-«قیزاوجاغین کوردو یازیق! سن نه باشا دوشرسن»- دئیه، گؤزلرینی اونون اوزوندن دؤندردی.‌ ائله بیلیر قیزی اولمایان قیزلیغینی ایتیرر، یادا آتار ائشییه.‌ اؤزومده قیزایدیم دا؛ قیز اولان یئرده… قیز اولان یئرده بیر قاراداش اولایدین!
یئنه سسینی آتمیشدی باشینا.‌ اونون سسینی ائشیدندن نئچه گون سونرایادک داش‌لاردان قورخاردی.‌ هر دؤنه ائشییه چیخیب، قارا داش گؤرنده، «- ای وای، پری اولمایا!»دئیه، دالی چکیلردی.‌ یاخینا کئچمزدی قورخوسوندان؛ ائله بیلردی بیردن یاپیشاجاق بونون قیچیندان.‌ عادتی‌دی گیزلنردی، بو کئچنده بیردن یاپیشاردی قیچیندان.‌ بودا دیک داشلانیب، اونو قووالاردی.‌ بیر یاندان دا هر دؤنه داش جومله‌سینی ائشیدنده بیر داها پری‌ایله اوینایا بیلمه‌یه‌جه‌یینی دوشونوب، بیر یئرده اوتوروب، دیزلرینی قوجاقلایاردی .
اوشاقلیق ائولرینین یانیندا بیر مچید، اونون دا سول الینده بیر قارا داش وارایدی.‌ گؤره‌سن او دا قیزداش‌ایدی؟ داشین ایچیندن بیر سو بوروسو چیخاردیب باشینا شیر باغلامیشدیلار.‌ گئدیب گلن اونو گؤروب سوسوزلایاردی.‌ اییلردیلر، آغیزلارینی دایاردیلار شیرین آغزینا، سونرا شیری آچیب، دویونجا سو ایچردیلر.‌ قونشولوغوموزدا بیر جوت باجی وارایدی، هئچ کیمه ماجال وئرمزدیلر.‌ بیری ایچیب چکیلمه‌میش او بیریسی گلردی.‌ آخیردا بیزیم سسیمیز چیخاردی، چکیلردیلر قیراغا.
«میشو»نون یولونداکی «جوت باجیلار» اولمایا ائله بو باجی‌لار ایدی.‌ یادینا گلن اونلار قارا ده‌ییردیلر.‌ اولمایا داش‌لارین دا طارازی، ناطارازی وار؛ گؤره‌سن داشلارین ایچینده ده قارا/آغ، چیرکین/گؤزل، یوخسول/وارلی اولار؟
اؤزو هر بویادا داشی سئوردی.‌ هر یئره گئدنده نئچه دانا دا داش ییغیب گتیریردی، هر بویادا، هر بویدا.‌ هردن اونلاری گتیریب تؤکردی اته‌یینه، دویونجا باخاندان سونرا، بیر سیراسینی سئچردی بویون ـ بوغازینا تاخمالی دوزلتدیرسین، آمما بیر آز باخاندان سونرا تزه‌دن قایتاراردی یئرینه.
گؤره‌سن جوت باجی‌لار ائله اوردا داشا دؤنموشدولر یا ائوده، یادا شیر باشیندا داش اولاندان سونرا آپاریب قویموشدولار اورا. آمما «میانا»دا کی «قیزکؤرپوسو»نو یقین داشا دؤنموش قیزلاردان دوزلدیبلر.‌ آخی او اوزونلوقدا قیزی هاردان تاپیب اوردا داشا دؤندره بیلردیلر؟ گؤره‌سن نئچه دانا قیزداش واردی ایچینده؟ اوندا «قاری کؤرپوسو»نو ده بو کؤرپونون قوجالمیش قیزداش‌لاریندان دوزلتمیشدیلر؟ یا اوندان چوخ زامان اول دوزلدییینه گؤره قاری کؤرپوسو دئییرلر،؟! بلکه او واختلار قاریلاردا داشا دؤنرمیشلر؟!
