گاز تاسیساتچیسی تلفوندا منه دئدی:
– مهندس، ماشینی بوککه‌نین یانیندا ساخلامیشام. گؤرورسن منی؟
– ماشینین نه دیر؟
– گؤی نیسان!
بیر آز خیرلاندیم. آخی بوککه‌نین یانیندا بیر دنه گؤی نیساندان سونرا باشقا ماشین یوخ ایدی. گینه کورکومه بیت دوشدو. دئدیم:
– ماشینی آرخاندا ساخلاییرام. بیر آزدان یولا دوشه‌ریک.
بیر آز سوسوب سونرا دئدی:
– نئیلک مهندس. نه واخت دئسن یولا دوشک، آما من ائو یییه‌سینه سؤز وئرمیشم. سن اله بیر آز تئز گئدک.
– تلسمه، چوخ چکمز.
بیردن بیر باشقا ماشین گلیب نیسانین یانیندا دوردو. تئز تلفونو گؤتوروب زنگ ووردوم:
– گئدک.
ائله گئتمه‌یه باشلادیغیمیزدا بیر دنه ده ماشین گلدی.
– دور.
یازیق تورموزا باسیب ماشینی ساخلادی.
– نه اولدو مهندس
– بیر آز دا گودمه‌لی‌ییک.
نه او یئنی گلن ماشین گئتدی نه ده یئنی بیر ماشین گلدی. او یئنی ماشین دا بوککه‌چی‌نین اؤز اوغلونون ماشینی ایمیش. دوشوب گئتمیشدی آتاسینین یانینا. پا آتوونان. بورا دا دیقه‌ده بیر ماشین ساخلایار! به نه اولدو. ماشین یوخا چیخدی؟ بیلمیرم بلکه ده یاریم ساعات گؤزله‌دیک. تلفونوم زنگ چالدی. یازیق گاز لوله کئش ایدی. بیلدیم نه دئمک ایسته‌ییر. تلفونو آچمادیم. بیرآزدان بیر باشقا نمره منه زنگ آچدی. تلفونو آچدیم:
– سلام مهندس. سیز بیزیم ائویمیزین گاز ناظری‌سیز، بیز سیزی گودوروک.
دئدیم:
– بیر دنه ده ماشین گلسین الان گلیریک.
ائو یییه‌سی داها منه بیر سؤز دئیه بیلمه‌دی. آما ائله‌بیل یانیندا اولان باشقاسینا دئدی، ددم وای نئچه ماشین گلیرلر. اوندان سس کسیلدی.
گاز تاسیساتچیسینین تلفونونو توتوب دئدیم:
– باخ ائله ماشینی یانیق ساخلا، حاضر قال. بیر ماشین دا گلیب بورادا ساخلاسا، گازا باس گئدک.
یازیق تکجه دئدی، باش اوسته. زهره قالسین بئله شانس. بو بوککه‌یه نه گلدی؟ به نییه تزه بیر ماشین بونون قاباغیندا قیراغا وئرمیر. ائله بونا فیکیرله‌شه‌ فیکیرله‌شه‌ گؤزوم گؤی نیسانین پلاکینا دوشدو. ایلکده بیر ایکی رقملی سایی سونرا بیر اوچ رقملی، سونوندا دا دوخسان بیر وار ایدی. تئز جمع ائله‌دیم. آسال سایی یعنی عدد اول چیخدی. منی تر باسدی. یاواش یاواش اکیلمک ایسته‌ییردیم. آما اؤز اؤزومله دئدیم:
– بلکه کاریخمیشام؟ قوی بیر ده جمع ائدیم.
ائله اوندا بیر تزه ماشین وئردی بوککه‌نین بؤیرونه. من اؤزومه گله‌نه کیمین گؤی نیسان گازا باسیب گئتدی. ماشینی دبردنده بیردن گؤزوم بیر دسته قوشا دوشدو. باشلادیم سایماغا:
– بیر، ایکی، دؤرد، بئش، سگگیز، اون اوچ…
من سایانا کیمین قوشلار بوروق وئریب اوزاقلاشدیلار. داها سایا بیلمه‌دیم. بیر دن تلفونوم سس سالدی. گاز تاسیساتچیسی ایدی. تلفوندا منه دئدی:
– مهندس به هاردا قالدین؟
– الان گلیرم.
گازا باسیب یولا دوشدوم. ائله‌بیل گؤی نیسان مندن بیر آز اوزاقلاشمیشدی. داها آرتیق گازا باسدیم. آها، تاپدیم گؤی نیسانی. ائله یئیین گئتدیم کی نئچه ماشین منه سیگنال وئردیلر. تکجه ایستیردیم بیر داها پلاکینا باخام. ائله بیل تیکان اوستونده اوتورموشدوم. دایادیم نیسانین آرخاسینا. یئنی دن پلاکینی اوخودوم. جمع ائدیب ساییلاری توپلایینجا، ایچیم سرینله‌دی. بو دؤنه سایی‌لارین توپلومو آسال سایی یعنی عدد اول چیخمادی. فیندیلینی ووردوم. دئدیم، نیسان گئت گئدک. بیر آز قاباقدا نیسان ساغا دؤندو. من ده دؤندوم. سونرا سولا دؤندو، من ده دؤندوم. او هئی اویانا بویانا دؤندو من ده اونون آرخاسی‌جا. سونوندا بیر ائوین قاباغیندا ساخلادی. من ده ماشینمی اونون ماشینین قاباغینا وئریب دوشدوم ماشیندان. نیسانین سوروجوسو گئدیب بیر ائوین قاپیسینا آچار سالیب آچاندا، من ده آرخاسی جا ائوه کئچمک ایسته‌دیم. او منی آرخاسی‌جا ائوه گیردیییمده گؤرونجک الینی سینه‌مه دایاییب، دئدی:
– سن هارا؟ سن کیمسن؟
بیردن تلفونوم زنگ چالدی. گاز تاسیساتچیسینین نمره‌سی ایدی. تلفونو آچدیم:
– مهندس، به سن هارا گئتدین؟
گولن آی-۱۴۰۳