بو گون نظر صاحیبلرینی یوران فیکیر صاباح خالقی کدرلندیرجک. فیکر ائیله‌مه‌یین شاعیرلیک صنعتی موسیقیدن آساندیر، یا شعر صنعتینی اؤیرنمک‌ده بیر معمولی پیانو اؤیرتمنی قده‌ر زحمته قاتلاشمادان فن اهلینی راضی ائده‌‌بیله‌سیز. هر نه قده‌ر ائلییه بیله‌سیز اؤزونوزو صنعتکارلارین تاثیرینده قرار وئرین یا او اؤلچوده ادبیز اولسون کی اونلارین حاقین آیدینلادین. قویمایین بو تاثیر یالنیز سیزی ماراقلاندیران بیر یا ایکی شاعیرین یازیلاریندان سئچدیگیز گؤزل سؤزلر اولسون.
فیکر ائیله‌مه‌یین بعضی سؤزلر یالنیز نثرده یازیلا بیلمه‌دیگی اوچون شعر دونونا گیرمه‌گه اویغوندور. خیال تؤره‌دن اولمایین، بو ایشی خوشا گلیم فلسفی مقاله یازانلارین عهده‌سینه بوراخین.
وصف‌چی اولمایین، بیر منظره‌نی یاراتماقدا بیلیکلی بیر رسام سیزدن یاخشی باجاریقلی اولا بیلر. شکسپیر «گونش قومرال گئییمله اوفوقدن چیخدیغی زامان» سؤزونو یازدیقدا، رسام گؤستره بیلمه‌دیگی بیر زاد وئریر. بو سؤزده وصف دئیه بیز زاد یوخدور، یالنیز ارائه وئرمکدیر.
گؤرکملی بیر دانشمند بیر زاد اله سالیب کشف ائتمه‌میشدن اؤنجه اونو بیر عالیم آدیلا آلقیشلاییب، یا دا مکافاتلانیلماسینی ایسته‌مز. او ایشین اؤزوندن اؤنجه کشف اولان یول‌لارین اؤیره‌نمه‌سینه باشلاییب، ایشی قاباغا آپارار و یالنیز اؤزو اؤنملی آدام اولدوغو اوچون اوره‌گینی خوش ائیله‌مز. او ایلک درسیندن اله گتیردیگی بیلیکلر اوچون یولداشلاریندان آلقیش گؤزلمز. نه یازیق کی شعرین اول صینیفینده اولانلار بیر بللی ائوه ییغیشمادان هر یئره داغیلیبلار. دئمک خالقین دا شعردن اعتناسیز اؤتمکلرینین تعجب یئری وار.
اؤز شعرلریزی فعل‌لر کیمی قیریق‌ـ قیریق ائدیب سیندیرمایین. شعرین اورتاسیندا نسبتا” اوزون دایانماق ایسته‌میرسیزسه، هئچ بیر مصرعی اؤز قورتولوشوندا اؤلولر کیمی ساکیت بوراخیب، آردیجا زیققیناراق یئنی بیر بیت باشلامایین. ائله یازین هر مصرعین قورتولوشو تازا بیر مصرعین دالغاسینا ال آتسین.
سیز شعر یازاندا موسیقی‌‌یه حؤکوم سورن قایدالاردان آیری دوشمه‌مه‌لیسیز، هر بسته‌کار بسته‌له‌دیگی بیر موسیقینی ثابت قرینه‌لر چرچیوه‌سینه سالار، سیز ده شعرین چرچیوه‌لرینی دوشونمه‌لیسیز. نظملی سؤز قوشماقلا، لفظلرین شکیلینی یا دا طبیعی سسلرین هابئله معنالارینی آرادان آپارمامالیسیز. بونلارین هامیسینا درین ایز سالان گوجلو ترکیبلر یارالدیب، سؤزو موزونلاتماق، آرتیق روح تری تؤکمک ایسته‌ییر.
اولا بیلر شعرده یئرسیز آرا وئرمکله، مصرع‌لرین سونوندا و سؤزلرین اورتاسیندا سؤزلریز سکته‌یه دوشسونلر، بیر بسته‌کار ارکسترینین سس گورلوغونا بئل باغلایا بیلر، آنجاق سیز یوخ. شاعرلرین چوخو شعرده ایشلتمگی گرکلی اولان هارمونونو یاخشی باشا دوشمه‌ییبلر. بیرگه سسله‌نن اوجالیقلاری بیر اولمایان سسلر هارمونی دئمکدیر.
ان گؤزل شعرلرده بیر نوع موسیقی وار. او موسیقی ائشیده‌نین قولاغیندا قالارقیلاشیب آز ـ چوخ تمللی بیر صنعت کیمی عمل ائده‌ر.
قافیه‌نین درین لذت وئرمه‌سینه چالیشیرسیزسا، قافیه‌لریز بیر آز غافلگیر ائتمک گوجونه مالک اولمالیدیر. هیجان تؤره‌دن هابئله عجیب اولمامالیدیر آنجاق بهره‌وئریجی و یئرلی‌ـ یاتاقلی اولمالیدیر.
شعریزین؛ اوخوجونون فیکر گؤزونون اؤنونده پارلایان بؤلوملری آیری دیله چئویرمکله هئچ زادینی الدن وئرمز، آنجاق قولاق سیغاللایان بؤلوملری، یالنیز شعری سیزین دیلیزدن ائشیدنلره نصیب اولار.
یاخشی نثرین قاداسی سیزه توخونماز، گؤزل نثر یازماقلا یاخشی انظباطی اولماغا چالیشین. فایدالی ایشلردن بیری ده ترجمه ائتمکدیر، چئویردیگیز یازیدا اورژینال متنین جوشقونلوغو گؤرونمه‌سه چئوریلمیش متنین آنلامی دونموش دئمکدیر. یاراشیقلی بیر ایش گؤرمک ایسته‌ییرسیز قلمیزین اوجونا گلنی کاغاذا یئرلشدیرسز سونرا بوشلوقلاری ده‌یرسیز دویغولارلا دولدورماق زوروندا قالاجاقسیز. چالیشمایین بیر مفهومون معناسینی باشقا مفهوملا گؤستررکن اونون دوشونولمه‌سینی اوّلکیندن ده آرتیق چتینلش‌دیره‌سیز، بئله ایشلر شاعرینین سؤز یوخسولوغو و مطالعه تنبلیگیندن تؤره‌نر.
سون
ایضاح:
ازرا وستون لومیس پاوند (به انگلیسی: Ezra Weston Loomis Pound) (متولد ۳۰ اکتبر ۱۸۸۵ – متوفی ۱ نوامبر ۱۹۷۲)، شاعر آمریکایی. وی اهل آیداهو بود و در ایتالیا درگذشت. در ایران گزیده شعرهای ازرا پاوند بنام «جاده‌های این سرزمین خالی‌اند» با ترجمه مرتضی پاشاپور از سوی انتشارات افراز منتشر شده است.(اینترنت)
.
