سنینله اوره‌کده وار نئچه سؤزوم:
نه‌یینه اؤیونوم نه‌یینه دونیا!
دؤزدوم، زارا گلدی الیمده دؤزوم،
نه‌یینه اؤیونوم نه‌یینه دونیا!
اوره‌ک شان- شان اولدو، آغلادی گؤزوم،
وئردیگین درد‌لره من نئجه دؤزوم؟!
حیاتیم بویونجا گولمه‌دی اوزوم،
نه‌یینه اؤیونوم نه‌یینه دونیا!
گولدورمک یئرینه آغلاتدین مودام،
منی غم اودونا سن آتدین مودام،
اسارت آلتیندا یاشاتدین مودام،
نه‌یینه اؤیونوم نه‌یینه دونیا!
داها جانا گتدی عنادین منی،
آغیر غم یوکویله سینادین منی،
ساده حیات اوچون قینادین منی،
نه‌یینه اؤیونوم نه‌یینه دونیا!
«آرازلی» ایزله‌ییر کناردان،گئندن،
اونو آیری سالدین ائلدن، وطندن،
آرتیق کام آلماییب هله‌لیک سندن،
نه‌یینه اؤیونوم نه‌یینه دونیا!
شهریور ۱۴۰۳
