یوخومدا بو آخشام یاشلی‌ایدی گؤزون،
نه ایسه نده‌نین سورا بیلمه‌دیم.
پوزولمور گؤزومدن کدرلی اوزون،
نه ائتدیم یوخومو یورا بیلمه‌دیم.
باخیردین گؤز یاشی ایچیندن منه،
قایغی‌نین سَبَبین بیله بیلمه‌دیم.
اللریم واریکن، اَلیم قوروسون
گؤزونون یاشینی سیله بیلمه‌دیم!
آخ!!… سؤزون واریدی سینه‌ن دولوسو
دیلینه گلمه‌دی، سوکوتدا یاندیم.
یئنه ده بو آخشام گئجه یاریسی
گؤروشدن دویمامیش، سوسوز اویاندیم.
یانیردی اوره‌ییم، یانیردی دیلیم،
سو ایچدیم یانغیما قانیق وئرمه‌دی.
یئنه ده بو آخشام دَلی کؤنلوموز
آرزو آغاجیندان پای‌ین دَرمه‌دی.
سنین اَلینده‌دیر، یار بو دیواری،
گونش گؤزلریندن بیر شعاع یئتر.
سنین ساغالمایان کال یارالارین
منیم‌سه حسرتیم بیر یوللوق بیتر.
بیلیرسن؟ گؤز یاشلی گؤرنده سنی
پاییز اوره‌ییمه خزل‌لر چؤکور.
دفتریم آغلاییر سیجاق اَلینی،
قلمیم کدردن بوینونو بوکور.
پیرتلاشیق کَلَف‌ام، چارپاشیق سؤال،
دوگونم، الین‌له چؤزوله‌جه‌یم.
درین باخیشلارین کسیلسه مندن
خزل تک ساپاقدان اوزوله‌جه‌یم.
بو هاوا، بو پاییز، بو چیسکین یاغیش
جان وئریر سئوگی‌یه، گَل قوجاقلاشاق.
اینسان تنهالیغین، پوچ یارانیشی
گَل کی هئچ اولماسا بیرگه آغلاشاق!!
