بو گئجه مینمیشم خیال گمی‌سین،
یئنه‌ده سئیریمه چیخمیشام نئجه!
یئنه ده دونیادان آتیلمیش کیمی
اؤزومده گزیرم بو سیررلی گئجه.

ازلدن بیر غریب گلدیم دونیایا،
رنگینه، فئلینه قاریشانمادیم.
نه ائتدیم بو دونیا یاد اولدو منه،
نه ائتدیم اونونلا باریشانمادیم.

کؤرپه‌جه اوشاق تک دوشدوم سئللره،
دالغالار، چینقیل‌لار ازدی روحومو.
مین اوزلو آدام‌لار، دله‌دوز ال‌لر
پریشان ائله‌ییب، اوزدو روحومو.

یاشامین بیرآزی سئوینجیم اولسا
بیر چوخو نیسگیل‌لر، حسرت‌لر اولدو.
حیاتی بوتونجه یاشایانمادیم،
همیشه یاریسی بوشلوق‌لا دولدو.

قارانلیق چؤل‌لرین لاپ اوجقاریندا
بیر یانار ایشیقلی اوجاغی گؤردوم.
اوشوین روحوما ایستی‌لیک وئره‌ن
قایغیکئش، مهریبان قوجاغی گؤردوم.

او گوندن کیتابلار اولدو یولداشیم،
سیغیندیم واراغین سیجاق باغرینا.
او گوندن قلم‌لر اولدو سیرداشیم،
دئدی کی، دؤزه‌رم بوتون آغرینا.

او گوندن یازیرام آغریلاریمی،
چکیلمز دونیادان چکدیک‌لریمی.
اومورام هر زامان ائلیم دره‌جک
ادب باغچاسیندا اکدیک‌لریمی.

فلسفی سورغولار، پیرتلاشیق فیکیر
ائلیمین قایغیسی قلبیمده یارا.
یام- یاشیل باشیمی قورویانمادیم،
نهایت، دیلیمدن چکیلدیم دارا.

بیر زامان اولماسام منی سوراغلا
سئودیگیم چیسگینلی، چنلی هاوادا!
اوخلانمیش اوره‌کدن سیسلی شوشه‌ده
منی آختارگینان هر بیر داملادا.

بیر ده گونه‌باخان گونه باخاندا
سُور منی سئودالی باخیشلاریندان!
آختار سن آرامسیز، دلی کؤنلومو
باهارین دلی سُوو یاغیشلاریندان!

قلمدن، کیتابدان اوزاغا دوشسم
کؤنلومون داغ-داشین، دومان، چن آلار.
آ دوستلار جیسمیمه واراق دؤشه‌یین
یارامی سؤزجوکه بوکون، ساغالار!