ائله دولموشام کی ایچیمدن بوگون
قارکیمی، بوزکیمی یاغاجاغام من.
کؤنلومده زوغ آتیب درد دویون – دویون،
گؤزومدن زهرینی ساغاجام من.
ساللانیب قاشیمدان کدریم، غمیم،
منی درد اؤلدورور، الم اؤلدورور.
ماتملی لحظه‌لر اولور همدمیم،
منی بولحظه‌لر، بو دم اؤلدورور.
گؤیون ده ساللانیب قاشی – قاباغی،
او دا اؤز زهرینی ساغماق ایسته‌ییر.
قالانیب اوست – اوسته بولوتلار داغی،
یامان گورولداییر، یاغماق ایسته‌ییر.
ساریلیب گؤیلردن یئره قارانلیق،
بوغولور نفس‌لر، بوغولور سس‌لر.
چؤکور اوره‌کلره چؤکور یامانلیق،
هم سئوگیلر ایتیر، هم ده هوس‌لر.
نئجه بیر احوالدیر بو منده؟ بیلمم!
چئوریلیر.. دئوریلیر، ایچیمدن گلیر.
گؤزومدن اوزومه آخان درد – الم
سئوگی‌دن؟ نیفرتدن؟.. یا، نه‌دن گلیر!؟
آنجاق گلیر .. گلیر، آجی گلیرده،
گلیر سئللرکیمی ویران ائیله‌ییر.
یاندیریر-یاخدیریر، اوره‌ک دلیر ده
درددن جوشا گلیر، طغیان ائیله‌ییر.
سؤکور، برباد ائدیر خاطیراتیمی
یادیمدان اوچورور یادیم دا منیم!
ائله ییغیر- بوکور سور و ساتیمی
سیلینیر ذهنیمدن آدیم دا منیم!
کیم‌ام؟ یا نچی‌ام؟ یا، نه‌دن‌ام من!؟
باشقا بیر مسأله اولور منه بو!
دئییرم اؤزومو دوشوننمه‌دن
بلکه ده هر زادی سانیرام یوخو …!؟
یوخسا، بو یوخودا بیر درمان کیمی
منیم اؤز – اؤزومه تسللی گلیر.
یوخو- دا، یوخومدا بیرطوفان کیمی
اویقو تک گلمه ییر، او – بللی گلیر.
او دا درد بلله‌دیر.. اودا درد وئریر،
منه آشکار قیلیر بوتون ماتمی.
ایچیمدن یول آلیب، درد-ماتم یئریر،
یوخومدان اویالدین..! توتون ماتمی!
آماندیر سئوینجیم اؤلور آن با آن،
شادلیغیم قیریلیر، اومیدیم سؤنور.
منی سیلکه‌له‌یین، دئیین: تئز اویان ..
وارلیغیم چئوریلیر، حیاتیم دؤنور!
دؤنور تیکانلیغا، دؤنور کوللوغا،
تولکولر یورد سالیر منیم ایچیمده.
یولولور حیس‌لریم تام بیر یوللوغا،
حیله‌لر بیچیلیر مینلر بیچیمده.
داها دونیا کلک، وارلیق بوش اولور
سئوگی بیر تسللی، عشق بیر اویونجاق.
اینام سارساقلاشیر، اومیدلر سولور
داها قولچاق اولور هامیلار.. قولچاق.
منه هم درد گره‌ک، هم سئوینج گره‌ک،
من قولچاق یاشاماق یاشییانمارام.
منده یورد سالانماز چاققاللیق، کلک،
اؤزومده تولکولوک داشییانمارام.
اویالدین بو غم‌دن، بو درددن منی،
اویالدین هم گولوم، هم ده آغلاییم!
قویمایین آشیرسین درد حددن منی،
هم اوره‌ک سئودیریم، هم ده ساغلاییم.
۱۱/ ۰۲/ ۱۳۸۱
