نه اؤتورسن تراوتله باغچا – باغی آی گؤزهل؟
شاختا وورموش باغلارداکی بولبوللری دوشون، بیل!
یوردوموزون اوجا بویلو نغمهکاری گؤزهل قیز
غم ماهنیسی قوی گزیشسین ائلدن ائله، دیل به دیل؛
شاختا وورموش باغلارداکی بولبوللری دوشون، بیل!
هله قالیر شنلییینه ائللریمین، اوبامین،
بو حسرتده، بو یانغیدا «یانیق کرم» چال، اوخو!
«اصلی»لرین اورهییندن قوپان ناله، قوپان های
باخ، آجی بیر حقیقتدیر، نه خیالدیر ، نه یوخو؛
بو حسرتده، بو یانغیدا «یانیق کرم» چال، اوخو!
اینانیرام آغ اؤرتویون داغلار اوزدن آتاجاق
سئگاهینی دویان زامان پرده – پرده ساز اوسته.
آخیب، سئلتک جوشاجاقدیر، قورو یئر ده دویاجاق،
لام سوزهجک نغمهلرده، یاییلاجاق سؤز اوسته؛
سئگاهینی دویان زامان پرده – پرده ساز اوسته.
«شب هجران» نالهسینی«فضولی»نین سؤزوندن*
ائله اوخو، ائله چال کی گئجهلرده اوسانسین!
«ناظم حکمت» «من یانماسام…» هایلاییبسا، سن ده دئه!
قارا ظولمت یوخوسوندان دیکسینیبن اویانسین؛
ائله اوخو، ائله چال کی گئجهلرده اوسانسین!
من بیلیرم فسونکاردیر هر ترانهن، هر سؤزون،
سؤزلرینی دینلهمهیه اوزاقلاردان گلمیشم.
«شب هجران» نالهسیندن، «من یانماسام…» سؤزوندن**
اورهییمدن توزالاغی، گؤزدن یوخو سیلمیشم؛
سؤزلرینی دینلهمهیه اوزاقلاردان گلمیشم.
*: شب هجران یانار جانیم، تؤکر قان چشم گریانیم/ اویادار خلقی افغانیم، قارا بختیم اویانمازمی؟ (فضولی)
**: سن یانماسان/ من یانماسام/ بیز یانماساق/ نئجه چیخار قارانلیقلار آیدینلیغا؟! (ناظم حکمت)
