دونیایا گلدیییمیز کیمی
دونیادان گئتدییمیز ده اولاجاق.
آچدیغیمیز کیمی سولدوغوموز
راستلاشدیغیمیز کیمی
اوزاقلاشدیغیمیز دا.
قاپی‌لار آچیلدیقدا
قاپی‌لار اؤرتوله‌جک ‌ده،
هر قاپی‌دان بیر سس
بیر نفس قاوزاناجاق.
هر قاپی‌نین سؤنوک اوره‌یینده
اومیدلر، اضطراب‌لار
شعله چکیب یاناجاق.
آغلادیغیمیزا گوله‌جه‌ییک
گولدویوموزه آغلادیغیمیز کیمی؛
بو ایسه
ایچیمیزده هارای چکن
بوتون مرحومه – مرحوم آنلاریمیزین
فریادی کیمین سسله‌نه‌جک.
کئچدیکلریمیزه الوداع
گله‌جک‌لریمیزه باش ساغلیغی اولاجاق
دویغوسوز، آنلامسیز گؤزلریمیز
و باسدیریلاجاق اوره‌ییمیزده
گیزلی – گیزلی دوشونجه‌لریمیزین
سیزیلتی‌لی اوخشارلاری
الوداعسیز وداعلاشمالار …