کیمدیر کی کابوسومدا گلیر شیت، گوله- گوله؟!
کیمدیر توتور اوره‌ک قوشومو یاغلیجا دیله؟!
کیمدیر دامیزدی کوت پیچاغیندان «سحر» قانی؟!
کیمدیر دانیر آیی، گونَشی، باسدیریر دانی؟!
کیمدیر سویوقلوغوندا آنیمسیر مزارلیغی؟!
کیمدیر عبث بیلیر دورو- آیدین یازارلیغی؟!
کیمدیر طوفان اسیر قورودور باغچا- باغلاری؟!
کیمدیر گؤره‌نمه‌ییر اولو، وولقانلی داغلاری؟!
کیمدیر چیچک- چیچک تالاییر کال دیلک‌لری؟!
کیمدیر کی گؤندریر باغیما چُور کولَک‌لری؟!
آخ… آخ… تانیشدی کی، بو هَمَن آرزو اوغروسو
اؤلدوردو هر گؤزللیگی منده وَ دوغروسو:
ایللردی کؤنلومو چئویریبدیر مزارلیغا
قاچدیم اورکده قورخو، سیغیندیم یازارلیغا
هر آخشام اوستو حسرتیمی دفتر آغلاییر
هر آخشام اوستو یاش یارامی شعر باغلاییر:
«لای‌لای چالیم راحات اویویون وای دیلک‌لریم
قوی آغلاییم اؤزوم سیزی های- های دیلک‌لریم»
ایز- ایز گزیر منی، آدیم هر آن دیلینده‌دیر
چوخداندیر اؤلموشم وَ توفَنگی الینده‌دیر!
دانسا، یالان دئییر، پولیسه تئز چوغوللادین
قاتیل دیر او، اوزون سوره‌دیر گیزله‌دیر آدین!