سان‌کی بیر اوتاق آدام ایچینده، او اؤزونون اؤزل تنهالیق آداسیندایدی. بوتون فیکری الینده توخودوغو توخونماسیندا اولدوغو، حیس اولونوردو.
نازیک دوداقلاریندا همیشه‌کی گولومسه‌مه اولسا دا، گؤزل آمما سولغون اوزونون گونشینی سان کی بیر تالا قارا بولود آلمیشدی. «غم» و «سوسقونلوق» اونون آیریلماز خصوصیتی ایدی. عمومیت‌له آز دانیشاردی، اؤزللیک‌له اؤزو و عائیله‌سی باره‌سینده.
احوالیندان خبر آلاندا «بیلگین آدام منیم احوالیمی گؤرونوشومدن یوخسا اثرلریمدن آنلایار، دانیشماغیما گرک یوخ»،- دئییردی.
یاتاقخانادا منیم کناریمداکی تخت‌ده یاتیردی. دئمک بورادا قونشو ساییلیردیق. بئکار واختلاریندا کاموا توخویوردو.
نه واختدان اونون اینجه بارماقلارینین ایتی و ریتملی توخونما حرکت‌لرینی سوزوردوم.
آرامیزدا کی بوز اریسین دییه شوخلوقجا: «سنین کیمی خانیمیسی اولان گونده قیرخ دفعه گرک باشینا فیرلانسین، هله بئله کوبارلیق و خانیم- خاتینلیقدان علاوه، ال ایشی باجاریغین دا وار، اوسته‌لیک رسامسان، خطاطسان، ماشاللاه هر بارماغیندان بیر هنر یاغیر. هله بلکه باشقا هونرلریندن ده خبریمیز یوخدور»،- دئدیم.
آجی گولومسه‌ییب «ایتفاقن بئله خانیملارین چوخلوق شانسی اولمور»،- میزیلداندی.
سونرا نه ایسه دئدییینه پشیمان اولان کیمی هؤوله‌سک: «بو قونونو باغلایاق دوستوم، باشقا قونولاردان دانیشاق لوطفن»،-دئدی و درسیمیزدن، اوستادلاریمیزدان، اورادان- بورادان دانیشدیق. البته چوخلوق من دانیشیردیم و او توخونماسینی توخویا- توخویا هردن بیر صحبته قاریشیردی. هردن ده جیسمی بورادا اولسا دا، فیکری باشقا یئرلره اوچدوغونو دوشونوردوم!
«توخونما مادّی قازانجدان علاوه پیرتلاشیق فیکیرلریمی دوزَنه سالیب، حالیما توختاقلیق وئریر»،- دئییردی.
بازاردان ایپک ساپ آلیب یئکه ماسا اؤرتویو توخویوب یئنی‌دن بازاردا ساتیردی.
دئییردی: ایپ- ساپی ماغازا یییه‌سی وئریر، من ایسه توخویورام. هره‌میز بیر سهم قازانیریق.
بو ساپلار چوخ باهادیر، اؤرتوک ده باها ساتیلیر. بونلار چوخلوق وارلی ائولرین ماساسینین اؤرتویو اولور.
***
سونرالار سؤز آراسی، شهرداشلاریندان بوشاندیغینی ائشیتدیم.
سان کی «مریم» درس اوخوماغا گلنده، اَری مین فسق- فجوردان چیخیرمیش! ائوه آراق، قومار بوساطی سالیرمیش، باشلاری قیزیشاندان سونرا دا نارکوتیکه قورشانیرمیشلار و هامیسیندان پیس، بو ایشلری هله مکتبه گئتمه‌ین، آغزیندان سود اییسی گلن اوچ یاشیندا اوغلونون قارشیسیندا ائله‌ییرمیش!
