دیزلریمین قانی دورمور، یارالاری توختامادان، یئنه دیزیم اوسته ائله دَیمیشم یئره کی، آغریسی بیر یانا، قان گلمه‌سی لاپ قورخودور منی.
آنام گؤرمک‌ده باغیریر: گؤره‌سن یئنه کیم باخیب آیا؛ آینایا، سویا باخمامیش، باخیب بو قیزین اوزونه کی، بئله دالبادال ییخیلیر.
دؤنه‌لرله سنه ده دئمیشم آیا باخما؛ بیردن گؤزون ساتاشسا دا، آینایا، سویا باخمامیش، بیرینین اوزونه باخما، یازیق‌دی.
قورخومدان دییه بیلمیرم ائله آینادان آیا باخا باخا، ایلیشیب ییخیلمیشام. گئجه‌لر پنجره‌نین اؤنوندن دالی چکیله بیلمیرم، آیدان گؤزومو گؤتورنمیرم. آخی بو، گؤزلره نه ایش گؤره بیلر کی!! نییه گؤرَنمَسین، مهیر دنیزین او قدهر سویون گؤیه قالدیرا بیلمیر؟! اونون یانیندا گؤز نه‌دی کی!!
آنامین سسینی ائشیدیرم: بو قیز آخیردا آی دلیسی اولوب، قالاجاق الیمیزده. گئجه، گوندوز بیر گؤیدو، بیر ده بو.
تزه‌لیکده گوندوزلر ده آینا گؤتوروب گؤیه ساری توتورام؛ آینایا باخیب احتیاط‌لا آددیملاییرام؛ هر آددیمیمدا قورخورام لاپدان‌- لاپا دوشم گؤیون ایچینه؛ آمما گؤی آیاغیم آلتیندا دئیه، ائله غرورلا آددیم آتیرام کی گؤرن دئییر بس هارانین ملکه‌سیندن زادیندانام.
گئجهلر داها احتیاط‌لا آینادان گؤیه باخیرام؛ آمما کی آددیملاریمین بیرینده آیاغیم زویور، سرعت‌له اولدوزلارین ایچیندن کئچیب گئدیرم. او یان بو یانا آل آتیرام، بلکه بیر ایکی اولدوزا الیمی ایلیشدیریب دایانام، آمما الیم زویولدهییر. سرعت‌له آیا دوغرو گئدیرم، گؤرن قارا چوخورا دوشمه‌میشم دئیه، اؤزومو دانلاییرام، لاپ عقلینی اودوزوبسان ها، اوندا ائله توزا چئوریلردین کی هئچ بیر دَنه‌سی ده تاپیلمازدی.
سرعتیم گئت گئده آرتیر. آخیردا نئچه اولدوزا دهیندن سونرا بیر آزجا سرعتیم آزالیر. آی گئت گئده بؤیویور. تاپپیلتیایله دیزیم اوسته دوشورم آیین اوستونه. توز تورپاق قالخیر. هویوخوب بیر یئرده قالیرام. بیلمیرم آیدان یئره دوشموشم، یوخسا یئردن آیا.