بو گلن باهار نه‌لر گتیریر بیزه؟!
حسرت قالاقلی
کوله دؤنموش آرزولارین سوورولتوسونو.
بو باهارین اوره‌یی دولو،
گؤزو نملی‌دیر؛
چیسکین هاوالی
باشی آشاغی
دومانلی‌دیر،
چنلی‌دیر…!
بو باهار
زحمت چکیب بار یئتیرن آنالارین، آتالارین
یارپاق- یارپاق خزل اولوب
قارا یئللر آیاغیندا
خیشیل – خیشیل ازیلرکن
ایتیب – باتان صداسینی
خاطیرلادیر بیزه دوغرو…!

بو گلن باهار نه‌لر گتیریر بیزه؟!
– حسرت بوغونتولو صدالارین اووولتوسونو.
آنجاق یئنه گلیر بئله؛
نئیلک
گؤزه‌ل؛
قدم‌لری، میمنت‌لی آچالای‌دیر
قدم‌لری، بوتون دونموش اوره‌کلرین
قاراباسمیش آلاییندان باش قالدیران
گونش حیس‌لی یانار اولدوز،
پارلاق آی‌دیر ..!

گلسین بئله؛
موبارکدیر قدم‌لری،
موبارکدیر
موبارکدیر!

*آچالای: اوره‌ک آچان