منیم یادیمدادیر هله بیر سحر
قوشا داغ آردیندان دوغاندا گونش
سنین ده یالواران باخیشلاریندان-
کؤنلومه اود دوشدو، هوپولدو آتش.

کؤنلومده قور ائتدی مین -مین حسرتیم،
یانیب کوله دؤندو آرزوم دا منیم.
دونن خیالیمدین، بوگون آمالیم،
ای آرزو گولشنیم، آرزو وطنیم!

سندن قووولموشام، سورگونم بوگون
دئه هاردا یاشاییم، سنسیز هارا وار!؟
باخیش ایزلریندن سالینان یولدا –
اینان مین قوروقچو، مین-مین گؤز دورار.

گؤز وئریر، ایشیق یوخ منه گزمه‌لر،
منه یان باخیرلار فتنه‌کار گؤزلر.
بوگون بیر سیرر اولوب گؤزلرین آنجاق،
بیلمیرم هرسحر او کیمی گؤزلر!؟

بلکه ده من تکین خیالمیش سنین –
هر سحر یوللاردان هئی گزدیکلرین!؟
خیالدان خیالا کؤچوروک، بودور-
خیاللار یاشادیر اؤز ازدیکلرین ..

بیزلر ازیلمیشی اولموشوق بوتون-
عینی حسرتلرین، پاک امل‌لرین.
لعنت بو وارلیغا، اوچورمالیییق
بئلنچی وارلیغین ایچ تمل‌لرین.

دوشونورمو اونو؟ یوخسا یانلیشا –
سهوه بورقالانیب فیکرتیم – سؤزوم.
یوخ-یوخ یانلیش دئییل، یاداکی بیرسهو
منده بیر آنلیق دا، تکی یوخ دؤزوم.

تکجه بیرگؤز دئییل، یوزگؤز، مینجه گؤز-
تیکیلیر یوللارا هرسحر- آخشام.
ای خیالا دؤنن حسرتلی آن‌لار-
سیزه، دیزه چؤکوب میلیونلار آدام.

کؤنوللر معبده چئوریلیب، باخین
هامی اؤز کؤنلویله، اؤز فیکریله‌دیر.
سئوگی عالمینده قوخوموش لئش‌لر-
جسدلر، عالمی بوتؤو اییله‌دیر.

اولسون، قوی ساچسینلار باخیشلار هله …
کؤنول معبدینه اود سالدی بلکه..!
قوی باخسین، نه کی وار باخسین باخیشلار،
یوللاردان قیصاصی او آلدی بلکه..!

کؤنلومده قوور ائدیر مین-مین حسرتیم،
یانیر کوله دؤنور آرزوم دا منیم.
دونن خیالیمدی، بوگون آمالیم
او آرزو گولشنیم، آرزو وطنیم.

بوگون ده یاشاییر حیسسیم- هیجانیم
منم من، باخیشلا آخیشان-داشان.
مقصدلی یوللارین یولچوسویام، هئی-
اوتانین منه دای دئمه‌یین دایان …!!!

تبریز – ۳۰/ ۰۲/ ۱۳۶۸