«نوغول قابیندا ایکی بالیق» حکایه‌سی ۱۳۵۸ـ جی ایلین ایکینجی آییندا «یارمحمد» یایین ائوی طرفیندن چاپ اولان علی‌اشرف درویشیانین «آبشوران» آدلی کتابیندان چئوریلیب. «نوغول قابیندا ایکی بالیق» کتابین ایکینجی حکایه‌سی دیر. ترجمه اولونان کتاب ۱۳۹۵-جی ایل تبریزده «آذرتوران» یایین ائوینده «آشورا» آدی ایله چاپ اولوب. همین اثر ۲۰۲۰ میلادی ایلینده، باکی دا پرویز جبرائیل رئداکته‌سی ایله موجرو نشریاتیندا چاپ اولوب. اومودوم وار کتابین ترجمه ائتدیگیم باشقا حکایه‌لرینی ده سیرا ایله سایین اوخوجولارا تقدیم ائدم.
احد فرهمندی
جمعه آخشامی‌نین ایکیندی چاغی ایدی. بوتون جمعه آخشاملارینا تای، سس‌سیزـ سمیرسیز اورک سیخیجی ایدی. بیر آز دا جمعه گونونون تعطیل اولماسی‌نین خوشلوغو وار ایدی. پاییزین سونو ایدی. بیر هفته اؤنجه سئل گلمیشدی، اوتاق هله ده شئح ایدی. آتام کورسو توووندا یاتمیشدی. گونش حَیَطین پالچیق دیواری اوستونده جان وئریردی. گونشین باتماسینی سئومیردیم. کاش هئچ واخت باتماسین، درسلریم اؤزـ اؤزونه یازیلسین، آتام یوخلاسین، آییلماسین. هر زامان آییلاردی بیر باهانا تاپیب، بیزی دؤیردی.
شنبه‌نین هؤووشنه‌سی اورییمده ایدی. او قدر درس یازماق، چالما جدو‌لی ازبرله‌مک، داش اورکلی معلیم، بیر ده کوچه‌ده الده قاتیق ساتان کیشی‌نین سسی. ندن بیزی سئو‌ن بیر کیمسه یوخ ایدی؟ اما وار ایدی. بعضی پیشی بالالار وار ایدی. گئجه‌لر گیزلیجه یاتاق یئریمیزه گتیرردیلر. اللریمیزی یالاییب، بیزه خورولدایاردیلار. آنجاق اونلاری گؤزدن جایدیراندا گئدیب، آتانین آیاغینی یالاییب، جیرماقلاردیلار. آتا دا اونلاری توتوب حَیَطه توللاردی.
کوزه‌سی سینان یئتیم بیر اوشاغین شعرینی میزیلداشیردیق. نئچه گون اؤنجه اؤلن سئرچه‌می خاطیرلادیم. مکتبدن قاییداندا اؤلدو. یقین دؤزموشدو مکتبدن قاییدام، سونرا اؤلسون. من گلدیکده بوزوشوب قالمیشدی. فیشقا چالیب، چاغیردیم گلمه‌دی. یانینا گئتدیم، باشینی قویدو یئره اؤلدو.
گونش سؤزالیردی. آشورایا گئتسَیدیم گونشین چؤرکچی‌نین دیواریندان یوخاری قالخماسینی دا گؤرردیم. ائشییه چیخماغا حالیم یوخ ایدی.
کورسو منی اؤزونه یاپیشدیرمیش ایدی. آتام خورولداییردی. آج ایدیم. اما آنا من ایله اکبری آندا وئرمیشدی قابداکی چؤره‌یه ال وورمایاق. آنا یالوارارکن دئمیشدی:
ـ پیره، پیغمبره آند اولسون، بیر داها چؤرک آلماغا پولوم یوخدور.
سونرا آرتیرمیشدی:
ـ دئیین امام رضایا آند اولسون چؤرک یئمَریک!
بیز ده چؤرک قابی‌نین قیراغیندا دوروب، دئمیشدیک:
ـ آنا جانی، امام رضایا آند اولسون چؤرک یئمَریک.
آنا توخودوغو گیوه‌لری ایش ییه‌سینه وئریب، موزدو ایله گئجه یئمه‌ییمیزه یول اوستونده مال آیاق‌ـ باشی آلماق اوچون فتیر پیشیر‌نلر بازارینا گئتمیشدی. آنانین ایش ییه‌سی‌نین دوکانی باغلی اولسایدی اورَیی چوخ سیخیلاردی، ائوه کیمی آغلاردی.
قاپی تایی‌نین اوزرینه یاپیشمیش قزئته صحیفه‌سی یئلله‌نیردی. قزئته ده اوچ اوشاغین شکیلی گؤرونوردو. اونلار بیر بؤیوک آیینی قوجاقلامیشدیلار. گؤزل کؤک بیر آیی ایدی.
یئنه ده درس کیتابیمیز دا شکیلی اولان یئتیم اوشاغین شعری یادیما دوشدو، اورَییم سیخیلدی.
بوغازیمین ایچینده بیر زاد آشاغی‌ـ یوخاری گئدیب، گلیردی. بوغازیمدان یوخاری گلدی. سونرا اوزومده، هابئله گؤزلریمه اوتوردو. آردیجا گؤزلریمدن چیخیب، یاناقلاریمی قیزدیردی. الیمین دالیسی ایله اوزومو سیلدیم. گؤز یاشلاریمین شورلوغو الیمین چاتلاقلارینا سیزدی، الیم آجیشدی.
