بوگون پنجشنبه 2 اردیبهشت 1400 ساعات 17:27
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

بير ساده آختاريش
ارنست همينگوي
چئويرن: دکتر فيروز رفاهي

قارين اوجاليغي پنجره‌ني کئچميشدي. گونشين ايشيغي پنجره‌دن ديوارداکي خريطه‌نين اوستونه دوشوردو. ائوين ديوارلاري شام آغاجيندان‌ايدي. گونش چوْخ قالخميشدي و ايشيغي قارين اوستوند‌ن ايچري سوزوردو. ائوين آچيق يانيندا بير چوخور قازيلميشدي و هاوا تميز اوْلاندا گونشين ايشيق تئللري ديوارلارين اوستونه پاريداياراق ايستيني قارا عکس ائتديريب، چوخورو داها گئنيش گؤستريردي. مارس آيي‌نين سوْن گونلريدي. مايور اوزو ديوارا اوْلان بير ميزده اوْتورموشدو. اوْنون آجوداني‌دا باشقا بير ميزده ايلشميشدي.

مايورون گؤزلري‌نين يانلاريندا ايکي آغ حلقه واريدي. اوْنون گؤزلويو اوزونو گونشه قارشي قوروياندا قالان حيصه‌لري گونشده يانيب، توختاييب و يئنيده‌ن يانميشدي. بورنو شيشميشدي و يانان يئرلريند‌ن دريسي ساللانيردي. او، کاغاذلارلا ايشله‌يه‌رکن، سوْل الي‌نين بارماقلاريني بير بوشقابا سوْخوب، اوراداکي ياغي بارماقلاري‌نين اوجوندا چوْخ دقتله، اوزونه سورتوردو. او، بارماقلاريني ائله بوشقابين قيراغينا ياخيردي کي، بير آزجا ياغ بارماغيندا قالسين. سونرا او چوخ اينجه‌ليکله آلنيني، ياناقلاريني ياغلاييب، بارماقلاري‌نين آراسيله بورنونو اووشدوردو. بو ايشي باشا چاتديراندان سوْنرا ياغ بوشقابيني گؤتوروب، ائوين کيچيک اوتاغينا کئچدي و اوزاندي. او، آجودانينا دئدي:

– بير آز ياتماق ايسته‌ييرم.
آجودان اوردونون دائمي افسري دئييلدي.
– ايشينيزي قورتارينيز!
آجودان دئدي:
– بله، سينيور مکيوري.

او، صندليسينه سؤيکه‌نيب اسنه‌دي. جئبيند‌ن کاغاذلا جيلدلنميش بير کيتابي چيخارديب، آچدي. سوْنرا کيتابي‌ ميزين اوستونه قويوب، چوبوغونو يانديردي. کيتابي اوخوماق اوچون ميزه اييلدي و چوْبوغونون توستوسون پوفله‌دي. سوْنرا کيتابي يئني‌دن بوکوب جئبينه قوْيدو. بير دونيا کاغاذ ايشي واريدي. بو ايشلر سوْنا چاتماياناجان، اوْ، اوْخوماقدان لذّت آپارا بيلمزدي. ائشيگده، گونش‌ داغين آرخاسينا چکيلدييي اوچون آرتيق ائوين ديواريندا هئچ بير ايشيق گؤرونموردو. بير سرباز ايچه‌ري گيريب و نئچه دنه شام آغاجين بوداغيني موختليف بوْيلاردا قيريب، پينجا آتدي. آجودان اوْنا دئدي:
– پئنين، بير آز ساکت، مايور ياتير.

پئنين مايورون گوماشتاسي ايدي. اوْ، توتغون اوزلو بير اوْغلان‌ايدي. اوْ، آغاجلاري ديقتله پينجا قويوب اونو دوز-لتدي. سوْنرا قاپيني باغلاييب ائوين آرخاسينا گئتدي. آجودان يئنه کاغاذلارلا مشغول اوْلدو:
مايور چاغيردي:
– توناني!
– سينيور ماکيوري؟
– پئنيني منيم يانيما چاغير!
آجودان باغيردي:
– پئنين!
پئنين اوتاغا گيردي. آجودان دئدي:
– مايور سني ايسته‌يير.
پئنين ائوين بؤيوک اوتاغيندان مايورون ياتديغي اوتاغا کئچدي. اوْ ياري آچيق قاپيني چالدي.
– سينيور ماکيوري؟
آجودان مايورون سسيني ائشيتدي.
ايچه‌ري گل و قاپيني باغلا!
مايور ايچه‌ريده ياتاغي اوستونده اوزانميشدي. پئنين ياتاغين يانيندا داياندي. مايور باشيني اسکي پالتارلارلا تيخيلميش بير ياستيغين اوستونه سؤيکميشدي. اوْنون ياغلي، يانميش اوزون اوزو پئنينه باخدي.
اللري پتونون اوستونده‌ايدي. اوْ، سوْرشدو:

– سنين اوْن دوْققوز ياشين وار؟
– هه، سينيور ماکيوري.
– هئچ اينديه‌جان عاشيق اوْلموسانمي؟
– نه دئمک ايسته‌ييرسينيز، سينيور ماکيوري؟
– عاشيق؟ بير قيزا عاشيق؟
– من قيزلارلا گزميشم.
– من اوْنو سوْروشمورام، سوْروشورام کي، هئچ ايندييه‌جان عاشيق اوْلموسانمي؟ بير قيزا.
– بله سينيور ماکيوري.
– ايندي‌ده اوْ قيزا عاشيقسان؟ سن اوْنا هئچ يازماييرسان. من سنين بوتون مکتوبلاريني اوْخويورام.
– من اوْنا وورولموشام، آمما هئچ واخت يازمارام.
– بلي، بيلير‌م. مايور يئنه هامان تونلا دئدي:
– توناني، سسيمي ائشيديرسنمي؟
آجودانين اوتاغيندان بير جاواب ائشيديلدي. مايور دئدي:
– اوْ بيزيم سسيميزي ائشيده بيلمز. سن دوْغرودان بير قيزي سئويرسن؟
– دوْغرودان.
مايور تئز اوْنون اوزونه باخدي:
– و فاسيد ده اوْلماميسان؟
– آنلاميرام قصدينيز فاسيد دئمکدن نه‌دير؟
مايور دئدي:
– هئچ ده تميز اوْلماغا گره‌گمز.

پئنين باشيني آشاغي ساليب، آياغينا باخدي. مايور اوْنون يانميش اوزونه گؤز تيکميشدي. اوْ، اوْنو باشدان آشاغييا سوزوب؛ اللرينه باخدي. سوْنرا يئنه تبسومسوز سؤزونه قايتيدي:
– هئچ اوره‌ييند‌ن ده کئچمه‌ديمي؟- پئنين يئنه آشاغييا باخدي.
«بونا سنين هئچ هوسين‌ده يوْخدورمو؟ پئنين آشاغييا باخيردي.
مايور باشيني ياستيغا باسيب و گولومسه‌دي. آرتيق راحات نفس چکه بيله‌ردي. اوْردو و حياتي چوْخ گرگين ايدي. اوْ، دئدي:
– سن ياخشي اوْغلانسان، چوْخ ياخشي اوْغلان، پئنين آمما چوْخ دا تميز اوْلما و يالنيز چاليش کي، بيري گليب سني ياخالاماسين.
پئنين هله ده ساکيتجه ياتاغين يانيندا دورموشدو. مايورون اللري پتونون اوستونده، بوکولموشدو. اوْ، دئدي:
– قوْرخما، منيم سنه هئچ بيز زيانيم اوْلماز. اير ايسته‌سن يئنه‌ده اؤز دسته‌نه قاييدا بيله‌رسن. آمما منيم گوماشتام کيمي قالسان سنه داها ياخشي اوْلار. بورادا اؤلمک ايمکاني آزدير.
– سيزين منه بير امرينيز وارمي، سينيور ماکيوري؟
مايور دئدي:
– يوخ. گئت اؤز ايشينه باخ. قاپيني دا آچيق بوراخ!

پئنين قاپيدان چيخاندا اوْنو آچيق بوراخدي. او، تله‌سيک آجودانين اوْتاغيندان کئچنده، آجودان اوْنا گؤز گزديردي. پئني‌نين رنگي قيپ- قيرميزي ايدي و اودون داشييان زامان کيمي يوْل گئدنده آز قاليردي بودوره‌سين. آجودان اوْنون آرديندان باخيب، گولومسه‌دي. پئنين يئنه بير باغلي اوْدونلا اوْتاغا گيردي. مايور ياتاغيندا اوزانيب، ميخدان آسلانان شينئل و قار گؤزلويونه باخيردي. او؛ پئنينين آياغ سسيني ائشيتدي. اوْ، اؤز- اؤزونه دئدي: «بالاجا شيطان بيلميرم منه دوزونو دئدي يا يوْخ»؟

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *