احد فرهمندی (اویاق)
چئویرن: احد فرهمندی (اویاق)
ترجمه: احد فرهمندی (اویاق)
سسلندیرن: احد فرهمندی (اویاق)

باغلی پنجره‌لرین آرخاسیندا
«سوگند صیادی» و بوتون ناحاقجاسینا آتا هابئله قارداشلاری الی ایله «ناموس قوروما» آدی آلتیندا اؤلدورولن قیز- قادینلارین روح‌لارینا سونورام.

سحر، مدرسه حیَطی زَنگ سَسی‌نین دوامی ایله دولمازدان اؤنجه، کوریدوردا نم ایله گچ قوخوسو وار ایدی. مدرسه‌نین خدمتچی‌سی سۇ قابینی پله‌لرین یانیندا قویموشدو. ایسلانمیش سیرامیک‌لرین اوستوندن ایسلاق آیاق ایزلَرینی سیلردی. کلاس‌لارین بیرینین ایشیغی هَله یانیرْدی.
سوگند پنجره‌نین یانینداکی سیرادا اوتورموشدو. دفتری آچیق ایدی، آمما هیچ نه یازمیردی. ورقین قیراغیندا قَلَم ایله بیر نئچه قیسا خط چَکْمیشدی. کوریدوردان آیاق سَسی گَلَنده هر دفعه اَلینی او خط‌لارین اوستونه قویوردو.
یاندا اوتوران قیز یاواش دئدی: «یئنه یازیب؟» سوگند باشینی قالدیرمادان جواب وئردی: «یالنیز ساغ-سالامت چاتدیغیمی سوروشوب.» قیز دئدی: «بیری گؤرسه نه اولار؟» سوگند دئدی: «سیله‌جه‌یم.» قیز سوروشدو: «بَس نه اوچون یئنه یازیر؟» سوگند گولومسه‌دی: «چونکی یئنه اوخوماغیمی بیلیر.»
جیب تلفونو «بینش اسلامی» کتابی‌نین آراسیندا گیزلَنمیشدی. تلفن ایشیقلاناندا بیر نئچه کلمه گؤروندو: «بوگون حالین نئجه‌دیر؟» سوگند یازدی: «یاخشی‌یام.» سونراکی پیام گَلدی: «یاخشی دئییلسَنسه، دئمَگه مَجبور دئییلسَن.» سوگند بیرآز موبایل‌ین صفحه‌سینه باخدی، سونرا یازدی: «ائوده دانیشا بیلمیرَم.»
اونلارین ائوی نئچه‌مَرتَبه‌لی بیر بینانین قاتلارینی بیرینْده ایدی؛ آز ایشیقلی اوتاق‌لار، قالین پَرده‌لر و گون بویو باغلی قالان بیر پنجره‌سی وار ایدی. آتا ائوه چاتاندا اؤنجه باشماقلارینی جوتلَییب، سونرا سوروشاردی: «بوگون سنینله کیم دانیشدی؟» سوگند عادت اوزره دئیَرْدی: «هم‌کلاس‌لاریم.» آتا سوروشاردی: «فقط هم‌کلاسلارین؟» جواب گئج گَلنده، سوالینی تَکرارلاردی.
آنا چوخ واخت اوجاغین یانیندا دوروب اونلارین سَسینه قولاق آساردی. آتانین سَسی قالخاندا، قاشیغی قابین ایچینده داها سس‌سیز دولاندیراردی. سوگند آغلاسا، بیر دستمال گؤتوروب اوتاغین آستاناسینا قَدَر گئدَردی، آمما چوخ واخت اورادا دایانیب قالاردی.
بیر گئجه آتا دئدی: «موبایلینی وئر.» سوگند دئدی: «نه اوچون؟» آتا جواب وئردی: «گؤروم نه وار.» سوگند دئدی: «هئچ نه یوخدور.» آتا اَلینی اوزاتدی: «ائله او هئچ زادا باخیرام.» سوگند دئدی: «باطریسی یوخدور.» آتا اونون اَلینه باخدی: «باطرسی یوخدور، آمما اَلین هَله اونون اوستونده‌دیر.»
سوگند موبایلی بالیشین آلتینا قویْدو. آتا بالیشی قالدیریب تلفونو گؤتوردو. بیر نئچه ثانیه صفحه‌سینه باخدی. ایچینده هیچ بیر آد یوخ ایدی؛ یالنیز ذخیره اولونمامیش بیر نؤمره و بیر نئچه قیسا پیام وار ایدی. آتا سوروشدو: «بو کیم‌دیر؟» سوگند دئدی: «همکلاسلاریمدان بیریدی.» آتا سوروشدو: «آدی؟» سوگند سوسدو.
آتا موبایلی میزین اوستونه قوْیوب دئدی: «من سنْدن نه سوروشدوم؟» سوگند یاواش جواب وئردی: «من ده جواب وئردیم.» آتا دئدی: «بو منیم سوالیمین جواب دئییل.» سوگند سوروشدو: «آدینی دئسَم نه اولار؟» آتا جواب وئردی: «اوندا بیلَرَم کیمله دانیشمالی‌یام.» سوگند دئدی: «دئمه‌سَم؟» آتا بیر نئچه آن اونون اوزونه باخدی: «او زمان پشمان اولارسان.»
آنا دئدی: «بو قیز هَله اوشاق‌دیر.» آتا اونون اوزونه باخدی: «ائله اوشاق‌ اولدوغو اوچون قورومالی‌ییق.» آنا دئدی: «قورویوب-ساخلاماق، قورخوتماقلا بیر دئییل.» آتا جواب وئردی: «سنین هیچ شئی‌دن خبرین یوخدور.» سوگند میزیلداندی: «من فقط بیر شئی بیلیرم؛ اودا قورخو ایله بؤیومه‌ییمدی.»
صاباحیسی گون آتا ایش یئریندن اؤنجه مدرسه‌یه گئتدی. مدرسه‌نین دفتری قارشیسیندا قولتوغوندا بیر پوشه وار ایدی. مدرسه‌نین مدیرینه دئدی: «سوگندین تحصیل پرونده‌سینی آیری یئره انتقال وئرمک اوچون گَلمیشم.» مدیر انتقال فرم‌لارینی چیخاردارکن سوروشدو: «هارا انتقال وئریرسیز؟» آتا اوزاق بیر یئرین آدینی دئدی. مدیر دئدی: «شاگرد اؤزوده امضالامالی‌دیر.» آتا جواب وئردی: «من وارام یئتمز می؟»
سوگند بیر نئچه دقیقه‌دن سونرا دفتره گَلدی. رنگی آتمیشدی. گؤزلرینین آلتی گؤیرمیشدی. اوزونون بعضی یئرینده قانی قوروموش جیزگی گؤرونوردو. معلم‌لردن بیری اونون دوداغینا باخدی؛ دوداغین قیراغی جیریلمیشدی. معلم یاواش سوروشدو: «یاران آجیشیر؟» سوگند دئدی: «یوخ.» معلم سوروشدو: «آرخایینسان؟» سوگند جواب وئردی: «آغرییْر، آجیشیر دئسَم، نه اولاجاق؟» معلم هئچ نه دئمه‌دی.
آتا فورمو سوگندین قاباغینا قوْیوب دئدی: «امضالا.» سوگند دئدی: «بورادان گئتمَک ایستَمیرَم.» آتا جواب وئردی: «بو منیم قراریم‌دیر.» سوگند دئدی: «من ‌مدرسه‌می چوخ سئویرم.» آتا دئدی: «مدرسه درس اوخوماق یئریدی، گیزلی دوستلوقلار اوچون دئییل.» مدیر دئدی: «خواهش ائدیرم بو مسئله‌نی ائویزده دانیشین.» سوگند باشینی قالدیرْدی: «من ائوده دانیشا بیلمیرَم.»
