آچیرام کؤنلومو گؤزه‌لیم سنه
عؤمرومو زیروه‌یه قالدیراندا سن.
سئودالی آن‌لاری یاشاتدین منه
حیاتین بوشلوغون دولدوراندا سن.
قورودون سئوگینله منی هر ساعات،
اونونلا دونیادا آچدیم قول – قانات؛
ان چتین گونومدن تاپیرام نجات
اومیدین معناسین بیلدیرنده سن.
حیاتدا اولموشوق عؤمور همدمی،
برابر یاشادیق کدری – غمی،
وصالا چئوریلیر گؤزومون نمی
هیجران یاشلارینی سیلدیرنده سن.
قوی دئییم سؤزومون جانینی سنه:
سن حیات معناسین بخش ائتدین منه؛
اییلمز اولموشام هر بیر اؤتنه
منی اؤز سئوگینه دالدیراندا سن.
اوزه‌جک آیریلیق بو جانی سنسیز،
اولماسین عؤمرومون بیر آنی سنسیز،
اوره‌ک هئچ ایسته‌میر دونیانی سنسیز،
«حیدر»ی یاشادان، اؤلدورن ده سن.
دی – ۱۴۰۰ – تهران