قاپی آچیلدی. اکبر باشینی اوتاغا اوزاتدی، سونرا آیاقلارینین اوجو ایله اؤنه یئریدی. آغزینی قولاغیما یاخینلادیب، پیچیلدادی:
ـ ایکی دَنه بالیق آشورانین قیراغینداکی چشمه‌یه گلیب‌لر. گلیرسن گئدک اونلاری توتاق؟
کؤنولسوز گئدک، گئدک، سس‌سیز اول آتا آییلماسین ـ دئدیم.
یئریمدن ترپشدیکده، کورسو یامان جیریلدادی. آتانین خورولداماسی کسیلدی. آز قالیردی باغریمیز چاتلاسین. آتا یئره دایادیغی چیینینی دَییشدی. قیریق‌ـ قیریق سسله اینیلده‌دی:
ـ آی الله، غضبینی بیزدن اوزاق ائله!
او حالدا اوتوروب، گؤزلریمیزی کورسونون یوخاریسینا زیلله‌دیک. کورسونون اوستونه بیر کلف گیوه ایپی ایله بیر ایینه دوشموشدو. آتا خورولداماسی‌نین آردینی توتدو.
آیاقلاریمی دره‌ـ دره گئدیب، تاخچانین قیراغیندا اولان کیچیک نوغول قابینی گؤتوردوم. نوغول قابی‌نین بوغازی سینمیشدی. اونو آشورادان تاپمیشدیم. اکبرله گئتدیک. چشمه‌یه، یئتیشدیکده بالیقلاردان بیر ایز گؤرمه‌دیک. اورییم توتولدو.
اکبره: هارادادیر؟ یئنه ده یالان دئدین اَیرینین بیری اَیری! ـ دئدیم.
اکبر: اَیری اؤزون‌سن، یوزه‌ـ یوز، لیغین آلتینا گئدیبلرـ دئدی.
الیمی لیغین ایچینه سالیب، آختارماغا باشلادیم. بیر بالیق ساری قویروغو ایله شاللاق ووردو.
اکبر سئوینجک یا امام زامان، اودو باخ!- دئدی.
نوغول قابینی سو ایله دولدوردوق. ایکیمیزده چالیشیب، بالیقلاری توتدوق.
گونش چؤرکچی‌نین دامی اوستونه چاتمیشدی. ایکیندی چاغی‌نین کسیجی سویوغو اللریمیزی کئییتمیشدی.
سس‌سیزجه اوتاغا گلدیک. آنا گلمه‌میشدی. اوتاق بیر آز قارانلیقلامیشدی. آتا هله ده خورولداییردی. قزئته اوزرینده اولان اوشاقلار ایتیب، یوخ اوموش ایدیلر. سس‌سیزجه کورسونون تووونا تپیلدیک. اوزوقویلو اوزانیب، نوغول قابینی قارشیمیزا قویدوق.
بالیقلار دیرنمیش گؤزلری ایله بیزه باخیردیلار. اکبر الینی اوزادیب، نوغول قابینی اؤز قاباغینا چکدی. من بیر داها اونو اؤزومه دوغرو چکدیم. اکبر ازیله‌ـ ازیله: اؤزوموندو ها!- دئدی.
اوندان اینجییه‌رک: نوغول قابی منیمدی. اؤزو ده اونلاری سنه من توتموشام – دئدیم.
قیوراق دئدی: – اؤزوموندو، اؤزوموندو. اوّل من تاپمیشام.
یاواش دئدیم: – اوندا منیم نوغول قابیم‌می نه اولسون؟
«ایندی گئدیب، بیر کاسا گتیرر‌م» دئیه جاواب وئردی.
آیاغا قالخماق ایسته‌دیکده آیاغی مانقالین کؤزونه توخوندو. آتانین خورولتوسو یاریچیق قالدی. آجیغیمدان اکبرین یومشاق، قانسیز دوداغینی توتوب، سیخدیم. حیرصیمدن تیتره‌ییردیم.
اکبر بوغاناقلی باغیرتی ایله: آی، آی…! – دئدی.
کورسو ترپشدی. آتا باشیمیزین اوستونده دورموشدو. گؤزلری بالیقلارین گؤزلرینه تای اولموشدو. قورخومدان کورسویه تپیلیب، آلتدان یورغانی برکدن چنگله‌دیم. یورغانین اوستوندن ایکی یومروق باشیمیزا ائندیریلدی. یورغانی بوراخیب، چیغیراـ چیغیرا ائشییه قاچدیق.
نوغول‌قابی آتانین الینده ایدی. قاپینی آچیب، اونلاری حَیَطه توللادی. بالیقلار یئر اوزرینده چیرپینیردیلار. دام اوستونده بیر قارقار قاریلدایاراق حَیَطه قونوب، بالیقلاری بیرـ بیر گؤتوروب، آپاردی.
اوزاقلاردا گؤیده‌کی بولودلار قارالیردیلار. قارانلیقدا دام یولونون پیللکن‌لرین‌ده چؤمبه‌لیب، اوتورموشدوق. بوغازیمدا دویونلنمیش قَهَر دولو پیچیلتیلاریمیز قارانلیغین درینلیینه آخیردی.
– سنین تقصیرین ایدی.
– سنین سوچون ایدی.
– سنین گوناهین ایدی.
– سنین آخماقلیغین ایدی.
اورَییم سیخیلیردی. آشورادان دؤیولموش بیر تولانین سسی گلیردی. آنا گلمه‌میشدی اولا بیلردی ایش ییه‌سی‌نین دوکانی باغلی اولدوغو اوچون دوکانین اؤنونده هله ده اونو گؤزله‌یَرک، اورادا اوتورموش اولسون.