اوتاغا قیسا بیر سس‌سیزلیک چؤکدو. مدیر سوروشدو: «نه دئمَک ایستیْرْسَن؟» سوگند باخیشینی آتاسینا دیکدیب دئدی: «اونونلا گئتسَم… بیر داها مدرسه‌نی گؤرمه‌یه‌جه‌یم.» آتا آلچاق سَسله دئدی: «کَس سَسینی.» سوگند دئدی: «من سیزدن کمَک ایستیْرَم.» مدیر فورم‌لارا باخیب دئدی: «بو عایله مسئله‌سی‌دیر. یاخشی‌دیر اؤزوز حل ائدَسیز.»
معلم‌لردن بیری دئدی: «آمما حالی یاخشی دئییل.» آتا جواب وئردی: «قیز منیم‌دیر، حالی‌نین نئجه اولدوغونو اؤزوم بیلیرَم.» معلم دئدی: «سیز بیلدیییز؛ قیزیزین اوزونده اولان یارالاردان بللی‌دیر.» آتا دئدی: «ییخیلیب.» سوگند اَلینی دوداغینا قوْیْدو. مدیر پوشه‌نی باغلاییب دئدی: «بیزه باغلی بیر مسئله وارسا، سونرا آراشدیراریق.»
کوریدوردا سوگندین دوستو اونا یاخینلاشیب دئدی: «ایستیرسَن من ده سنله گَلیم؟» سوگند جواب وئردی: «آتام اجازه وئرمز.» دوستو دئدی: «بیرینه زَنگ ائله.» سوگند آتاسینا باخدی: «تلفونو اونون اَلینْده ایدی.» آتا اَلینی سوگندین چیگنی‌نین اوستونه قوْیوب دئدی: «گَل.» سوگند دئدی: «قورخُورام.» آتا اونون قولاغینا یاخین دئدی: «نَدن قورخُورسان؟» سوگند جواب وئردی: «سؤزومه اینانمایاجاقسان.»
ساعت دوققوزو بیر آز کئچمیشدی، اونلار ایکی‌سی مدرسه‌نین قاپیسیندان چیخدیلار. سوگند بیر دؤنه ده گئری دؤنوب کوریدورا باخدی. دوستو هَله ده اورادا دایانیب، تام نگرانلیقلا اونلاری ایزله‌ییردی. هئچ بیری ساغول‌لاشماق اوچون اَل قاووزامادیلار.
ائوه گئدرکن یولدا آتا دئدی: «یئیین یئری.» سوگند دئدی: «دیزلریم تیتره‌ییر، آیاق‌لاریم گلمیر.» آتا جواب وئردی: «سحر‌دن اویون اویناییْرسان.» سوگند دئدی: «من اویون اوینامیرام.» آتا سوروشدو: «بَس نه اوچون هامینی منه قارشی قالدیرْسان؟» سوگند دئدی: «من هئچ‌کیمی سنه قارشی قالدیرمامیشام.» آتا دئدی: «دالیمدا دانیشدیغین سؤزلردن خبریم وار.»
ائوه چاتاندا آنا قاپینی آچدی. سوگند ایچَری گئچیب، بیر باشا اؤز اوتاغینا گئتدی. آتا اونون آرخاسینجا یئریدی. آنا سوروشدو: «نه اولوب؟» آتا دئدی: «اؤزوندَن سوروش.» سوگند ایچَری‌دن دئدی: «من فقط بورادا قالماق ایستیْرَم.» آتا قاپی‌نین توتاجاغینی آشاغی سالدی، قاپی آچیلمادی. قیشقیردی: «قاپینی آچ.» سوگند دئدی: «ایستَمیرَم.» آتا دئدی: «دئدیم آچ.»