قادین قونشولار طریقی ایله ماجرانی باشا دوشَن کیمی اوشاغینی گؤتورور آجیقلا ائودن چیخیر، امک‌لی آتاسی‌نین همیشه اجاره وئردییی کؤهنه ائوه سیغینیر، بالاسی ایله اورادا یئرلشیر. طلاق تئز اولسون دییه «کبینیم حالال، جانیم آزاد»- دئییر، اؤیرتمنلیک حقوقو و ال ایشلری ایله، کیمسه‌یه محتاج اولمادان ایکی نفرلیک عائیله‌سینی دولاندیریر.
اَرینین نارکوتیکه و ساییر فسادلارا ایلیشمه‌یی دادگاها بللی اولور دییه، اوشاغین حضانت حاققی قادینا وئریلیر و بئله‌لیک‌له یاراماز کیشی‌دن جانی قورتاریر.
***
آتا- بابالاریمیز دئمیشکن: «کور کورو تاپار، سو چوخورو»، یاشامدا هر کس اؤز خویونا اوخشارلا تاپیشیر.
من ده اونون کیمی، چوخلوق اؤزومه قاپالی و ایچسل آدام اولدوغوما گؤره گون به گون دوستلوغوموز آرتدی.
او ایلین یایی اوغلونون دوغوم گونو بهانه‌سینه منی شهرلرینه قوناق چاغیردی. هم ده بو قوناقلیق چوخ خصوصی اولدوغونو وورغولادی. (قالابالیقی سئومه‌دییمی بیلیردی).
من اصلینده طبیعت وورغونویام، ائودن- ائوه گئتمه‌یی سئومه‌سم ده، اونون دعوتینی یئره سالمادیم. اوغلونا یولداش اولسون دییه من ده بالاجا سود اَمَر قیزیملا گئتدیم.
اوغلونون آد گونونه اؤز هنرمند اللری ایله، کوکلا شکلینده تورت حاضیرلامیشدی. کوکلانین گوزلرینین یئرینه گیله‌نار قویموشدو، بورنونو، بؤرکونو ده چیه‌لک‌له بزه‌میشدی. آغزی‌نین یئرینه ایسه بیر دیلیم نازیک خیار قویموشدو. «چیه‌لک اوغلومون ان چوخ سئودیگی میوه‌دیر»،- دئییردی.
مراسیمدن سونرا شام یئدیک، چوخ زحمته دوشوب دادلی- دوزلو خوره‌کلر حاضیرلامیشدی.
اونون بیر هونری ده عجیب سلیقه‌لی ائودارلیغی ایدی! ائو اشیاسی سان کی هندسه اؤلچوسو ایله، بیر آربادا، غریب واسواسیلیغلا دوزولموشدو!
اؤز- اؤزومه «عجب حوصله‌سی وار»،- دئدیم. آمما گؤره‌سن بو قدر واسواسلیغین سببی، یالنیز حوصله چوخلوغو ایدی؟!
اوشاقلاریمیزین کادولاری آچماغا، شارلار و باشقا اویونجاقلارلا اویناماغا باشلاری قاریشدی. بیز ایسه اونون چکدیگی رسم‌لره، یازدیغی خط‌لره باخدیق. چوخلوق چؤهره رسامی ایدی. آداملارین اوزونو بیر پسیخولوق دیققتی ایله چئشیدلی حالت‌لرده چکمیشدی. رسیم‌لرین ایچینده اؤزونون و اوغلونون دا چئشیدلی حالت‌لرده شکیل‌لری واریدی. رسم‌لر ائله جانلی ایدیلار سان کی آداملا دانیشیردیلار!
اونو اوزمه‌ییم دییه نه من عائیله‌سی‌نین کئچمیشیندن بیر سؤز سوروشدوم، نه ده اؤزو بو باره‌ده دانیشدی.
منه «خوش حالینا، سن دویغولارینی شعر یوخسا حیکایه شکلینده یازا بیلیرسن»،- دئدی.
