هر آخشام،
سئوگی‌‌لر اینتحار ائدیرلر بو شه‌هر‌‌ده؛
کووو وورسان
قولاق توتولار
بو سوسقون شه‌هر‌‌ده.
کار شه‌هر،
ائشیتمه‌‌ییر سئودالارین ناله‌‌سینی؛
باخیش‌‌لار
اوزاقدان، قوجاقلاشیرلار
و
بیر حسرتلی باخیش وار
بوشه‌هر‌‌ین هر آددیمیندا.
آخشام
ال ایاق چکیلیر کوچه باجادان،
آما
کوچه باشلاریندا
آیریلماییر
قوجاقلاشان باخیش‌‌لار؛
قنوو قیراغیندا
بوینو بوکوک قالیب
سئودالار.
گؤره بیلمه‌‌ییر بو کور شه‌هر،
باخار کور دور بو شه‌هر.
گئتمه‌‌یی گلمه‌‌یَن آددیملارین
ایزی یانیر
آسفالتین اوستونده؛
بو شه‌هر‌‌ین سکی‌‌لریندن
حسرت بولاغی جوشورآخشام‌‌لار
و
قورویور هر سحر یئنه؛
و اوستوندن
سوپورگه چکیلینجک
تر تمیز اولور سکی‌لر.
«یاوریان» کیتابچیسیندا
توزو،
ویترینه دوزوبلر
و یییه‌‌سیز کتاب‌‌لار
اؤیرنجی‌‌لرین قوجاغیندا آغالیق ائله‌‌ین
کیتابلارا باخا باخا
قول کیمی ساتیلیرلار
سکی‌‌لرده.
باخار کوردور بو شه‌هر
گؤزلر سئودا دیلنچیلیگی ائله‌‌ییر بو شه‌هر‌‌ده،
دوداق‌‌لاردان آیریلان سؤزجوکلر هاوادا بوغولور بو شه‌هر‌‌ده؛
یول گئتدیکجه یول‌‌لار اوزانیر بو شه‌هر‌‌ده
نه قده‌ر چیخیلماز وارایمیش بو شه‌هر‌‌ده؟!
نه قده‌ر اوزاق ایمیش یاخین‌‌لار بو شه‌هر‌‌ده؟!
اوتوبوس گئتدیکجه
صندلده اوتوران خانیمین یورغون باخیش‌‌لاری
جیزا جیزا گئدیر دووارلاری
و هر گئدیشینده
سؤزلرینی یازیر دووارلارا.
امَی‌دیر، سوادسیزدیر بو کور شه‌هر‌‌ین دووارلاری هله،
یازی‌‌لاری قوپوب، تؤکولور سکی‌‌لره
و یاغیش یاغاندا،
آخارا قوشولوب
آخیر قنولارا
زیبیل اولوب آخیر یازی‌‌لار بوشه‌هر‌‌ده.
سس قالخیر اورتادا،
لونا پارکین مینی ماشین‌‌لاری
دیدیشیر خیاباندا؛
جیبلر اودور باخیش‌‌لاری
و بوکور شه‌هر‌‌ین آناسی
جیب تیکمه‌‌ییب
دؤلونه.
هر آخشام شه‌هر‌‌ین چیراق‌‌لاری یانیر
و ایشیق ساچیر، کور چیخیلمازلارا،
ایشیغین باغری چاتلاییر بوشه‌هر‌‌ده.
بیر هنیرتی گلیر قولاغیما
باخیرام هنده‌‌وریمه
یوخدور کیمسه،
سوسقونلوق باغیریر ایچیمه.
قارقالار دئدیلر
بو گئجه بیر قیز بوغولاجاق
رؤیا دنیزینده
و سحر بیر اوتوراجاق بوش قالاجاق اوتوبوسدا
بوش اوتوراجاق تئز دولاجاق یئنه
بو عادت دیر
هامی تئز گؤرور بوشو
بو کور شه‌هر‌‌ده.
1395
