اوزولمه یولداشیم بورادایام
اؤلمهمیشم هله!
یالنیز داغلاری تیترهدن آغیر بیر سوکوت تیخانیب کؤکسومه
نفسیمی کسهنه قَدَر
من اؤزومو آنلایاندان بَری هئچ واخت یالنیز اؤزوم اوچون یاشامادیم
اینسان دردینی همیشه دولاندیریرام سیرتیمدا
اودور کی بو گونلردهکی حالیمی بیان ائتمک اوچون
شعرین باشماغی دار گلیر دویغولاریما
اینجه دویغولاریمین آیاغینی سورتوب، قانادیر!
بو گونلر سینیق- سالخاق، آخساق خیی-خیی گئدیرم یاشامی بو سببدن
منی سارسیدان اولایلاردان نه دئییم کی هامیسینی سن ده یاخشی بیلیرسن
کئشکه کئچیردییمیز بو آجی اولایلارین هئچ بیریسی اولماسایدی
وطن، ایستی قوجاقلی آنا وطن اولسایدی!
بیر سؤزله، بیز هامیمیز کورلاندیق،
کوته گئدن، ایت خؤرهیی اولان چؤرکلر کیمی حئییف اولدوق!
قویون اولدوق! اویون اولدوق یارامازلار اَلینده!
حال بو کی آنامیز بیر داها دوغمایاجاق بیزی!
بیر داها یئر کورهسینه گلمیهجهییک!
کئشکه یاخشی بیر زاماندا دوغولسایدیق!
اینسانین اینسانا قارداشجا مهریبان اولدوغو بیر چاغدا!
خط آرخاسیندا دینمهسن ده
منه لاقئید اولمادیغین بللیدیر، بئینینین بیر کونجونو قیجیقلاندیریرام هله ده!
دئییرلر: درد آغیر اولاندا اینسان لال اولور منیم کیمی!
باغیشلا منی،
بو گونلر ائله قارغاشالییام،
چتین تابلاشیرام اؤزومله ده
گؤرهسن مایامی باسدیراندا، اوچوروم قیراغیندا اکیلدییمی دوشونمهدی آتام؟!
نهدن آدام کیمی یاشایانمیرام؟!
هر گون- هر گون منه آغیز آچان قورخونج درهلره آیاغیم سویروشور!
کئشکه شوشه یئرینه داشدان یارانسایدی منیم ده اورهییم!
هر حالدا، آغیر سوکوتومون شیفرهسینی سیندیردیغین اوچون،
منیم هر فریاددان اوجا سوکوتومو ائشیتدییین اوچون مینتدارام سنه!
