قاراداغ / احد فرهمندی(اویاق)
چئویرن: ایشیق
ترجمه: ایشیق
ایشیق
00:00
00:00


قاراداغ
احد فرهمندی(اویاق)

عایله‌سینی قاراداغ زلزله‌سینده ایتیرمیش بیر کیچیک قیزین دیلیندن

بیر آندا بوتون دونیا ایچیمه شوملادی

هر نه‌ییم قورخولو قارانلیقلار ایچینده ایتدی

ساریلماز، ساغالماز، درین یارالار وورولدو اوره‌ییمه

شن دونیام، آشیلماز داغلارین آلتیندا قالدی

دالیندان قیریلمیش بیر یاپراق کیمی

قاسیرقالار دوستاغی اولدوم.

قانی دورماز یارام هر آن سیزلاییر.

دمپرم اوغورلایان، آنام وارکن؛

اوره‌یینین سسینی هر آن دینلردیم

آغلاسایدی گولمزدیم

گولسَیدی آغلامازدیم

اوره‌ییمده بیله دمپرم اولسایدی

او یانیمدا کن قورخمازدیم

آنجاق ایندی؛

کندیمیزده سحر اولمور آرتیق

تیر- تیر تیتره‌ییب

قاچیرام کور قارانلیغا

قورخولاریم اویانیر آمانسیز

هیچقیراقلاریم دویونله‌نیر بوغازیمدا

یاریق- یاریق یاریلیرام

داغیلمیش یورد- یوواما باخدیقجا

اوره‌ییم بؤلونور

نیکبت باسمیش تورپاغیمدا

سویو قوروموش ایرماق کیمی‌یم

بو فلاکت اومودلاریمی گمیریب

آجی امزدیریر منه

قانیما دولان دمپرم

هر ثانیه دامار- دامار ییخیر منی

اؤلومو اؤلدورسه‌ده قالان جانیم

گؤزلریمه اومود ایشیغی دولمور آرتیق

کیملر آچا بیلمیر بو کور یوماغی

یاشایان اؤلولر کیمییم.

…….

اوووی!!! عؤمور بویو یاسلانان یوردوم!

سنده اؤپوله‌سی اللر ایتیردیم؛

اوتانجیدان یاناغیندا آلما بیتن آداخلی قیزلار

کؤکسونده بیر خالقین نیسگیلین داشییان آهیلار

آنا قوینوندا سود امر کؤرپه‌لر

نه‌لر و نه‌لر….

آلاز- آلاز یانان گؤزلریمده

سونسوز آرزیلاریم قالدی

قاریش- قاریش سئودییم تورپاغیمدا

قارا داغیمین قوینوندا

قارا گونلرده‌یم…!!!

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

قاراداغ / احد فرهمندی(اویاق)

ایشیق
www.ishiq.net

آذربایجان ادبیات و اینجه‌صنعت سایتی