من ایسه گوله‌رک، «نه فرق ائدیر کی، سن ده شعر و حیکایه‌نی داها جانلی شکیلده رسیمله‌ییرسن، اونلارا روح باغیشلاییرسان»،- دئدیم.
اؤرنک اوچون باخ بو دوشوندوروجو اثرین. بونا بیر دیوان شعر، یوخسا بیر اوزون رومان یازماق اولار.
(اوجسوز بوجاقسیز بیر قارانلیق کؤهول اولان تابلوسونا ایشاره ائتدیم کی گونش، ساچلاری پریشان حالدا، قاپ-قارا ماغارانین درین‌لیگینه چکیلیردی و بیر اوشاق کؤهولونون آستاناسیندا، اونو خلاص ائتسین دییه، آغلایا- آغلایا گونشین تئللریندن توتوب بوتون گوجویله اونو دیشاری‌یا چکیردی)!
گولومسونه‌رک دئدی: «آمما فیکریمجه دوستونون هله بیر هونَریندن خبرین یوخدور»”
جوشقویلا «نمنه؟!» – سوروشدوم.
اوشاقلاریمیز اویناماقدان یورولوب ائله فرشین اوستونده یوخولامیشدیلار. اونلاری آستاجا بیر آنا قایغیسی ایله یاتاغا قویوب، اوزلریندن اؤپوب، یورغانلا اوست‌لرینی چکدی.
بو قدر محبت و ایستی قانلیقلا، نه‌دن همیشه سویوق قانلی گؤروندویونو دوشونموردوم!
سان کی ایچینده همیشه یایین قیزماری ایله قیشین سَرت چوووغونو ساواشدایدیلار!
الیمدن توتوب: «بورا گل»- دئدی.
پیلله‌لردن ائنیب ائوین زئرزمی‌سینه گئتدیک.
اورادا بالاجا بیر کوزه‌چی‌لیک کارگاهی وار ایدی.
چئشیدلی شکیل‌لرده ساخسی قابلار دوزلدیب، بویاییب، اوستونه شکیل‌لر چکیب، رفلره دوزموشدو.
رنگلنمیش ساخسی بیر دیبچک چوخ ماراقیمی چکدی.
اؤز شکیلی همیشه‌کی حزین گولومسه‌سی ایله دیبچگین اوستونه ناخیشلانمیشدی.
الیمی یاخیندان باخماق اوچون اونا اوزاتدیم.
لاپدان «اونا اَل دَیمه»- چیغیردی. دیک آتیلدیم. الیم یئر ایله گوی آراسیندا، یئریمده قورویوب قالدیم. بو تپکینی اوندان گؤزله‌میردیم!
عصبلشمیش حالدا یومروغونو سیخاراق دئدی:
«باغیشلا منی دوستوم، او دیبچک بیر غوغالی، آجی گونون یادیگاری‌دیر، سینیق‌دیر. حیاتیمی آلت-اوست ائدن، آرزولاریمی پوچا چیخاران او شرفسیز کیشی‌یه نیسبت، کینه‌م اونودولماسین دییه، چؤله آتمادیم. سئوسن عینی‌سینی سنه دوزلده‌رم، گؤردوکده همیشه منی خاطیرلایارسان. سینیق طرفینی دیوارا ساری چئویرمیشم، ساغلام طرفی ایسه بیزه باخیر!»
بو سؤزلری دانیشدیغجا جوشقودان جیسمی، طوفان قارشیسیندا اولان آغاجلار کیمی تیتره‌ییردی. دوداقلاری اَسیردی. آغلاماغینی گیزلتمه‌یه چالیشسا دا، گؤز یاشلاری بولاق کیمی گؤزل گؤزلریندن آخیردی.
هئچ بیر سوز دئمه‌دن اونو بَرک- برک قوجاقلادیم.
دوغرو دئییردی، اونون دانیشماغا گره‌یی یوخ ایدی. اونون احوالاتینی اثرلریندن، داورانیشیندان دویماق اولوردو! بلکه او دا سینیق طرفینی….