هر آخشام «سیزیِف» سایاق
چیینیمیزدن ائندیریریک آغیر صبیر داشیمیزی
گؤز تیکیریک بوزلو گؤزلرینه:
-«داها صبیر کاسامیز داشدی، بس سن هاواخت چاتلایاجاقسان، صبیر داشی؟!»
داش‌ قولاقلارینا سانکی پامبیق تیخاییب، فریادیمیزی ائشیتمه‌سین دییه!
بیز هله دونیانین گوللو- چیچکلی، آخار- باخارینا تامارزی‌ قالمیشیق هله ده
سویوموزو گؤلده، تاخیلیمیزی چؤلده، گؤیوموزو گؤیده، یئریمیزی یئرده قوروتدولار!
قیسیر قالدی آرزولاریمیزین آناسی، هئچ بیر دؤل دوغمادان!
تانریدا دا بو قَدَر صبیر اولماز آخی!
سن نه‌دن چاتلامیرسان صبیر داشی؟!
بیز چاتلاییریق سنین یئرینه
چات- چات آداملاریق، قان سوزولور یارالاریمیزدان
بیر پوف‌له کپه‌نک قانادی کیمی اوولاجاغیق
کولک‌‌لره ائله سوورولاجاغیق سانکی هئچ یوخ ایمیشیق!
ایندیجه، من یاتیرام،
اولدوزلار شاهیددیر،
هر آخشاما تای،
یاستیغیم داش‌لا دولموش
یورغان- دؤشه‌ییم تیکانلیق
ایلان سایاغی قیوریلاجاغام صوبحه‌دک
هایانا دؤنه‌جم آغرییاجام، هایانا دؤنه‌جم سیزلایاجام
زهریمار اولاجاق بیر اودوم یوخو منه
صاباح یئنه سنی چیگینیمه آلاجاغام
یاشامین ناهامارلیغیندا یول دؤیه‌جه‌ییک مقصده یئتیشمه‌دن!
بو چتین یول اوچون،
نه دَمیر باشماغیم وار، نه یول زوماریم
اَینیمده کی چول- چوخام دا ییرتیلیب بئله
بیلمیرم هاواخت چاتلایاقسان صبیر داشی!
آمما امینم دهشتلی چاتلایاجاقسان بیر گون
یئرین ایلک پارتلاییشی کیمی دهشتلی!
سندن فیشیلدایان اودلو قیغیلجیملار کیملرین گؤزونو، کؤکسونو توشلایاجاق؟!
من یاتیرام هله‌لیک، صاباحکی یارالارا حاضیرلانماق اوچون!
سن چاتلاماغا فیکیرلش!
گئجه‌‌میز خئییرلی صاباحلارا قارشی.