«دیشاری‌دا سازاق‌دیر، چووغوندور، یامان اوشویورم»،- دئییرسن
سؤندور سیرناشیق لامپالاری
یاخینلاش منه،
آچ یاخامدان داریخدیران دوگمه‌‌جیک‌لری
باشینی قوی تالواسالی چیرپینان گؤیرچین کؤکسومه
سیغین گوللو گئجه‌‌کؤینه‌ییمین همیشه باهار یایلاغینا
من سیغال چکیم تئلینه
سن ایسه اؤپ یازار بارماقلاریمی بیرر- بیرر
یوم گؤزلرینی
بوتون گؤزه‌ل شئی‌لره فیکیرلش
مثلن:
یای آخشام اوستوسونون سرین یئلینده، نازلا اَسَن دَنه دولموش برکتلی سونبوللره
یورغون، آمما اوره‌یی سئوینج دولو اکینچی‌لره
سوپورولموش حیه‌طه
سولانمیش کَرتی‌لره
پوققولدایان ساماوارا
چؤره‌کلی-چیراقلی سوفره‌لره
گیله‌نار دوداقلاریندان گولوش اسکیک اولمایان قیز-گلین‌لره
گؤزلریندن قیغیلجیم سیچرایان شیلتاق اوشاقلارا
سینه‌سینده مینلرجه اولدوز، آی سایریشان سَمایا
عائیله‌لرینه ساغ- سالامات قاییدان عسگرلره
سئوینجدن گؤزلری یاشاران آنالارا
بخته‌وَر ائللره
فیکیرلش بوتون گوزللیک‌لره…
یوم گؤزلرینی
بئله سان، اولماییب بوتون بو آجی اولایلار
بئله سان بو ظالیم سازاق بیتَن‌دیر
و…طن، «وطن»دیر!
اوره‌ییمین سئوگی آهنگینی دینله
اویو، سینه‌مده آیین- شایین،
یوخوندا قلبیمین کیمسه کئچمه‌ین دار- دولاشیق دولانباجلاریندان پاسپورتاسیز کئچ!
بئله ایسینَرسه اوره‌کلریمیز
قوی جهنم اولسون قارانلیق، سازاق
گئجه‌نین بیزه قوردوغو دوزاق!
اینان بو آخشام، رؤیالاریندا گونش دوغاجاق
یاز موشتولوغو گتیرن؛
چووغوندا باش قالدیران نوروز گولو گؤره‌‌جکسن
سئوینجدن آل- الوان کپه‌نک‌لر دسته- دسته اوچاجاق کؤکسوندن
اوسته‌لیک، «سحر»ین دیک‌دابان باشماقلارینی جوتله‌میشم آستانامیزدا
ساچی اونلارجا آی- اولدوزلا سوسلَنمیش،
آغ دونلو، گلین گله‌جک ائویمیزه
ماهنی اوخویا- اوخویا،
سوزه- سوزه.
بو آخشام، یوخون بالدان شیرین اولاجاق سئوگیلیم!
یاخینلاش منه…
آچیقلامالار:
دیشاری: باییر- بیرون
چووغون: بوران، طوفان سرد همراه با برف
سیرناشیق: مزاحم
تالواسالی: مضطرب
کَرتی: باغچه
قیغیلجیم: شراره‌ی آتش
کؤکس: سینه
سوسلنمک: آراسته شدن، آرایش شدن
دوزاق: دام-تله
