ائلیمی قیسناما سن داشا، داغا،
ازلدن باغلی‌ییق بیز بو تورپاغا؛
بیز کی هئچ ده‌یمیریک دیلینه قاغا،
چالیشما بو حقی بیزدن آلماغا!
انصاف‌می دیلیمه قوروق، قاداغا؟!
آزادلیق یولوندا وئردیک قول- قولا،
بیر وطن اوغروندا دوشموشوک یولا؛
قویما بو آرزولار سارالا، سولا
گل آرخا چئویرمه قارداش اولماغا!
انصاف‌می دیلیمه قوروق، قاداغا؟!
بوینوندا چؤره‌گیم، دوزوم وار منیم،
بیرگه یاشاماغا سؤزوم وار منیم،
وطن تاریخینده ایزیم وار منیم
بس نده‌ن وورورسان هی سولا، ساغا
انصاف‌می دیلیمه قوروق، قاداغا؟!
اوخودو بو دیلده آنام بایاتی،
من اونون دیلیندن دویدوم حیاتی؛
بیرلیکده یوکسه‌لر وطنین آدی
جان آتما بیرلیگی گؤزدن سالماغا
انصاف‌می دیلیمه قوروق، قاداغا؟!
حریت آدلانان یولوم وار منیم
دیللر آراسیندا دیلیم وار منیم
اودلار دیاری تک ائلیم وار منیم
گل اؤگئی یاناشما ائلیمه قاغا!
انصاف‌می دیلیمه قوروق، قاداغا؟!
«آرازلی» سانماییر بیگانه سنی
سن ده دوغما تانی اؤزونه منی!
بیز اؤز کؤکوموزله آنا وطنی-
چئویردیک یوکسه‌لن خولا، بوداغا
انصاف‌می دیلیمه قوروق، قاداغا؟!
۶/۷/۱۴۰۴
