تزه یولا دوشموشدوم کی کوره‌ییمه بَرک بیر شئی دَیدی، دایاندیم.
– نییه باخمادین منه؟ یوخسا باخمالی دئییلدیم؟
احتیاط‌لا دؤنوب باخدیم، اورتا یاشلی بیر کیشی‌ایدی، قولتوق آغاجینی دایامیشدی کوره‌ییمه.
– نمایش وار مه‌یر باخام؟ دییه دؤنورم.
– باخمالی اولماسام هامی نه ایچون باخیر؟ سن نییه باخمادین؟
ائله بیل ال چکن گونو یوخ‌ایدی.
– من هئچ کسه باخمارام!
– پس دوسلارینی نه جور تاپارسان؟
دئییرم آخی، دئ دا، اؤزو باخانلارداندی!
– دئمه‌دیم گؤرمه‌رم، کیمسه‌یه اضافه‌دن باخمارام.
بیر آز فیکیرلشندن سونرا باشینی ترپه‌دیب، «باغیشلا!« دئدی و یولا دوشدو.
آرخاسیجا باخا ـ باخا قالدیم، قیچینین کسیلن یئرینده یالان اولماسا، میلیونلارجا گؤز گؤرونوردو، بیر قیچلی دئییلدی داها. هر آددیم آتدیقجا گؤزلر یومولوردو، آچیلیردی. گؤزلریم آغرییا دوشدو.
گؤزلرین ایچیندن چتینلیکله گؤزلریمی گؤتوروب یولا دوشدوم.