آتا هوژم ایله چیگنینی قاپییا چیرپدی. قفل قیریلیب، قاپی آچیلدی. سوگند پنجره‌نین یانیندا دورموشدو. آتا دئدی: «کیمینْله دانیشیْردین؟» سوگند دئدی: «بیری ایله.» آتا سوروشدو: «آدی؟» سوگند دئدی: «آدی مهم‌دی؟» آتا جواب وئردی: «من سنین آتانام هر کیم ایله دانیشیرسان اونو بیلمه‌یه حقیم وار.» سوگند دئدی: «بس منیم نه‌یه حقیم وار؟»
آتا بیر آدیم اؤنه گَلدی: «سن هَله بو دنیادان هئچ زاد آنلامیرسان.» سوگند دئدی: «من فقط بو ائوین نئجه اولدوغونو آنلاییرام.» آتا دئدی: «من اؤز آبروْمو قوروماق ایستیرم.» سوگند جواب وئردی: «من سنین آبروْندان دانیشمیرام. اؤز جانیمْدان دانیشیرام.» آتا دئدی: «سنین جانین دا،‌ ناموسون ‌دا منیم‌دیر.» سوگند دئدی: «من هئچ ‌کیمین مالی دئییلَم.»
آنا قاپی‌نین چرچوْوه‌سینه چاتیب دئدی: «بس‌دیر،‌ قورتاریر.» آتا دؤنوب دئدی: «سن قاریشما.» آنا دئدی: «سَسینی آشاغی سال.» آتا دئدی: «سن ده اونون طرفینی ساخلاماق ایستیْرْسَن؟» آنا سوگنده باخیب دئدی: «من ایستیْرَم هئچ‌کیم اونـا اَل قووزاماسین.»
آتا تلفونو یئره چپردی. تلفن سیندی. سوگند اونـو گؤتورمَک اوچون اَییلْدی. آتا دئدی: «دَیمه.» سوگند دئدی: «دنیادا فقط بیر بو منیم اؤزوموندور.» آتا جواب وئردی: «سنین بو حالا دوشمَگی‌نین سَبَبی ائله بوْدور.» سوگند دئدی: «یوخ. بیزی بو حالا گَتیرَن سنین قورخوتماقلاریندیر.»
بوندان سونرا سَسلَر اوتاقْدان ائشیگه چیخیب، دالاندا، کوچه ده دالغالاندی. آنا بیر نئچه دؤنه دئدی: «بس‌دیر قورتارین.» سوگند بیر دفعه دئدی: «من هئچ نه ائتمه‌میشَم.» آتا دئدی: «سن منیم قیزیمسان.» سوگند جواب وئردی: «من فقط سنین قیزین دئییلَم، اؤزومه گؤره بیر انسانام.»
آپارتمان‌دا یاشایان قونشو بیر شئیین یئره دوشمه‌سی‌نین سَسینی ائشیتدی. بیر نئچه دقیقه سونرا داها بیر سَس گَلدی؛ قیسا هم ده آنلاشیلماز. او قاپینی آچدی، آمما قاپی قارشیندا هئچ‌ کیم یوخ ایدی. ائو قاپیسینا باخدی، اَلینی قالدیردیب زَنگه باسْمادی.
اوتاقْدا پنجره آچیلْمیشدی. پَرده یئل‌ین الی ایله دالغالانیردی. سوگندین دفتری یئره دوشموشدو. بیر ورق اونون آراسیندان چیخْمیشدی. ورقْده یازیلْمیشدی: «بیر کیمسه سؤزومو ائشیتسه، منه اینانسین.»
ائشیکده آپارتمان قاباغیندا آدام‌لار ییْغیلاندا، هر کیَمسه بیر سؤز سوروشوردو. بیری دئدی: «نه اولوب؟» باشقاسی جواب وئردی: «یوخاری‌دان دوشوب.» بیریسی سوروشدو: «اؤزو؟» سؤالا آیدین بیر جواب ائشیدیلْمه‌دی.
