آنا!
حیدر آرازلی
آلنیندا، اوزونده اولان قیریشلار
حسرت یوللاری‌نین ایزی‌دی آنا!
نیگران اوره‌یین، تیتره‌ین اللر
حیات معناسی‌نین اؤزودو آنا!
سن بیر یاشاییش‌سان، حیاتسان اؤزون،
بالدان دا شیریندی نغمه‌لی سؤزون،
سولغون یاناقلارین، نگران گؤزون
زامانین باخیشی، گوزودو آنا!
گؤزلدی فیطرتین، تمیزدی ذاتین،
سنسن باغیشلایان منه حیاتین،
دیلیندن سوزولوب اخان بایاتین
محبت نغمه‌سی، سؤزودو آنا!
گؤزه‌ل اوتوروشون، گؤزه‌ل دوروشون،
عاغیل‌لا، کمال‌لا اولور هر ایشین،
معنالی سوکوتون، درین باخیشین
دونیانین ان بؤیوک رازی‌دی آنا!
عشقین دونیا قده‌ر، سئوگینسه درین،
مقامین اوجادی، جنت‌دی یئرین،
اوره‌کدن سئوینیب گولنده شیرین
عؤمرومون باهاری یازی‌دی آنا!
توپلاییر باشینا بیزی اوجاغین،
داییم ایشیفلانسین یانار چیراغین،
مهربان اللرین، ایستی قوجاغین
حیاتیمین دادی، دوزودو آنا!
باشینا دولانیم، قوربانین اولوم،
حیاتیمدا سنسن قانادیم، قولوم؛
اؤلسمده قوینوندا ایسته‌رم اؤلوم
سؤزومون دوغروسو، دوزودی آنا!