هر یاندا قیزداش وارایدی بونون قافاسیندان باش چیخاردیردی؛ هئچ ده بیلمیردی کی یالنیز آدلاریندا قیز وار یا دوغرودان قیزلاردان دوزلیبلر.‌ فیکرینی جایدیرماق ایچون لپتاپ‌ینین دالیسیندا ایلشدی.‌ شکیللر فایلینی آچیب، باشینی قاتماق ایسته‌دی.‌ «باکی» عکسلرینه یئتیشنده «قیز قالاسی»نین اؤنونده دایانیب شکیل چکدیردیینی گؤروب، یئنه قافاسی داش‌لا دولدو.‌ گؤره‌سن بو قیزقالاسینی دا قیزداش‌لاردان دوزلتمیشدیلر؟! جانینا قورخو دوشدو، بیردن بودا داشا دؤنسئیدی، نه ایش گؤره بیلردی؟ گؤره‌سن بونودا باساردیلار بیر بینانین دیبینه، آدینی دا قویاردیلار قیزبیناسی؟! آخی مه‌یر او بئله کؤله‌نی باسدیلار میصرین اهرامینین قات ـ قاتینا آدینی قویدولار کؤله بیناسی؟!
یئنه چوخ اوللر اولسایدی داغ ـ داشین دیلی وارایدی، اونلارلا دانیشاردی، ایندی لالام ـ لال، کارام ـ کار.‌ گؤرهسن اینانا دا داشا دؤنموشدو، اونون داش هئیکلی اولارکن نه ایچون تزه‌دن داشا دونئیدی.‌ بلکه او قده‌ر اینانان داشا دؤنسون دئمیشدیلر کی هامینین ایناناسی داشا دؤنموشدو؟ ائله اوندان سونرا هر نه قورتارمیشدی.‌ داها قیزلارین الیندن بیر ایش گلمیردی.‌ او بؤیوکلوک ائیله‌ین زامان هئچ کیم اونون سؤزوندن چیخمازدی.‌ نییه داشا دؤنسون دئیئیدیلر! هامییا یئتیشردی.‌ نه قارا بیلردی نه آغ.‌ کندلی، شهرلی، یوخسول، وارلیسی دا یوخایدی! یقین ائله داش ائله‌مه‌یی اوندان باشلادیلار.‌ بیلیردیلر هاردان باشلاسینلار.‌ دوموزی گلیب هر نه‌یی وورموشدو بیر بیرینه، هر نه‌یی اؤزونه گؤتورموشدو؛ ناغیللارادک اؤز طرفینه چئویرمیشدی.‌.‌.‌.‌ بیردن اؤزونه گلدی.‌ اولمایا پرینی ده داشا دؤندریب هر نه‌یین الیندن چیخارتماق ایسته‌ییرلر.‌ داشلارینی بیرده گتیریب تؤکدو اته‌یینه.‌ نه جور اوره‌ییندن گلردی وئرسین یونتالاتسین؟ بلکه پری اولئیدی اونلارین بیری؟
اؤزونو های کویلو یئرده حیس ائدیب، هنده‌ورینه گؤز دولاندیردی.‌ پری تخت اوسته اوزانیب؛ آیاقلاری داشا دؤنوب؛ آستا ـ آستا داش گؤوده‌سینه ساری یؤنلیب، اوسته چیخیر، آز قالیر بوینونا یئتیشسین.‌ یالنیز باشی ترپه‌نیر.‌ چنه‌سینه یئتیشنده قیشقیریر.‌ اوزو قیزیشیب، پرینی اؤنونده گؤروب، آغلار گولر قوجاقلاییر اونو.‌ قیز داها بسدی، ائله اینانانی دا بوجور داشا دؤندریبلر دا.‌ او داشا دؤنندن سونرا قیز داها بسدی، قیز گلمه قاییت، قیز.‌.‌.‌ آرایا چیخیب.
بیردن سهندین باشینداکی بؤیوجوک قارا داش‌لار یادینا دوشدو.‌ بلکه ده یالاندان دئییرلر وولکان داشلاریدی! نه قده‌ر سئوردی اونلارین اوستونده یئریسین؛ بیرینین اوستوندن آتیلسین او بیریسینین اوستونه.‌ قیش دا آیاق قویانمازدی اوستلرینه.‌.‌.‌ گؤرن ایندی گئتسه‌ایدی آیاق قویا بیلردی اوستلرینه؟
داها داش‌لا باشی، هن‌له هونو آییرا بیلمیر.
بو داشلارین هامیسینی اته‌ییندن تؤکملی‌ایدی؛ آیاغا دوروب داشلارین هامیسینی یوخاری باشدا، بیر گؤزل راحات یئره دوزور…