بیلیرسیز بالکوندا اوتورماغین نه قدر لذتی، کئفی وار. یئمه‌ییبسیز قاز اَتین، بیلمه‌ییبسیز لذتین. بالکوندا هئچ اولماسا بیر دیبلی آلتی ساعات اوتوروب، اؤزو ده چای ایچمه‌سز بو لذتی هئچ باشا دوشمزسیز. هله چایی سونونا کیمین ایچمه‌ییب، دیبینه بیر آز قالمیش ائله تیلیفلی- تیلیفلی بالکوندان یئره آتماسان، اولماز اولاجاق، هئچ نه باشا دوشمه‌یه‌جکسن. ناغیل‌‌لاردا یوخسا قدیمده بو بالکون‌لارا کوله فیرنگی دئییردیلر. آنجاق او ناغیل‌لاردا او کوله فیرنگیدن گؤزل- گؤزل قیز‌لار باخارمیش‌لار. او گؤزل قیز‌لار او کوله فیرنگی یا بالکوندان یا ساچ‌لارینی ساللایارمیش‌لار یا دا دسمال‌لارینی یئره آتارمیش‌لار کی ایگید آلپ‌‌لار او دسمالی گؤتورسونلر. آما ایندی بیزیم کیمی بوغو بورما‌لار اوردان باخیر. اؤزو ده چای ایچیب دیبینی آشاغی‌یا آتیر. قویون بیر آز دویغولو دانیشاق. بو بالکوندا اسن یئل باشقا اسین‌لره اوخشاماز. هر دؤنه بو بالکوندا اوتوروب چای ایچیرم، گؤرورم کی اوزومه سینَن اسین هئچ دوننکی اسینه اوخشامیر. ائله بیل هر گونون اسینی اؤزو ایله بیر خبر گتیریر. گاه بو گونون خبری اولور گاه کئچمیشین خبرلری. هردن بو اسین کؤرپه‌لرین آغلاماسینی، یئتیم قالان اوشاق‌لارین سیزیلتیسینی، اؤزو ده بللی اولمایان بیر زاماندان گتیریر. هردن ده خیسیلداییر قولاغیما، آما ائله بیر خیسیلتی کی ائله بیل باشیما قیشقیریر. منه دئییر: کول باشینا! داش باشینا! بو یامان یوووز هانسی زاماندان گلیرسه بیلمیرم، آما بعضی واخت‌لار ائله بیلیرم بیری اؤزونون و ائل اوباسی‌نین داستانین منه دئییر. داها دوغروسو او داستانی منه قیشقیریر. آما بو خیسیلتی‌لار باشقاخیسیلتی‌لارلا فرقلی دیرلر. اؤزو ده داستانین گیزلی یئرلری قارانلیق گئجه‌لرین اورتاسیندا سؤیله‌نیر، آما بیر آز دؤزسه‌نیز سیزه دئیه‌جه‌یم کی نه تَهَر بالکوندا اوتورارکن کوله‌یین، یئلین و اسینین دیلینی اؤیرندیم. دئسم کی نئجه انتحار ائتمه‌یه چالیشدیم یقین بیله‌جکسیز کی دلی‌لییین ده بیر سبکی بیر یول یولاجاغی وار. گرچک انتحار نظم و انضباط‌لا اولمالی و ان واجبی گرچک اولمالی‌دیر. ائل دئییر کی انتحار ائدن انسان‌لار قورخاق انسان‌لاردیر‌لار، آما منجه بو سؤزون گرچک آنلاملا چوخ مسافه‌سی وار. داها دوغروسونو دئسم، انتحارین بیرینجی قوشولو یا شرطی شجاعت‌دیر…
گونده بیر توره یا باشقا جوره اسین‌له دانیشیرام. ایسراغا گون اسین منه دئدی کی، کئچمیش خالقین روحو عذابدادیر. ایسته‌ییرلر اون‌لارین بو گونکو نوه، نتیجه و کؤتوکجه‌لرینه یییه دوروب اون‌لارا اؤیرتمن و معلیم اولاسان. بیر کاغاذدا بئله یازدیم، اون‌لارا دئنن کی سیزین بو تؤره‌مه‌لرینیز اوخوماغا ماراق‌لاری یوخدور. من نئیله‌ییم؟ اوندان کاغاذی یاندیریب کولونو یئله ساووردوم. دونن اسین منه بئله فیسیلدادی کی اون‌لارا بیلگی وئر، سن یاخشیلیق ائله آت دریایه، بالیق بیلمه‌سه خالیق بیلر. یامان توتولدوم. او دیقه‌سی بالکوندان دوروب کئچدیم ائوین ایچینه، باشلادیم یازماغا.
…
شیرین شیرین یازیردیم کی بیردن گؤردوم قاپی دؤیولور. قاپی‌یا ساری گئدنده گؤردوم بیر جوما آدامین سسی گلیر. قاپینی آچیب گؤردوم بیر خیل لوت آدام قاپیدا دوروب‌لار. آغزیم آچیلا قالدی. دئدیم:
– نه ایستیرسیز؟
بیری قاباغا کئچیب دئدی:
– سن هرگون چای ایچیب دیبینی بالکوندان آتیردین کوچه‌یه. دئدیم:
– هه
دئدی:
– سن هرگون چای ایچیب دیبینی بالکوندان آتیردین کوچه‌یه، بیز ده یووونوردوق. سن اله گینه چای ایچ دیبینی آت کوچه‌یه!
دئدیم:
– نییه؟
دئدی:
– آخی صابینلی قالمیشیق!
آغ‌لار گولر- ۱۴۰۳