یولداشیم «رضا بیرنگ»ین عزیز خاطیره‌سینه
داش آلتیندا یاتماق سنه یاراشمیر
آچ گؤزونو، توت الیمی دور گئده‌ک!
گولوشونه حسرت قالیب گؤزلریم
آچ گؤزونو، توت الیمی دور گئده‌ک!
دور قوشا آختاراق گلیب،گئده‌نی
اود ووروب، یاندیریب، یاخما سن منی
وفاسیز سانمیرام هئچ زامان سنی
آچ گؤزونو، توت الیمی دور گئده‌ک!
اوچورتما دونیانی منیم باشیما
گل، قاتما زه‌هری ایستی آشیما
گلمیشم گؤروشه، دور چیخ قارشیما
آچ گؤزونو، توت الیمی دور گئده‌ک!
گؤزلریم آغلاردی، اوره‌ییم قان‌دی
هیجرانیندا کؤنول اود دوتوب یاندی
گردیشیندن کاینات دا دایاندی
آچ گؤزونو، توت الیمی دور گئده‌ک!
سارالیب چمن‌لر، سولوبدو باغ‌لار
باتیبدی ماتمه بوسبوتون داغ‌لار
سورور «آرازلی»دان یئتیم بولاغ‌لار
آچ گؤزونو، توت الیمی دور گئده‌ک!
خرداد ۱۴۰۳
