گؤزوندن یولوما چیله‌نن نور مو،
یوخسا شیرینلیک می سپه‌لنیر او؟!
اله‌نیر، اله‌نیر، اله‌نیر آنجاق –
کؤنلومه ، قلبیمه سئوگی دویغوسو؛
یوخسا شیرینلیک می سپه‌لنیر او؟!

سئوگینین حددی نه؟ کیانی نه‌دیر؟!
ائنده ده، بویدا دا، او حیاتجادیر.
سئوگی آنلاشیلان دوشونجه‌دیر کی،
ازلدن – ابده کائناتجا دیر؛
ائنده ده، بویدا دا، او حیاتجادیر.

بو گون اللریمدن یاپیشان سنسن،
یوخسا او، کؤنلونون محبتی می؟!
منه گؤستردییین بوللو استقبال،
یوخسا بیر ایلگی‌نین اونسیتی می؟
یوخسا او، کؤنلونون محبتی می؟!

یوخ اولما گؤزومدن، یوخ اولما، گئتمه!
آخی گلدیییندن اوشاقلاشمیشام!
اومیدیم سؤنوردو- کؤزه‌له‌ییردی
سنی گؤره‌ن کیمی اوجاقلاشمیشام؛
آخی گلدیییندن اوشاقلاشمیشام!

گلدییین یولوندان گئری چکیلمه
آی ساریشین گؤزه‌ل، آی اومید گؤزوم!
سنی تاپدیغیمدان سئوینیرم من
من سنم سانیرام، سن ده من اؤزوم؛
آی ساریشین گؤزه‌ل، آی اومید گؤزوم!