منه نه وئریبسن آلا بیلمیرسن،
زه‌هری قاتیرسان آشیما دونیا!
هیجرانین اودویلا یاندیریب منی
دائم داش اله‌دین باشیما دونیا!
هرزامان گؤز قویوب سوزموشم سنی،
اولمادین هئچ زامان کؤنلوم همدمی،
سنی تانییاندان ازیبسن منی،
هرگون تور توخودون قوشوما دونیا!
الینی اوزادیب اولمادین کؤمک،
نه راحاتلیق گوردوم، نه ده دینجلمک،
سالدین آیریلیغی، آغریدی اوره‌ک،
بلالر چیخارتدین قارشیما دونیا!
قوردوغوم کومه‌یه اولمادین دیره‌ک،
آغیز وئردینسه ده وئرمه‌دین چؤره‌ک؛
سنین یولداشلیغین نه‌ییمه گره‌ک؟
یارامین قایساغین قاشیما دونیا!
چؤره‌یی اونودوب، دوزو ایتیردین،
عؤمرو یاشامامیش سونا یئتیردین؛
سن بو «آرازلی»نی جانا گتیردین
باخما آغ ساچیما، یاشیما دونیا!
آذر ۱۴۰۱
