هامی‌نین دوداقلاریندا گولوش، اللرینده شکلات. گنج‌لر هردن بیر اوزاقدان بیربیرلرینه شکلات توللاییرلار. شکلات قابی الیمده مات قالمیشام، کیمه توتوم دئیه. یانی اولاردی بئله گونو گؤرمه‌ییمیز؟
اینانا بیلمیرم. ائله بیل هئچ کیم اینانا بیلمیر. شکلات اللرینده بیربیریندن سوروشورلار: «آی بالا دوزدومو بو خبر؟» بیریسی «هه بالا! اؤزوم رادیودان ائشیتدیم؛» او بیریسی «مچیدین سس اوجالدانیندان ائشیتدیم؛» بیریسی ده «تئلویزییادا گؤرسه‌دیردی» دئدی؛ و …
هیجانلا، «پس ساواش آخیردا سونا چاتدی» دئیه، اللریمی گؤیه قالدیریب، آتیلاندا، قولوم برک بیر یئره ده‌ییب، اوره‌ییم کئچیر. گؤزلریمی آچیرام. گئجه نظریمدن کئچن کیمی، دونیادا ساواش اولان یئرلر، اوشاقدان یاشلییا قده‌ر جنازه‌سی‌له بیر یئرده گؤزومون اؤنوندن کئچیر. اوره‌ییمین آغریسی آرتیر.
اولمایا منیم بو یوخوم آج تویوقلا داری مثلی‌دیر؟ گئجه نه یئدیییمی یادیما سالیرام، یونگول یئمیشدیم. یوخومو یوزماغا باشلاییرام، «یوخو یان یورار» سؤزونو قیراغا قویورام. منجه هر یئرده باریشیق اولاجاق، هر یئرده ده شکلات پایلاناجاق.
سحر خبرلری‌نین سسی گلمکده اللریمی قولاغیما قویوب گؤزومو یومورام.