اؤزو قاینانا اولموشدو. گلینی واریدی،گونده بیر تویوق کسدیریردی. تویوغو جیلق ائله‌ییب، هرگونه تای جییار، اوره‌یینی، داشلیغینی آییریب گلینه وئردی:- «آپار تاولا یئ!» دئییب، کؤورلدی.گؤزلریندن یاش دیغیرلاناراق حیطده دنله‌نن تویوغا باخیردی. دیشلرینی قیجیدیردی. گؤزلرینی قوللاریلا سیلیب، – «چوخ تکبرلو خانیم ایدی، غرورو یئره گؤیه سیغمیردی رحمتلیگین. قاینانامی دئییرم» دئییب، آرتیردی: «بیر گون بیر کاسا شیرتیق شوربا یئدییم اوچون اؤلونجه منی دیندیرمه‌دی»
بیر آه چکیب آنلینین ترینی سیلیب باشلادی تعریفله‌مه‌یه.
«اریم عسگریدی، اؤزوم ده ایلک یئرییم‌ایدی. قایناناملا بیر اوتاقدا قالیردیق. قاینیم‌گیل ایله بیر حیطده. حیطده دنله‌نن بیر آلا قیرمیزی تویوق اوره‌گیمی آپارمیشدی. «جییارینی چیخاریب یئسم»، دیشلریمی قیجیردیب دئدیم. قاینیم خانیمی بالاخانادان اوخویا- اوخویا جیز‌بیز شام قویاراق «آی قیز ندی؟ آغزی پیسه اوخشاییرسان؟» دئدی. سوغان داغین اییسی تویوق اتیله اوره‌ییمی آپاریردی. قارنیم قورقورا دوشموشدو. قاینانام ایری-ایری منه باخیب، -«کسدیکلری تویوقدان بیر زاد وئرمه‌دیلر شام بیشیرمه‌یه؟» دئدی. – «یوخ نه ویجلرینه». یاشماغیمی آغزیما چکیب میزیلدادیم. باشینی پنجره‌نین کونجونه قویوب گؤزونو یومدو. قاش قارالیردی. قاینیم خانیمی اوشاقلارینی باشینا ییغیب دئییب گوله-گوله شام یئمه‌یه باشلادیلار. قاینیم هله چؤلدن گلیب چیخمامیشدی. هاندان هانا قاینیم چؤلدن گلدی. – «آنام‌لا گلینین شامینی وئریبسن؟» دئیه، اوزونو بالاخانایا دوتدو. -«یوخ، میراتا قالمیش فنار سونموشدو وئره بیلمه‌دیم. فناری توت، آپاریم» قاینیم خانیمی جواب وئردی. فنار قاینیمین الینده، قاینیم خانیمی الینده بیر کاسا پنجره‌یه ساری گلدی. کاسانی پنجره‌یه قویدو. قاینانام مورگولو- مورگولو کاسایا باخدی. یاری یاریمچیق یاغسیز شوربا، ایچینده بیر پارچا قرتوپو، دؤره‌سینده ایکی بادیمجان قاخی اویان بویانا قاچیردی. ناهاردا گتیردیگی شوربایا اوخشاییردی. قاینانام گؤزو کاسایا ساتاشدیقدا، کاسانی گؤتوروب حیطه چیرپدی. الیمی آتیردیم توتام، توتانمادیم. قاینیم -«حققیزدی آجیزدان تورپاق یالایاسیز. جاد چؤره‌گینه ده تامارزی قالارسیز دؤزون! خالق آجیندان اؤلور، سیز ده شیللاق آتیرسیز؛ ات شورباسینا اللو دئییرسیز» دئدی. قاینیم خانیمی قاشلارینی دارتا-دارتا، گولومسه‌ییب، کاسانی یئردن گؤتوروب بالاخانایا ساری دؤندو. قاینانام پنجره‌نی اؤرتوب لامپانی سؤندوردو.
تویوغو قول- بود ائله‌یرک، الینین دالیلا بورنونو سیلیب آرتیردی. «قاینانام چوخ تمیز، آبیرلی خانیم‌ایدی. هر غذانی بینمزدی.
آجلیق ایللری ایدی. قاینیم‌گیل جیره‌میزی وئرمزدیلر اؤزوموز بیشیرک. بو دا اونلار بیشیرن یئمه‌یی بینمیردی. هرگون گؤزده- قولاقدایدیم. قاینیم خانیمی کاسا الینده گلنده، سسسیز قاپییا چیخیردیم. قاینیم خانیمی گتیرنی گیزلی یئییردیم. قاپینین ایچری اوزونده کاسانین یاغسیز سویوق قازان دیبی شورباسینی باشیما چکدیم. بیر پارچا قرتوپو واریدی. ساخلادیم. «قونشو وئرن کوت‌ایله یئیه‌رم»- دئدیم. دالیما قیسدیریب تاباغا قویماق ایسته‌ییردیم، الیمده گؤردو. ایکی اللی باشیما بوغما سالدی. اوزونو دؤندریب گئتدی. اون گون دیلینه تاروقوتو وورمادی. اوزو قویلا دوشدو. منی دیندیرمه‌دی.
بان خوروزو بانلاییردی بیر آخ سسینه آییلدیم. لامپانی یاندیردیم. گؤزلری نیفییه دیرنمیشدی. قول- قیچی بوم بوزویدو. اووجوندا بیر تیکه پیریش واریدی.
رحمتلیکدن سونرا بوغماسی باشیمدا آغیرلیک ائدیردی.
قاینیم خانیمی گتیرن سویوق یاغسیز شوربالاری دالیجا حیطه چیرپیردیم. قارنیمی آویشلاییردیم. پیشیک کیمی موولداییردیم. او یئمه‌یه راضیلاشمیردیم.
قونشویا او پیریش تیکه‌سینی وئردیم. ایکی تویوق بیر خوروز آلدیم. تویوقلار هر گون یومورتلاییردی. بیر گون بیر تویوق گلمه‌دی؛ ها بوردا ها اوردا، تاپانمادیم. بیر آی سونرا یانی بالالی دوققوز بالا ایله گلدی. اؤزوم دوغدوغوم گونوده اریم عسکرلیکدن قاییتمیشدی.
دریندن کؤکس اؤتوروب باشینی آشاغی یوخاری ترپدیب «هه به» دئییب گلینه باخدی. گلین بیر الی قارنیندا بیر الی‌له تویوغون قاویردیغی ایش داشیندان قایناناسینا تیکه توتدو.
سون
آچیقلاما:
جیلق ائله‌مک: دری بوغاز ائله‌مک
یاش دیغیرلاناراق: یاش آخاراق/ یاش سوزه‌رَک
آغزی پیسه اوخشاییرسان؟: آغزی پیس تزه و یاری اولان حامله خانیم
میراتا قالمیش: میراثا قالمیش
قرتوپو: یئرآلما
جاد چؤره‌گی: آرپا چورگی
کوت: تندیره دوشموش فتیر
دیلینه تاروقوتو وورمادی: هئچ‌نه یئمه‌دی
قارنیمی آویشلاییردیم: قارنیمی اووشدوروردوم
