بَس‌دیر داها، گونَش‌لری یاندیر شه‌هر‌یئری!
بو چوخ سوره‌ن قیشی بیر اوتاندیر شه‌هر‌یئری!
ایللردی تیتره‌ییر، اوشویور بو «خیاو» سنی
چوخ آیلاری سازاقدی، بوران‌دیر شه‌هر‌یئری!
سکگیز‌مین ایل سوره‌کلی سوکوتدان یورولمادین؟!
دیلسیز بو اَهلینی دور اویاندیر شه‌هر‌یئری!
بلکه آغیزسیز او دایانانلار قادین‌دیلار؟!
هایقیر بو توپلوما، قیزی قاندیر شه‌هر‌یئری!
قورخما چیغیرگینان، ساوالان‌دیر سنه دایاق
سولطان‌دیر او، بو شهره هایان‌دیر شه‌هر‌یئری!
باخ قاپقارا گئیینیب شه‌هرین قیز-گلین‌لری
آچ گول- چیچک، باهارلا بویاندیر شه‌هر‌یئری!
افسانه شهریمیز، بیر ایشارت یئتر، یئتر
بو شیفره‌لی سوکوتو دایاندیر شه‌هر‌یئری!
آه…لال شه‌هر، اومودوم وار سنه هله
آرزو، اوره‌ک باغیمدا فیدان‌دیر شه‌هر‌یئری!
تک من دئییل، «ثریا»* قیزین اوخشاییب سنی
حؤرمت ائله وَ دردینی آندیر شه‌هر‌یئری!
آچیقلاما:
*شهریئری: خیاو شهرینین باستانی منطقه‌سی‌دیر کی ۲۸۰ آدام شکلینده، آغیزسیز داشلاری ایله معروف‌دیر.
**ثریا: ثریا خلیق‌خیاوی، شاعرین شهرداش قلمداشی و (دختر شهریئری) منظومه‌سی‌نین یازانی‌دیر.
هایان: پشتیبان
فیدان: نهال
یک پاسخ
حؤرمتلی سحر خانیم سیز بو غزلی «قزلی» یازماقدا ایندیکی بو خیاو شهرین اولو آتاسی اولان او شهر و اوردا یاشایان ایگید انسان‌لارا گؤره سککیز مین ایل اؤنجه‌نین فاکت‌لی تاریخینا استناد ائتمیسیز و قزلینیز میصراع میصراع ادبی آرایه‌لر و بدیع ادبی صنعتلریله دولودور و سیز بو گون بو قزلده ائلیمیز و اولوسوموز اوچون ان دولغون دوشونجه داشییان سؤزلر دانیشمیسیز اورنک اوچون بیر بیتینیزه اشاره ائله ییرم. «سککیزمین ایل سوره‌کی سوکوتدان یورولمادین؟! دیلسیز بو اهلینی دور اویاندیر شهر یئری!» بور دا ایهام آرایه‌سی اوخوجولارین ذئهنینه دولوب داشیر اومودوم وار چوخ‌لاری گلیب بو قزله گؤره چوخ دانیشسینلار.