بو آخشام خیاوانلار تونلوک
ایچمیشَم بوتون خیاوانلاری گؤزومه
اؤلولرین تیرده اولان عکسینی ده
بوآخشام خیاوانلار دولو
بوش جیبلری ده دولدورموشام گؤزومه
بوآخشام مزارلیقلار دولو
یازمیشام اؤلولری ده دفتریمه
گودموشم؛
گودهجهیم؛
سایخینلاشسین خیاوان
بوشالداجایام سینهمی
گئجهنین بوش خیاوانلارینا
دیریلرین ده عکسینی ووراجاغام دووارلارا
یازیلانلاری دا یازیلمایانلاری دا
پولیس ماشینلارینین
گؤی قیرمیزی ایشیقلی چیراقلاری
بوگئجه‌نین دیسکو بزهگی
جاوانلارسارایی‌نین قاباغیندا چالدیراجایام
اورهییمده نابات خانیم رنگی
اویناداجایام هامینی
دمیر داراقلاری دا
نردهلری ده
پولیسلری ده
بو گئجه اوزون اولاجاق
گئجه یوخویا قالاجاق بو گئجه
گونش سؤزومو یئره سالماسا
سحری یوباداجایام
گونش چیخمامیشدان اؤلور اینسان
بیر سحر گئج اؤلمهیه نه وار؟
اؤلومو ده اویناداجایام بو گئجه
یاتمیش بختیمی ده
باتمیش گمیلریم
اوینایا اوینایا
سودان چیخاجاق
آغلاییشلی اوزوم گولهجک
بو گئجه اوینایاجاق
آغاجلار دا
زیبیللر ده
قنولار دا
زیبیلچیلرین اوزو گولهجک
بیر گول وئرهجهیم هر بیریسینه
بو گئجه دیریلهجک آرزولار دا
رؤیالار دا
من ده دیریلهجهیم
یاشایاجایام
داداجایام
حیاتیمی
اگر؛
یوخویا قالسا گئجه
بوگئجه…
1395
