بیر پنجره
تور بیر پرده آسیناقلی…
دیشاری‌یا گؤز تیکیرم؛
عمارت‌لر آراسیندا
بوغولماقدا گئنیش کوچه.

اوشاقلارین های – هارایی
حیطلرده دوستاقلانیب؛
ته‌کرلرین آسفالت اوسته قیژیلتیسی
چیمچشدیریر اوره‌ییمی.
اعلانلارین
دووارلاردا یالان – پالان پلانلاری
ریشخند ائدیر دیله‌ییمی.

… داریخیرام.

بئش مئتیرلیک دار بیر اوتاق…
کیتابلاریم
دؤرد دوواردا دوزولوبدور دونبه‌لن دوز!
اورتالیقدا
دؤرد بوجاقلی بیر ماسانین آرخاسیندا اوتورورام،
سیغینیرام سیقارئتین توستوسونه!

اولماسایدی-
دونیا بویدا دونیا اوره‌ک بو کیتابلار
بوغولاردیم
گئنیش – گئنیش کوچه‌لرده،
عمارتلر آراسیندا …!