کیم قارغاییب سنی، داها گولمور اوزون وطن؟!
کیم یاندیریب سنی بئله گؤینور کؤزون وطن؟!
گؤی ده اسیرگه‌ییر دؤشونو ذرره یاغماییر
اود پوسگورور،نئجولدو بولاق‌لار بوزون وطن؟!
سیرداش اولار قیزی آنایا، سؤیله محرمم
شرح ائت منه بو چاپقی- تالانلیق رازین وطن!
شَن گونلرین نئجولدو قریب آغلیسان آنا؟
سیندین او گون سیتم‌له قیریلدی “سازین” وطن!
نانکور قودوزلار هر نه‌یینی غارت ائتدیلر
آه چک کی بلکه اونلاری توتسون دوزون وطن!
گَل قوی سینیق بو کؤکسومه باش آخ بلالیجه‌م!!
جان -جان اؤزوم چکیم او چکیلمز نازین وطن!
سیل گوزلرین،‌ قادان منه، گول، ائتمه قاش-قاباق
گول اوزلره یاراشماییر هئچ واخت حوزون وطن!
قیش قالماییبدی قالمییاجاق دا گؤزل آنام
بیر گون گَلَر گولوستان اولار داغ- دوزون وطن!
باتلاق، شوراندا قورباغالار شنلیک ائیله‌ییر
بیر گون گَلَر دنیز قوشو، اؤردک، غازین وطن!
او بخته‌ور گونون، نه بیلیم بلکه اولمایام
یاد ائت واریدی بیر دَلی شاعیر قیزین وطن!