي‌لاريندان بيري سايـيلير. بو گونه قده‌ر اوچ دفه پولييـئـتزئر جايزه‌سيني قازانميش آپدايك فـيرانسا، ايتاليا و بير نـئچه آوروپا اؤلكه‌لري‌نين ده اؤدول‌لرينه صاحيب اولا بيلميشدير. اونون اللي‌دن چوخ اثري وار كي، بير نـئچه‌سي‌نين اساسيندا فيليم‌لرده چكيليب‌دير. آپدايك- ين اثرلري اساسن عاييله و كيشي- قادين موناسيبت‌لري‌نين پئسيكولوژيياسينا حصر اولونور. اونون شخصييت‌لري ساده آمئريكالي عاييله عضولري‌ديرلر. 2004-نجي ايل‌ده تكرار پولييـئـتزئر موكافاتـينا لايـيق گؤرونن آپدايك، 2009ینجی ایلده سرطان خسته‌لیگیندن وفات ائتمیشدیر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *