وطن آدلی قوزو بوردا نئجه باشسیز مله‌ییر!
دوغرانیر قویروغو، آج قارنی لاواشسیز مله‌ییر.
یوخو چکمیش گؤزونه مورگو‌لمکده چوبانی،
یالین ال‌لرله هورور ایت‌لری، داشسیز مله‌ییر.
زر جواهیردن اولان توپراغی بوش- بوش ساتیلیر،
اوزوگو پای وئریلیر، بارماغی قاشسیز مله‌ییر.
جاناجان دوستلاری بیر-بیر نئجه آزقینلاندی!
گوزه‌می کورکولو قورد گؤردو، قاقاشسیز مله‌ییر.
گؤزون اوستونده قاشین وار! دئیه‌نی کیم گؤردو
گؤز اویولموش یئرینه قان دولو قاشسیز مله‌ییر.
گؤیو توسدو بورویوب داغلاری قارتالسیزدی،
«سازاغ»ین زیروه‌سی گؤی قورشاغی قوشسوز مله‌ییر.