بیلمیرم هایانا هارایا گئدیم
قالمیشام اوره‌ک‌له باش آراسیندا!
بو یول آیرجیندا آخی نه ائدیم؟
اویموشام گؤز ایله قاش آراسیندا.
باش دئییر قورخولو یوللارا وارما
یولونو سئچنده اوره‌کدن سورما
عبث تلاشلارلا اؤزونو یورما
دایانما دیوارلا داش آراسیندا!
اوره‌ک حؤکم ائله‌ییر آیاغا، یئری!
یولدا یورولساندا قاییتما گئری
حرکت ائتمه‌سن اولمازسان دیری
دونوخما قورویلا یاش آراسیندا!
اوره‌ک مرد اولسادا، باشیم قورخولو
اؤزوم سئچمه‌لی‌یم گئتدیگیم یولو؛
بیر یاندا بوش دوروب، بیر یاندا دولو
حئیرانام دولویلا بوش آراسیندا!
ایچیمدن سس گلیر «آرازلی» اویان
قورخولو یوللاردا سن مؤحکم دایان
حیات یوللاریندا اوره‌یه اینان
دایانما اوره‌ک‌له باش آراسیندا!
آذر ۱۴۰۰
