اوتوروب اوتورمامیش، ایه‌ر بیر اوشاغین وار دئنه گلسین منیم یانیمدا قالسین‌ دا! دئییر. باشیمی ترپه‌درک اوزونه باخیرام. گل او اوتاغی وئریم سنه اوردا قال من ده تک باشیما قالمییم دا، نه اولار. اوشاق‌لاریمین هئچ بیری منه یئتیشمیر کی! قیزی منیم یانیمدا اوتوروب، باشینی توولاییر؛ اوغلو دا او طرف‌ده اللرینی باشینا دایاق ائیله‌ییب باخیر.
بیلیرسن نه وار ایکی کیشی بیر زادی بوردان حیطه قدر اوزالدیرلار دئیه دئیه ده الینی اتاق‌دان حیطه ساری یؤنلدیر. پنجره‌نی ائله دؤیورلر کی اوره‌ییم اوزولور دوروب آچا بیلرم ها آمما آچمیرام.
بیر سؤز دئمیش اولوم دئییرم، لاپ یاخشی ایش گؤرورسن، ایشین اولماسین، او قدر سایما کی دؤیوب دؤیوب یورولوب گئتسینلر.
هی دئییرم ها نرگیز خانیما دئییم گلسین یانیما دئسم گلر آمما گلمز کی او گون ده ایکی خانیم گلدیلر مطباخ‌دا گؤزل خورک‌لر پیشیریب یئدیلر سونرا دا گئتدیلر.
بیردن قیزی باغیریر: بابا بسدی دا نه قدر دانیشاجاقسان! قوناغین باشینی آپاردین. هئچ سایمیر.
ایکی نفر گلیب بیر زادی بورررردان حیطه ساری اوزاللللدیرلار اوشاق‌لاریم منه یئتیشمزلر کی کئشکه باجیمین بو اوغلوندان، بوش یئرینه اشاره ائدرک، دؤرد بئشی اولاردی یئنه منه یاخشی یئتیشیر.
یئنه قیزی اوجادان دئییر آرواد بسدی دا، نه قدر دانیشاجاقسان.
گئجه‌نی قال بوردا دا منده تکم او اوتاغی بوشالدیب وئررم سنه.
نه دئیه‌جه‌ییمی بیلمیرم، قیزی قانیمین آراسینا گیریر، بونون اری قویمازکی قالسین، دئدی.
هَن هَن اری قویماز؟؟؟ بیر آز فیکیرلشیب بیردن باغیریر!
اوندا منی آپارین اؤز ائویمه منی نه ایچون بو خاراب قالمیشا گتیریب‌سیز چول پالازیمی دا وورون بیر قاطیرا یوللایین.
قیزی اؤفکه‌لی دئییر، دور گئیین آپاریم. اونون لحنیندن قورخاراق، یوخ ایندی بئواخدی قالیم صاباح گئدرم.
آرواد منی لاپ بیله‌ییوه سریییب‌سن ها!!!
باخ باخ یئنه او ایکی کیشی او زاااادی بوردان حیطه اوزالللللدیرلار … .