کوله‌یم
تیکانلی مفتیللره اسیر؛
وارلیغیم
ایکییه بؤلونن.
یایین اورتاسیندا شاختا منی کسیر
گؤلوم دوز آغلاییر سوسوزلوغونا،
ایتن داملالارین
ایتگینلیک ناغیلی‌دیر سؤزوم.
سوسوزلوغوم
وئرگی پاییم اولدو منیم؛
طالعیمین بالونو
آغیر اولوب
ائنمه‌سین دئیه
سؤکوب آتیرام خاطیره‌لریمی.
پوست قوتوسوندان گلن
اؤلوم مکتوبو وار الیمده.
بیر باخ!
اونوم اولمادان
حاضیر اولدو دوزوم.
آدیمی ساحیلینه یازاندا
دالغالارا قاریشاردی یازیم،
ایندیسه
ساحیللردن
اوزاقلاشدیغیندا
دوزلاقلاردا قالیر سؤزوم.
آغاردی ساچلارین گؤلوم
ساحیللردن سیخیلان گؤلوم
گؤی گؤزلرین
هانسی درس‌ده خاطیرلاناجاق؟!
تاریخ درسینده‌می؟
اوتانج درسینده‌می؟
یوخسا
غملی مکتوب‌لارا
نیسگیللی ناغیللارا قوشولوب
بایات شیرازدا اوخوناجاقسان‌می گؤلوم!
سون ائدیت ۱۴/۵/۱۴۰۲
