هر سحر آچیلدیقدا، هر ایشدن اؤنجه گلیب اؤنونده دایانمیشدیم. سلام وئریب، دردلشمیشدیم سنینله. هله نه یاخشی کی اوزاق اولسایدین دا وارایدین.
او گون سحر یوخولاریمین داوامی اولان خولیالاریمدان، چتینلیکله آیریلاراق یئنه ده گلدیم، گؤرمه‌دیم سنی. هارا گئده بیلردین؟ یوخسا گئجیکمه‌ییمدن کدرلنمیشدین؟ سن کی کوسه‌ین دئییلدین. بلکه ده بیر سیرا ایشلردن اوتانیب گیرمیشدین یئره؟ آخی نئیله‌‌میشدین کی اوتاناسان دا؟ هئچ ایندی یئره گیرمک زاد دا موددان دوشوب، معلوم دا دئییل او آددا بیر زاد وار یوخسا یوخ. ]او گون قوناقلاری وارایدی، منی ده چاغیرمیشدیلار. آشاغی قاپیلاری آچیقایدی، پیلله- پیلله سسی اوجالیردی، قاپیلارینا یئتیشدیم، سسین آتمیشدی باشینا، قیچلاریم تیتره‌یه‌رک الیمی آپاردیم زنگه، سس بوندان آرتیق اوجالماسین دئیه دویمه‌نی باسدیم. هامی گلنده‌ن سونرا، چایلار ایچیلیب ـ ایچیلمه‌میش آغزینی سیلدی و باشلادی دانیشماغا، سؤزلرینین اورتاسیندا «سایغی گؤسترمک، ان بؤیوک انسانی داورانیشلارداندیر…» جمله‌سینه یئتیشندن سونرا قالان سؤزلرینی ائشیتمه‌دیم.[ بلکه‌‌ده سؤزلریم داریخدیرمیشدی سنی؛ یوخ سن چوخ دؤزوملویدون.
اؤزومو بئله تکرارلانمیش سؤزلرله توولاسئیدیم ده، قورخومو دیرناق اوجوجا آزالدا بیلمیردیم. یاخشی کی ائولره سیغیشمازسان! سیغیشسایدین ایه‌ر، مود اولاردین، گونده‌لیکده یازاردیلار، تلویزیادا دیقه‌دن دیقه‌یه سنی گؤستریب سندن دئیردیلر، اس ام اس وورون، گؤندراخ یازاردیلار. توکان ـ بازار دولاردی سنایله. هامی، گرکلی اولوب اولمادیغینا باخمایاراق، اؤزوندن ده چوخ اؤزونه اوخشایانلاردان بیر ایکیسینی آلیب قویاردیلار ائولرینین دووارلاری یئرینه؛ ائله کی اؤزون ده اؤزونو سئچنمزدین اونلارین ایچیندن. اونلاری اؤزون سانیب اؤزلویونو ایتیرردین.
بلکه ده هنده‌ورینه پرده چکیب، سنی آپاراندان سونرا، یئرینده اؤزونه تایین ایشله‌ییردیلر. بلکه ده باشقا یئرده دوزلتدیکلریله بوش یئرینی دولدورماق ایسته‌ییردیلر.
بیر گون، ایکی گون، اوچ گون، …، اون گون… هر گون گلرـ گلمز آیاقلاریملا گلیب، اؤنونده دایانیردیم، آمما هئچ نه گؤره بیلمیردیم. گومانیم یئله گئدیردی، او دا سنینله گئتمیشدی. نه گون چیخیردی، نه یاغیردی، نه ده بوداقلار ترپنیردی.
گئجه‌لر «سنی سحر گؤردوم بلکه» دئیه، گؤزلریمی یوموردوم، سحرلر ده سنی گؤرمک ایچون گؤزلریمی آچیردیم.
سنی گؤرمه‌دیییم گوندن، هر گون سنی گؤزومدن ایتیرنلری، سنی کدرلندیرنلری، قورخاـ قورخا قارغیییردیم، بیردن اؤز اته‌ییمی توتماسین دئیه. ]آرا وئرمه‌دن دیلیمی دیشله‌ییرم، آخی دئیرلر قارغیشلی باش سالامات اولار. سالامات اولار یوخسا سالامات قالار؟ اینترنتدن تورکی مثللری آختاردیم، او مثلی تاپمادیم، آز قالیردی باتام قالام مثللرین ایچینده. دیلیمی بتردن دیشله‌دیم «قارقشین ایکی باشی اولار» مثلین گؤرنده.[
بو گون سحر چاغی دا عادت اوزره گلیب اؤنونده دایاندیم. سئویندیییمدن نه ایش گؤره‌جه‌ییمی بیلمیردیم. نئچه دؤنه گؤزلریمی یوموب، آچدیم. سن یئنه وقارلا، قارلی و دومانلی، اؤنومده دایانمیشدین. هیجانلاریمی کلمه‌ـ کلمه سنه باخاـ باخا بیر بیرینین دالیسینا دوزوردوم.
بیر گؤز قیرپیمیندا یئنه‌ده قاتی توتقون هاوادان باشقا بیر زاد گؤرمه‌دیم. ه‌ووله‌سک گؤزلریمی بیر داها یوموب آچدیم. یئل باشیندا کی بولودلارلا اویناییردی، قارلار اوینایاـ اوینایا یئره دوشوردولر، بوداقلار ترپه-نیردیلر. داها گؤزلریمی یوممادیم.
روح‌انگیز پورناصح
چئویرن: روح‌انگیز پورناصح
ترجمه: روح‌انگیز پورناصح
سسلندیرن: روح‌انگیز پورناصح
- حئکایه
- اوخوماق زامانی: 2 دقیقه
- https://ishiq.net/?p=14463
چاپ
2 پاسخ
روح انگیز خانیمین یایغین آدلی حئکایه سینی اوخودوقدا، وطنین موقاویمت سیمبولو، داغلار گؤزلریمین آؤنونه گلدی، آجی طنز دویماق دورومونو یاشادیمسا، حئکایه نین سونوندا اومید بئشییینده ییرغالاندیم. من روح انگیز خانیمین نه دئمک ایتسه دیییندن دانیشمیرام، نه دوشوندویومو پایلاشیرام. جومله لر قیسا ائله جه ده سؤزلرین اولدوقجا بوروشوقسوز شکیللری، جومله لرین اوست قاتینین دوشونولمه سییده چتینلیک یاراتمیر. آنجاق آلت قاتلاردا، فیکیری قیریق ایپ کیمی آلدیمسا، قیریقلاری بیر سیرا یئرلرده دویونله سم ده، دویونله مه دیییم یئرلرده اولدو. اللرینیزه ساغلیق روح انگیز خانیم!
گوزل دیر. اللریوه ساغلئق!