آتا دیوارین یانیندا دورموشدو. بیر کیمسه اونْدان سوروشدو: «نه اولوب؟» آتا دئدی: «بیلمیرَم.» کیشی سوروشدو: «ائوْده ایدیز؟» آتا بیر نئچه آن سوسوب دئدی: «من فقط آبری- ناموسومو قوروماق ایستیْردیم.»
سونرا خبرلَر تلفون‌لاردا و کانال‌لاردا یاییلدی. هم‌کلاس‌لاریندان بیری دئدی سوگند مکتبدن چیخمادان اؤنجه دئمیشدی: «ائوه گئتسَم، آتام منی اؤلدوره‌جک.» باشقاسی دئدی: اوزونده قان وار ایدی.» بیر اطلاعیه‌ده یازیلْمیشدی حادثه مدرسه‌نین ائشیگینده باش وئریب، مسئله آراشدیرما آلتینْدا‌دیر. بیری ده دئدی: «بو جمله‌لرین آراسیندا اَساس سورغو ‌جواب‌سیز قالیر: سوگند کمَک ایستَیَنده، نه اوچون هئچ‌کَس اونـا یاردیم ائتمه‌دی؟ سوگندن سونرا آراشدیرمالار آرتیق هئچ شئیی دَییشدیرمَز.»
آنا قیزینین اؤلوموندن سونرا چوخ یاشامادی. بیری‌لَری دئدی: «ناخوشلوق‌دان ایدی»، بیری‌لَری دئدی: «فشاری چوخ ایدی.» آنا اؤلوموندن اؤنجه بیریندن سوروشموشدو: «قیزیمی هارا قویلایاجاقلار؟» هئچ‌ کیم جواب وئرمه‌میشدی.
مراسم کئچیریلمگه آنا عایله‌سی؛ آتا طرفی‌نین عایله‌سینه اجازه وئرمه‌دن اؤزلری بو ایشی یئرینه یئتیرمیشدیلر. مجلس‌ده اوتوراجاق‌لار ساده ایدی. قارا پارچا‌لار آز ایشیقلی دیوار‌لارا تیکیلی ایدی. تعزیه اعلامیه‌سی کیچیک و آز خرجلی ایدی. سوگندین آدی علامیه‌نین اورتاسیندا چاپ اولونموشدو، اوستونده آتانین آدی گؤرونوردو. هئچ‌کیم اونـو جیرمادی. هئچ‌کیم بو اوتانمامازلیق حقّینده توضیح وئرمه‌دی. آدام‌لار اعلامیه‌نین یانینْدان کئچیر، باخیش‌لارى بیر نئچه ثانیه او آدین اوستونده قالیردی. بیر گنج قیز ایسلانمیش باخیش‌لاری ایله اعلامیه‌‌‌یه باخار کن؛ دیل اوجو میزیلداندی: «نه اوچون چوخ ائولرده آبرو جانْدان داها قیمَتلی ساییْلیر؟»
سوگندین اوتاغی‌نین پنجره‌سی اوزون مدت باغلی قالْمادی. یئل پرده‌نی ایچَری گَتیرْیب بوش دفتری وراق‌لارْدی. وراق‌لارین بیرینْده، یاریمچیق قالْمیش جمله‌نین آلتینْدا قَلَم ایزی گؤرونوردو؛ باشلانْمیش، آمما سونا چاتْما‌دان بیر جمله وار ایدی: «من اؤزوم اولماق…»
28/08/1405

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

باغلی پنجره‌لرین آرخاسیندا

احد فرهمندی (اویاق)
www.ishiq.net

آذربایجان ادبیات و اینجه‌صنعت سایتی

باغلی پنجره‌لرین آرخاسیندا

احد فرهمندی (اویاق)
www.ishiq.net

آذربایجان ادبیات و اینجه‌صنعت سایتی

باغلی پنجره‌لرین آرخاسیندا

احد فرهمندی (اویاق)
www.ishiq.net

آذربایجان ادبیات و اینجه‌صنعت سایتی